کوچ از قتلگاه
زبانحال علیا مکرمه در قتلگاه
.
✍️ زبدة الاشعار ✍️
?: @nohe_torki
.
مرحوم سعدی زمان (1)
.
سنون گل پیکرون چون شانه ، شان شاندور آنام اوغلی
منیم زلفیم کیمی حالون پریشاندور آنام اوغلی
.
سنون جسمون دولوب باشدان باشا تیر و سنانیله
منیم باغریم دولوب چون غنچه پرده پرده قانیله
سن ئولدون قالدی زینب ناله و داد و فغانیله
منیم سندن غم و غُصّم فراواندور آنام اوغلی
.
سنه بیر کشمکش یوز وئردی بیر بند زر اوستونده
من ائتدیم شمریله مین کشمکش بیر معجر اوستونده
آچوب جسمیمده قمچی سرخ گل نیلوفر اوستونده
الیم زلفیم یوزوم قانیله الواندور آنام اوغلی
.
دگوب هر تیغ جسمونده چکوب بیر قرمزی جدول
مُذهّبدور قزل قانیله گویا مُصحف مُنزَل
سلامتدور نه باش، نه سینه، نه اعضا ، نه قارداش ال
قزل گُل دسته سی گویا که خنداندور آنام اوغلی
.
حروف ابجدی اوسته یازیلمیش نه گوزل تنوین
دوشوبدور یر به یر ، زیر و زبر نیزه ائدوب تضمین
قویوب اوچ شعبه اوخ تشدید ، خنجرلر چکوب مدّین
حروفات اوسته نقطه نوک پیکاندور آنام اوغلی
.
اوزون قرآن ناطق سن آدون قرآنه پیرایه
وروبلار بسکه کاری یاره لر بو جسم زیبایه
یوز اون دورت سوره قرآنی ، یازوبلار آیه به آیه
قلم اوخدور مرکّب قرمزی قاندور آنام اوغلی
.
وروب چون هیکل توحید باشون نیزیه اعدا
اولوب شیرازه سیز قرآن کیمی اوراق بو اعضا
ولی هر بیر ورقدن مین ورق توحید اولور پیدا
بو صدپاره بدن بی جلد قرآندور آنام اوغلی
.
بیری گر ایستسه مرئی نشانه ذات یکتادن
سراغ آلسون گرک بو پاره پاره قانلی اعضادن
دوشر اهل اولمیان چوخ فکره بو مشکل معمّادن
و لیکن زینبه حلّی چوخ آساندور آنام اوغلی
.
محال ایشدور منیم بیرده بو عالمده یوزوم گولسون
دیلیم دوتمور هانی بیر اهل دل درد دلی بولسون
هانی جسمونده ابعاد ثلاثه زینبون ئولسون
یارالی پیکرون خاکیله یکساندور آنام اوغلی
.
گلنده رزمگاهه ایستدون بیر کهنه پیراهن
اونی تا سویماسون قارداش سویاندا رختیوی دشمن
اولا کول باشیمه نه نوعیله تاب ایلیوم بس من
وجودون گون کیمی قان ایچره عریاندور آنام اوغلی
.
گیچن ای نیزیه باشی قالان نعشی قوری یرده
#حسینی نوکرون شاها دوشوب بیر چاره سیز درده (1)
ائدنمور چاره دکترلر چکولّر مطلبه پرده
سنون لطفون فقط بو درده درماندور آنام اوغلی
.
اگر چه چوخ گناهیم وار تاپولماز جرمیمه پایه
سیزه وار نسبتیم امّا منه اسموندی پیرایه
سنی زهرا آنان قیلما منی محتاج اطبّایه
بولورسن جرمیدن اوغلون پشیماندور آنام اوغلی
.
بو دکترلرده بو دردین علاجین بولمسون سنده؟
امامت علمینه باخ گور اولور بو شیوه زیبنده
تالاندیم تنگه گلدیم درده یوخ طاقت داخی منده
نئچه آیدور انیسیم داد و افغاندور آنام اوغلی
ــــــــــــــ
(1) در بستر بیماری بعنوان توسل گفته شده است.
.
#کوچ_کربلا
#سنون_گل_پیکرون_چون_شانه_شان_شاندور_آنام_اوغلی
#سعدی_زمان
#کنزالحسینی2 ص 215 (کلیات ص 439)
#ترکی
.
✍️ #زبدةالاشعار ✍️
?: @nohe_torki
نظر دهید