سعادته یتوشوب درک ایدن بوشعبانی #ماه_شعبان_خادم_تبریزی

حوادث ماه شعبان المعظم
گریز به شهادت حضرت علی اکبر (ع)
.
.
.
مرحوم احمد پورعطا ( خادم تبریزی )
.
سعادته یتوشوب درک ایدن بوشعبانی
بوآی کناره چکر غرق بحرعصیانی
.
تمام بنده لرین حالینه اولور شامل
بو آیدا رحمت صنع فیوض رحمانی
.
عبارتینده رجوع ایله اهل فضله ولی
حوادثاتنی من شرح ایدوم کماکانی
.
بوآی اوچونده که گلدی حسین دنیایه
او لطفلن نجه مسرور قیلدی زهرانی
.
چهارمینده حسینه وروبدی بیرقارداش
اونون وفاسیدی حیران قویان بوامکانی
.
امام چارم اولوب پنجم همین آیدا
نشان ویرن بودی ایّوبه اوُل شکیبانی
.
بوآیدی نیمه ی شعبان که قدردور او گجه
تاراقا آتماقا تحریف ایدوبله نادانی
.
همان گجه آنادان اولدی حضرت حجت
که اختیار ایلدی بیر غیاب صغرانی
.
اون آلتیسیندا موظف اولوب امام مبین
که اختیار ایلسین غیبتینده کبرانی
.
بوایل که سنّ شریفی مین اوتوز بیری قوتارور
هنوز منتظروق گورمگه او مولانی
.
ایگیرمی یدّیده میرزا علیمحمد باب
ویرن فنا یلینه اتّحاد ایرانی
.
نجفدن عودت ایدن ابن احمد شیراز
حماقتیله بو بابیّته اولان بانی
.
کناز دالکولیکه هم جلیس و هم مسلک (1)
یتوب جزاسنه تبریز یرینده اعلانی
.
حوادثاتی قوتولماز تمام شرح اولسون
گیچوب مراممه ترک ایلورم او نقصانی
.
اوتوزاوچ قمری هجری اون بیر شعبان
کتبده مژده دی تشویق ایدر جوانانی
.
پیمبرین اوزی گیتموشدی داردنیادن
ولیک خلقه دیموشدی تمام قرآنی
.
اونون جمالنی خالق سووردی ایستمیوب
که خلق گورمیه اصلا جمال طاهانی
.
دوباره خلق ایلدی بیر جوان شهزاده
پیمبره او جوان بیر زجاج جسمانی
.
لیاقت آنالیق هرآنا دگل شایان
خداسی گوردی برازنده ام لیلانی
.
تعارف اولدی اوبیر دسته گل که لیلایه
اونون جمالی منور ایدوبدی بطحانی
.
اگرچه دایه بولردی اوزین اونا او خانم
لیاقتیله تاپوبدی بو فیض عظمانی
.
اولارکه اولموشودی خدمت پیمبرده
دییردیلر بو پیمبردی مصطفا جانی
.
گورن جمالنی پیغمبره دییوب صلوات
که چولقاموشدی او سس عرش وفرش غبرانی
.
شعاعی دوتدی ایله یثربی او مولودین
نجات بولدوله اسلامه بو قضایانی
.
یتوشدی بیرعربین سمعینه همین بو خبر
زیارت عزم ایلدی گورسون اول دل آرانی
.
مشرّف اولدی امامین حضورینه او عرب
ادبله عرض ایلدی دلده کی تمنانی
.
امام امر ایلدی گتدیلراو مولودی
باخوب جمالینه اعرابی اولدی حیرانی
.
چخارتدی یاددان اوزون اوز اوتوردوقی یرده
معاینه دییه سن گوردی ماه تابانی
.
امام بولدی عرب واله اولدی صورتینه
طریق حکمتیلن دیندیریردی مهمانی
.
سوال ایدوب عربی مهربان دانوشدوردی
اخ العرب سوؤسن بو شکفته رعنانی؟
.
سنونده اولسا بونون مثلی گوررضا اولوسان
جواب ویردی بو عمری اولنجه شکرانی
.
رضا اولورسان اونون خار ایاقنه باتسون
عرب دایاندی دییوب بیر جواب شایانی
.
دیدی اوخار باتا دیدمه رضا اولام
گورنمرم ایاقندا اونون او ایذانی
.
امام گوردی عرب عالم محبتده
حقیقی ویردی جواب یوخ سوزونده کتمانی
.
پوزولدی حالی امامین عرب دیین سوزدن
گوزونده درّ کیمی آخدی اشک نیسانی
.
بویوردی بس نه اولار گور اوگون منیم حالیم
جوانلیقیندا بونی ئولدورلّه عطشانی
.
بلی او ساعت اونی سالدیلار عقاب اوستن
دونوب خیامه چاقوردی امام تنهانی
.
امام گلماقنی رزمگاهه مخیمدن
یازار عبارت مقتل چو شیرغرانی
.
قشون قییتدی اوغول صاحبین گوروب گلدی
گورن اوصولتی قاچدی بوشاتدی میدانی
.
تاپاندا اوغلونا بیر آز قالوردی گورسندی
قوری یر اوسته گورنده او ماه سیمانی
.
جوان اوغول ئولمی گورموین یقین بولمز
نه نوع گلدی یتوردی او قانه غلطانی
.
بولنمورم نجه اندی او ذوالجناح اوستن
سوروندی یا که ایدوب هروله او بیر آنی
.
قوجاقلادی بالانی کثرت محبتدن
الولانوب جگری چکدی داد و افغانی
.
تعاقبنده گوروب ساکت اولمادی اورگی
آلوب دیز اوسته باشین آخدی باشنون قانی
.
دوداقلاریندان علینون سیلردی تپراقی
یارالاریندان آلاردی آتاردی پیکانی
.
دیسم که یغدی عبایه نفس گلوردی هنوز
دیسم گوتوردی عدو دوغرامیشدی اعضانی
.
گتورماقین که یقین حمل ایدوبدی قتلایه
نه طرزلن گتوروبدور نه اولدی امکانی
.
اگیلدی قویدی یوزون نوجوان اوغول یوزونه
سالوب بو منظره چوخ اشتباهه اعدانی
.
خبر آپاردیلا سعداوغلونا حسین ئولدی
توجه ایتمدی اصلا او مرتد و زانی
.
ولیک خیمده بیر حالنی بولن واریدی
علاقه سی گتوروب قتلگاهه نالانی
.
علی دییردی او سس جلب ایدیب حسینی ولی
گورنمدی خانیمیم زینب پریشانی
.
بوقدر چولقالیوب قویدی ذوالجناح اوسته
سواراولوب اوزوده گور او شاه دورانی
.
نچه قدم که گلور سسلنور علی اکبر
ویرور جوابنه لبیک او معرفت کانی
.
قوتولدی صبریم ایا شهریار تشنه جگر
تاپولمادی بولوسن دردمین که درمانی
.
سنی قسم ویریرم اوغلوون جوان جاننا
نولور که لطف ایده سن بیر برات غفرانی
.
نولورکه (خادمونده) گوریدی او قبر ششگوشه
دونردی دار فنادن او اکبرین جانی
.
(1) کناز دالکولیک یک افسر دوره دیده انگلیسی بوده که میرزا محمد علی باب را برای تفرقه افکنی دربین شیعیان تحریک کرد .
.
#ماه_شعبان #خادم_تبریزی
#حسینیه_میلادیه
#عباسیه_میلادیه
#اکبریه_میلادیه
#مهدیه_میلادیه #سجادیه_میلادیه
#اکبریه_شهادت
#سعادته_یتوشوب_درک_ایدن_بو_شعبانی
#ترکی
.
.