عروسی حضرت سلیمان علیه السلام
گریز به شهادت حضرت قاسم علیه السلام
.
✍️ #زبدةالاشعار ✍️
.
🆔: @nohe_torki
.
مرحوم انور اردبیلی
.
.
صاحب سیطره و سلطه مطلقدی خدا
صانع صنع سماوات معلقدی خدا
ازلی و ابدی اصدق و اسبقدی خدا
هامی عالم اونا محتاج ئوزی معبودوصمد
هو الله احد – لیس له کفوا” احد
.
.
کنه ذاتنده اونون عقل کمیتی پالنگ
کرمیندن دولانوب چشمه لره سینه سنگ
داغلاری داشلاری ایجادالیوب رنگ برنگ
بزین انجمنیله صحن ثریانی اودور
یارادان احسن تقویمیده انسانی اودور
.
.
علم الاسمانی ایدوب بولبشره ارزانی
سیر ایدوب حضرت آدم حرم جانانی
سایه روح فزای شجر طوبانی
بهره ور ایتدی ئوزون سفرهء جانانیندن
استفاده ایلدی نعمت الوانیندن
.
.
هاکذا فالق الاصباح خداوند حیات
نوحه گر نوحی ایدوب صاحب کشتی نجات
صبریله ایلدی ایوبی رفیع الدرجات
قیلدی اعطا سلیمانه سریر عظمت
یل لرین اوسته فضاده ایلیوردی حرکت
.
.
عقل حیراندی اونون دایرۀ دولتینه
حیطه سلطنت و قدرتنه حشمتینه
علمنون پایه سینه عزتنه شوکتنه
اهل تاریخ یازوب دفتره بو اخباری
دورد آغاجدان واریدی دورد آغاجا درباری
.
.
خام گوموشدن اوزینه ایتمشدی قصر بنا
گون دوشن وقتده همان قصرده آرتوردی جلا
نور دریاسی کیمی موجلری شعشعه زا
گورسنوردی گوزه چون جلوه لری برق شهاب
شکلی زیبائدی چوخ دورنماسی جذاب
.
.
شمعلر دامنینه هر گیجه ده اشک بریز
عودلر یاندوقیجا عطرلری رایحه خیز
قصریده ساکنیدی دورد یوز حدودینده کنیز
چلچراغلار ایشقی طعنه وروردی آیه
واریدی اون ایکی مین کرسی زرین پایه
.
.
صدر تالارده مین صندل زیبای بلور
دوشدوقیجه اولارون اوسته چراغلاردان نور
آیری بیر منظره تالارده ایلوردی ظهور
دوری آئینه نجه گوسترر انسان یوزینی
کیم او صندلره باخسیدی گورردی اوزینی
.
.
تکیه ایلوردی او صندلره سرکرده لری
کاردان بزرگ سپه جن و پری
قوشلارین سایه سالوردی او بساط اوسته پری
باشدا بیر تاج گهردار و جواهر ماءنوس
پر بها تخته سلیمان اوزی ایلوردی جلوس
.
.
روشنیدی اورگی علم لر انواریندن
هر گوشون آگهیدی لهجه و گفتاریندن
دیندیروردی سوز آلوردی دم منگاریندن
گوردی بیر گون باشی اوسته هامی پرنده لری
بزمده هدهد شانه بسرون یوخ اثری
.
.
مختصر کچدی بساطنده او قوش تاپدی حضور
دیدی ای مرغ سبک شهپر و دارای شعور
هارا پرواز ایلمیشدون گوروروم سنده غرور
شادسن بال و پرون خسته بواندازه نه وار
فاش ایله هر نه گوروبسن خبر تازه نه وار
.
.
دیدی من ملک سبایه ایلمیشدیم پرواز
گورموشم اهلنی غرق حشم و نعمت و ناز
ولی جمعیتی کافردیله پابند مجاز
حکمراندور اورا بیر بانوی اجلال منش
آدی بلقیسیدی افسوس اوزی کافر کیش
.
.
اون ایکی مین قاپوسوندا واریدی سرهنگی
اون ایکی مین نفر هر هنگیده مرد جنگی
هر یره چکسه قوشون فتحده اولماز لنگی
باشه بیر تاج قویوب زینتی چوخ قیمتی یوخ
واردی بیرتختی اونون گورملیدی صنعتی چوخ
.
.
عرضی هم طولی چهل ذرع اوتخت اعلا
عاجدن دی اوزی دندانه لری سیمین سا
نقره قوشلار اولوب آویزه او تخته زیبا
قوشلارین بطنی دولی عنبر و مشکیله تمام
اوجالور عطرلری مجلسه آرام آرام
.
.
یازدی بیر نامه سلیمان اونی توحیده چکه
طرز انشاده یتوردی بو سوزی ای ملکه
بیزه روشندی سالوب دامنوه کفر لکه
اوخیوب نامه می اسلامی قبول ایتملی سن
اولماسون تابع توحید آرادان گتملیسن
.
.
نامه نی هدهده تسلیم ایدوب اول محرم راز
قاصد شانه بسر ایتدی سبایه پرواز
تخت بلقیسه سالوب نامه نی اول خوش اواز
امرانی چاغوروبدور ملکه مشورته
دیدی مکتوبه باخون فکر ایلیون مملکته
.
.
دیدیلر کیمدی سلیمان اوزینی ایتمش عزیز
نگران اولما خانوم بیزده ده وار روح ستیز
لشکرونده اولا هیهات سنون پای گریز
ملکه قیلدی بیان رایوزه تغییر ویرون
فکر معقول ایلیون من گوره نی سیزده گورون
.
.
خردا پرنده دی قاصد بو قوی سلطانه
فوق العاده بشری سانمیاقون افسانه
جنگه اقدام ایله سوز ملکیم اولار ویرانه
منلیگ اولسا اونی تطمیع ایده گون ای امرا
تحفه ارسال ایده گون محضرینه سیم وطلا
.
.
چارده خشت ویروب قاصده بلقیس صبا
یدسی ناب گوموش یدسی ناب طلا
بیر نچه پرده زربفت و ظریف و اعلا
تحفه رسمیله سلیمانه ایدوبدور ارسال
واردی بیلموردی او حضرتده نه اندازه جلال
.
.
قاصد چابک بلقیس سبا الحاصل
سرعتیله یولی طی ایلدی منزل منزل
یتدی درباره سلیمانه دوروب باخدی خجل
لبلری اوسته قویوب بارماقینی حیرتدن
گتدیگی تحفه لری آتدی یره خجلتدن
.
.
قاصده ایلدی اظهار سلیمان کبیر
حشمت اللهدی منیم حشمتیم اولما دلگیر
قیدوب سن ایله بلقیسی بو معنایه خبیر
یازمشام نامه ده اسلامی قبول ایتملی دور
سوزومه باخماسا حتما آرادان گتملی دور
.
.
قیدوب پیک سبا گوردیگین ایتدی اظهار
ملکه عزم سفر قیلدی سبادن ناچار
دوتدی تصمیم سلیماندن ایتسون دیدار
گوتوروبدور نچه یوز خادم و زیبا خدمه
سفره باشلادی اجلالیله اول محترمه
.
.
بلدی جریانی سلیمان بویوروب یا رفقا
کیمده وار قدرت مافوق ایده امریم اجرا
تخت بلقیسی سبادن گتوره فوری بورا
اسم اعظم اوخودی عالم عالیه هدف
بزمده حاضر ایدوب تختی وزیری آصف
.
.
بشرون قدرتی وار یردن اوزین عرشه چکه
نعل نعلینی بلی ناز ایلیه نه فلکه
حیطه حکم سلیمانه یتشدی ملکه
بیردرین خندقی درک ایتدی سوئیلان سرشار
او بیوک خندقون اوستونده بلورین پل وار
.
.
کورپدن هم اوزی هم قیلدی کنیزانی عبور
حشمت الله بساطنده تاپوب فیض حضور
گوردی اوزتختینی مجلسده او شایسته شعور
سلطنت وار دیدی بو شاهیده بلمم نه سیاق
گتوروب مجلسه تختمی مندنده قاباق
.
.
نفسمه ظالم اولوب غافل معنایم عجب
آلاددوبدور منی دنیاده فریبنده لقب
گلدیم حق مکتبینه جرممی عفو ایت یا رب
بو سلیمانکه جلالی بیله بهت آوردی
منه رهبردی خدایا سنه پیغمبردی
.
.
دل پسند اولدی سلیمانه گوزل اقراری
قیلدی تجلیل عملندن خانمون تکراری
آصفه امر ایلدی صیغه سین ایتسون جاری
در و الماس و جواهر اونا مهریه نقد
جشن اساسی قورولوب دور سالوب سفره عقده
.
.
او طویون منظره سی شوکتی گلمز رقمه
نه دیمکله قوتارار نه چکه بلم قلمه
مجملا” بیر نچه جمله یازورام با این همه
قلت قدرتیله سعی ایدورم اشعاره
بلکه بیر مشت نمونه الیم خرواره
.
.
نجه بیر طوی نه ضیافت نجه عشرتلی بساط
گورمیوب مثلنی حاشا گوره بو کهنه رباط
عیشیدن قلبلرین ساغری سرشار نشاط
شمع کافوری لرون شوگه سالور اشراقی
قدح شربت النده دولانور هر ساقی
.
.
جن و انسان و پری بزمده ایلوبله جلوس
لبلریندن اوجالور زمزمه ی یاقدوس
حالت وجد و سرور اوسته دی داماد وعروس
پرآچوب گرمدی مرغان هوا بازیله
نغمه پردازی ایدور هر قوش اوز آوازیله
.
.
نرم یل لر ایلیوب مجلسی مطلوب فضا
گوئیا گلشنه یاز فصلی اسور باد صبا
عودلر عطری پراکنده معطردی هوا
ابیضی ابرلر ایتمش اوزینی سایه فکن
اهل مجلس اوتوروب باغ جناندا دیه سن
.
.
بو طویون منظره سین چکدی قلم دفترده
آیری طویدان خبریم واردی بی آیری یرده
او طویون طوی گونی دامادی اولوب اللرده
عالم فکر گلون قانلی منایه گیده گون
گورمگه بیز او طوئی کرب و بلایه گیده گون
.
.
گوردوک اشعاریده اولکی طویون زینتنی
سفره عقدینی مهمانلارینی نعمتنی
عشرت و عیشینی ساقی لرینی شربتنی
سوزی سوزدن اوکه عاریفدی گرک فوری سچه
ایکیمینجی طویون اهلی سو تاپانموردی ایچه
.
.
قوشلار اولکی طویون اولدی غزل پردازی
اوج ایدوبدور گوگه هر تک تکنون آوازی
نغمه خوان اولدولا گه ایلدیلر گه بازی
ایکیمینجی طویون آهنگ عزاسی واریدی
نغمه خوانی ایلینلر آتاسیز قزلاریدی
.
.
قلبدن شادیدی اولکی طویون حضاری
یوخیدی قاره گین اگننه آری آری
هر کنیزین واریدی معجر زرین تاری
ایکیمینجی طویون حضاری جگر قانیدی
تللری زلف بنفشه کیمی افشانیدی
.
.
جلوه ویرمیشدی اولکی طویا داماد و عروس
گینوب ایتمیشدی هر بیری بیر تخته جلوس
ایکی جان اولموشیدی بیر بیره گویا ماءنوس
میل ایدوب نقل و نباتین هامی شیرین لبیدی
بو طویون سفرهء عقدین دوشین زینبیدی
.
.
او طویون فر و شکوهنده نظیری یوخیدی
صیغه الفت پیوندنی آصف اوخودی
بو طویون لذتی یوخ نسکلی اما چوخودی
صیغه جاری ایده نون چاره یولی باغلیدی
نوجوان اکبری اولمشدی اورک داغیلدی
.
.
او طویون اولدی سلیمان نبی دامادی
بزه نوب اولمادی طوی حجله سنون ایرادی
نو عروسنده خانم بلقیسدی آدی
کد خداسی بو طویون قاسم اون اوچ یاشدیدی
گلینی فاطمه قارداش قره سی باشدیدی
.
.
چهره بشاشیدی اول طویدا عروس و داماد
عکسنه دونمشیدی لیک بو طویدا هرزاد
هم گلین تشنه جگر هم تزه داماد ایداد
اوجالوب آهی لری سینه لرین داغلیدی
هی باخوب بیر بیرینه هر ایکسی آغلیدی
.
.
مختصر کچدی اولان اولدی سوزین ماحصلی
قاسمون پرپر اولوب جسمی شقایق مثلی
قان حناسیله خضاب اولدی او صحراده الی
قالدی آتلار ایاقیندا حسنون گل بالاسی
آلدی دامادینی آغوشه اوز قیناتاسی
.
.
حمل ایدوب خیمه سرایه او داغلمش بدنی
قانان الوانیدی نازک عربی پیرهنی
قرمزی پرده ده پنهانیدی وجه الحسنی
تازه دامادیدی چون ختم رسولون ایلنه
ایستی یل دگدوگجه شانه وروردی تلنه
.
.
یری وار حضرت زهرا آچا بو نوحه ده باش
در اشکین ایلیه قاسمنه نقل شاباش
داش اورکلر اقدر جسمینه ویرمشدیلا داش
نقشه پیکری گتمشدی بکلی آرادان
قرمزی نقل کیمی قان توکلیدی یارادان
.
.
دوءلی ات کیمی اولموشیدی جگربند حسن
سورونوردی ایاقی یردن اوزانمشدی بدن
قدم آتدوقجا حسین دلدن ایدوردی شیون
تازه دامادینون اوخشوردی اوزی یولدا بویون
نه گوزل پیرهنون واردی مبارکدی طویون
.
.
حقی واردی عمووین ناله سی نی تک اوجالا
محنتون داغ چکلن قلبمون آرامین آلا
گوزل اکبر کیمی یومدون گوزوی سنده بالا
نه اونون نسکلی گلمز سانا اوغلوم نه سنون
هم حسینون چراغی کچدی بوگون هم حسنون
.
.
یتوروب خیمیه جانسز جسدی قویدی یره
عرضمه دقت ایله منظره نی آل نظره
طوی گونی قاره گینلر یغشوب دور و بره
گوردیلر قان بورین قاره گوزین قاره قاین
آناسنداندا قاباق عمه لری آچدی باشین
.
.
آناسی گلدی گوروب لاله پرپر مثلین
اورگی اوستونه قویدی بالانون قانلی الین
دیدی داماد گلوب هاردادی بس تازه گلین
قسمتی اولمادی افسوس دیون ماه عسل
سنی اکبر جانی یورقوندی عم اوغلون تزگل
.
.
فاطمه حجله ده جریانه خبر دار اولدی
دیدی بختیم کیمی روشن گونوزوم تار اولدی
گتدی یاریم بلورم غصه منه یار اولدی
دور ایدوب ماه کیمی غصه لی اولدوزلار اونی
اوزی گلموردی گله گتدی سوسوز قزلار اونی
.
.
قاسمه ایتدی نظاره اولوب آشفته گوگل
شکوه ایتسم ددی هر چند برازنده دگل
نو عروسه تازه داماد ویرور قرمزی گل
وای منه توکدی فلک باشمه غم وغصه کولون
اللرون بوشدی عم اوغلی هانی بس دسته گولون
.
.
#قاسمیه_شهادت #حضرت_سلیمان
#صاحب_سیطره_و_سلطه_مطلقدی_خدا
#آخرین_یادگار
#ترکی
.
✍️ #زبدةالاشعار ✍️
.
🆔: @nohe_torki
نظر دهید