صادر ایتدون مسلمه حکم سفارت یا حسین #مسلمیه_حسنی_تبریزی

زبانحال حضرت مسلم (ع)
.
.
.
حاج حسین حسنی افشرد تبریزی
.
صادر ایتدون مسلمه حکم سفارت یا حسین
بو سفیره کوفه ده اولدی جسارت یا حسین

.
اهل کوفه ائتمدی اوز ایتدیقی عهده وفا
دیللرینده چوخدی کینه ذرّه جه یوخدی صفا
بیر منم بیر شهرین اهلی هر یتن ایلور جفا
بو غریب احوالین ائتمولّر رعایت یاحسین

.
اکثریت بیعته ائتموشدی اوّل اتّفاق
اتّفاق ائتموشدیلر گویا که سالسونلار نفاق
زوریله خلق ایلیوبله خلق ایچینده اختناق
اختناقه بو سوزوم ایلر کفایت یا حسین

.
خلق ائدوبلر خلقین افکارینده وحشتدن رکود
یوخدی جرأت ایله سین بیر کیمسه اظهار وجود
قورخودان تلبیسیله ابلیسه ایلوللر سجود
یا ائدوللر کورکورانه اطاعت یاحسین

.
سرشناسان قبائل تولانوب سیم و زره
یاندیلار بو سیم و زردن روشن اولموش آذره
مسلمینین سرنوشتی دوشدی دست کافره
کیم تعارض ایلدی اولدی سیاست یاحسین

.
بو سیاست اوّلینده پوزدی خلقین وحدتین
سلب ائدوبدی ملّتین آسایشین امنیّتین
الده بازیچه ائدوبلر چوخلارین حیثیتین
کوفه ده حاکمدی عفریت جهالت یا حسین

.
دوشدی عفریت جهالت دامینه جمع کثیر
محترم اشخاصیلر زندانی اولدی بیر به بیر
تفرقه ترفندی هانینی ائدوب اوّل اسیر
اولدی آخرده شهادت بو اسارت یاحسین

.
تفرقه باعث اولوب ملت منی ترک ائتماقا
جوّ حاکم سدّ راه اولدی مرامه یتماقا
تاپمادیم حقدن سوا مأمن امانه گئتماقا
تا چاتا سر منزله بار امانت یاحسین

.
چاتمادی بار امانت مقصده شرمنده ام
جسمیدن آیریلسادا جان عهدیمون پابنده ام
ای مسیحایه وئرن دم من او دمدن زنده ام
وار سنه عشقیم بولورسن بی نهایت یاحسین

.
لوح دلده نقش اولان یوخدور جمالوندان سوا
اولمیوب اولماز خیالیمده خیالوندان سوا
یوخ ملال و محنتیم هرگز ملالوندان سوا
واردی سینمده ملالوندن ملالت یاحسین

.
فکریمی درد و ملاون فکری اشغال ایلیوب
بو تفکّر مسلمی آشفته احوال ایلیوب
قصد خدمتله سنه مکتوبون ارسال ایلیوب
اؤز اؤزون ایلور ولی ایمدی ملامت یاحسین

.
بیله بولسیدیم اولالّار کوفیان پیمان شکن
چوخدا تعجیل ایلمزدیم نامه ارسالینده من
سن که آگهسن ضمیریمندن ایا شاه زمن
خدمتیمده وار نه اندازه صداقت یاحسین

.
شاهد صادقدی صدقه بو یارالی پیکریم
عشق پاکون چون ازل گوندن اولوبدی باوریم
هر مهالکده منیم بو باور اولدی یاوریم
باوریم آرتوردی منده استقامت یا حسین

.
استقامت فرض اولوبدی چونکه آل هاشمه
سهلیدور بو باور اوسته هر نه گلسه باشیمه
استقامتله دایانّام خم یتیشمز قاشیمه
ایله سین گفتاریمی حالیم حکایت یاحسین

.
ائتمورم شِکوه گلن باشه غم ایّامیدن
آز زماندا کوفه ده یا گوردوقوم آلامیدن
من که سرمستم ازل ساقی ایچیردن جامیدن
جسمیمی تسخیر ائدوب روح شهادت یاحسین

.
جانیمون پیمانه سی ممکوندی که آسان سینا
سعییم اولدی قویمیام پیمانۀ پیمان سینا
ظالمه مشلدی آزاده اولان انسان سینا
وئرمدیم بو سینماقا منده رضایت یاحسین

.
سعی ائدوبدور مسلمی سیندیرماقا ابن زیاد
بولمیوبدی سینمارام وار منده محکم اعتقاد
اوردا اشخاصین عملکردیندن اولسون انتقاد
مشرکین کوفه دن ائتدیم برائت یاحسین

.
سیندی جان پیمانه سی اما غروروم سنمادی
یاره لندیم باشیدن باشیمده شوروم سنمادی
غصّه لندیم دلده کی وجد و سروروم سنمادی
آرتوروبدور چون منه عشقون شهامت یاحسین

.
باش سینوب عشقونده امّا سینمیوب شخصیّتیم
حیرت افزادور بو حالیله عدویه جرئتیم
عمرومون پایانی دور افسوس اولا یوخ فرصتیم
کعبۀ رویون ائدم بیرده زیارت یا حسین

.
آخرین لحظه گوزوم جان اوسته جانان آختارور
گورماقا آخر نفسده کامل انسان آختارور
چشم مشتاقیم سنی هر لحظه هر آن آختارور
آرزویه ایلورم تنها قناعت یاحسین

.
آز قالور عمروم گولون دست اجل قهراً یولا
باخدی بیر یاور سراقینده گوزوم صاقدان صولا
آرزو ائتدوم یانیمدا اکبر و عبّاس اولا
گورمیم بوندان داخی آرتیق اهانت یاحسین

.
عشقیمون مولا سیزه یوخدور بولن اندازه سین
آچسالار معلوم اولار بو سینه مون دروازه سین
گر کتاب جسمیمونده پوزسالار شیرازه سین
برگ برگینده ائدر قانیم کتابت یاحسین

.
آخرین عرضیم بودور گلمه دیار کوفیه
یوخدی اطمینان داخی خُرد و کُبار کوفیه
دست ظلمیله یاخوبلار قان عذار کوفیه
چولقیوبدی شهر سیماسین شقاوت یاحسین

.
مرتضادن اهل کوفه سینه لرده کینه نی
ساخلیوبلار انتقامه کینۀ دیرینه نی
سیندیرا هر سنگدل بیر سن کیمی آئینه نی
دلده نصرت الده وار سنگ عداوت یا حسین

.
شانه تک حسرت الیم زلف پریشان آختارور
امن یر هر کیمسنه اولسا هراسان آختارور
دردینه بو رسمدور درمانده درمان آختارور
اولموشام درمانده لطفاً قیل عنایت یا حسین

.
واردی سینمده بولورسن تیر هجران یاره سی
اولموشام هجرانیوون بیر عمردور آواره سی
هانسی بی درمان دردین سیزده یوخدور چاره سی
درد بی درمانیمه ایله طبابت یاحسین

.
بیر عزادارم سنه شاهد بونا بزم عزا
شرمسارم لیک جرمومدور اولان خجلت فزا
قورخورام چونکه قاباقدا حشر وار روز جزا
واردی سندن چشم امّید شفاعت یاحسین
.
#سبک_زینبم_جان_اوستیم ( 4 سبک )
.
#مسلمیه
#صادر_ایتدون_مسلمه_حکم_سفارت_یاحسین
#حسنی_تبریزی
#ترکی
#زبدةالاشعار