مدح و مراثی حضرت فاطمة الزّهرا (س)
..
..
..
..
علومی تبریزی
..
..
..
..
سپهر عصمتین بیر نیّر تابانی زهرادی
ایدن روشن محیط مکتب ایمانی زهرادی
..
..
..
..
رسالت باغنون بیر سرو خوش رفتاریدی زهرا
اولان اون بیر امامین مادر غمخواریدی زهرا
على المرتضانین همسر و دلداریدی زهرا
امامت ملکنون دنیاده پشتیبانی زهرادی
..
..
..
..
آدی صدیقه دور مثلی هانی صدق صداقتده
بونا محتاجدور جن و بشر روز قیامتده
تاپلماز بیر نفر همتا بونا شأن جلالتده
گچن عزّ و شرفده مریم و سارانی زهرادی
..
..
..
..
بودور باغ نبوتده اولان بیر نو گل زیبا
بونی خلقتده خلّاق جهان خلق ایلیوب تنها
بودور محبوبّ یکتا بودور ریحانۀ طاها
قویان حیرتده کُلّاً عالم نسوانی زهرادی
..
..
..
..
گرفتار اولسا هر کس تنگه گلسه رنج عظمادن
گرک صدقیله دوتسون دامن پرنور زهرادن
گئدنده رحمةً لِلعالمین بو دار دنیادن
بیوردی امّته پیغمبرین جانانی زهرادی
..
..
..
..
اورکده کینه سین دشمن دولاندوردی دولاندوردی
بروزه ویردی گلدی ظلمنى عرشه دایاندوری
آدین امّت قویان درگاهینه اود ویردی یاندوردی
او درگهده بیلوردی مصطفانین جانی زهرادی
..
..
..
..
گرک بزم عزاده ذکر اولا اشگیله بو مطلب
سالوب زهرانی دلدن ثانی خونخوار و لا مذهب
قالاندا پشت درده حامله ایدی کیم دیدی یارب
آماندی درک ایدون بو دختر طاهانی زهرادی
..
..
..
..
آچوب خطّابین اوغلى ظلم الین آغلاتدی زهرانی
بیلردی بیر وصیت باغلیوبدی دست مولانی
علینون باغلادی خیبر آچان قولّارینی ثانی
طناب ظلمدن آزاد ایدن مولانی زهرادی
..
..
..
..
مصیبت قوی دیوم تا ناله اوج ایتسون عزاسیندن
خطا ایتدیم نجه واضح دیوم قنفذ جفاسیندن
ئولونجه فاطمه بو ظلمی گیزلتدی حیاسیندن
ولی واضحدی دینون اوّلین قربانی زهرادی
..
..
..
..
یخلمشدی یول اوسته دوردی گوز یاشین نثار ایتدی
گیدوب مسجدده تاپدی مرتضانی آه و زار ایتدی
او طوفان حواثدن یداللهی کنار ایتدی
سالان محشر ئولونجه عالمه طوفانی زهرادی
..
..
..
..
تقاضای ممات ایلردی اوقات صلاتینده
گیدردی درگه پروردگاره مشکلاتینده
آچان بیر مکتب شایسته طومار حیاتینده
او مکتبدن چخاردان زینب کبرانی زهرادی
..
..
..
..
پیمبر امّتی دنیاده قورتاردی جهالتدن
گیدنده ویردی مژده امّته فیض شفاعتدن
عجب زهرایه پاداش رسالت یتدى امّتدن
او پاداشیله آخر ترک ایدن دنیانی زهرادی
..
..
..
..
علی غسلین ویرنده آغلادی یوز قویدی دیواره
بیوردی واردی حقّیم آغلیام قان بو دل افكاره
شهیده گتدی دنیادن قسم خلّاق جبّاره
علیدن گیزلدن چوخ درد بی پایانی زهرادی
..
..
..
..
کفن پوش اولدی زهرا تا حسینیله حسن گلدی
وداع آخره شهزادلر دلده محن گلدی
آنا وای ناله سی قوزاندی شوره بوالحسن گلدی
اورکلردن اوجالدان ناله و افغانی زهرادی
..
..
..
..
علینون غصّه دن باخدوقجه رنگ صورتی قاشدی
گلوب جوشه وفا زهرا کفندن قولّارین آشدی
ایکی دلنبدینی آغوشنه چکدی قوجاقلاشدی
بو اعجازیله محکم باغلیان پیمانی زهرادی
..
..
..
..
گیدنده قبره دللردن عنان و اختیار آلدى
گوراخ تابوتنی خیر النّسانین کیم یولا سالدى
گیدوب زهرا یرینده قهرمان کربلا قالدى
ایدن روشن اونا برنامۀ دورانی زهرادی
..
..
..
..
علی آرام جانین دفن ایدنده اولدی بی طاقت
پیمبر گلدى آلدى جسم زهرانی همان ساعت
مناسبدور دیسون ای امّت اسلامه حیثیّت
بو پرپر گل اولور پیغمبرین مهمانی زهرادی
..
..
..
..
اگر زهرادی بو اولموش ندن خم قدّ رعناسی
نه علّت اولدی آی تک دوتدی بیله هاله سیماسی
نه تیز زهرا قوجالدی یاعلی گتدی تواناسی
قالان مندن امانت تا چکن هجرانی زهرادی
..
..
..
..
قلم یازما یتیشمز بو مصیبت شرحی پایانه
همان زهرادی بو معناده گلدی شور و افغانه
گهی گوز یاشلو بغداده گیدور گاهی خراسانه
اوغول وای ناله سیله دولدوران دنیانی زهرادی
..
..
..
..
گتوردی چوخ مصیبت گر خانم زهرانی فریاده
ولی اوغلی حسینون محنتینده چوخ گلوب داده
کسنده شمر حسینون باشنی گلمشدی معناده
گورن شمرین الینده خنجر برّانی زهرادی
..
..
..
..
دوشن صحرالره شورش سالان دنیایه شوریندن
اوجالدان ناله سین افلاكه خولینون تنوریندن
کلیسانی منوّر ایلین اسلام نوریندن
مسلمان ایلین بیر امّت عیسانی زهرادی
..
..
..
..
گلنده قائم آل محمّد ازدهامیله
ازل سمت بقیعه یوز قویار کسکین حسامیله
چخاردار قبردن ثانینی قصد انتقامیله
بیله لّر بو عملدن مقصد پنهانی زهرادی
..
..
..
..
الهی اذن ویر فریاده سلطان جهان گلسون
مصیبتدن اورکلر قانه دوندی قان آلان گلسون
نظامه سالماقا دنیا یوزین صاحب زمان گلسون
علومی گوزلین بیرده همان سلطانی زهرادی
..
..
..
..
#فاطمیه #علومی_تبریزی #فاطمیه_مدح #فاطمیه_شهادت #ترکی #زبدةالاشعار
نظر دهید