صورتون گوندی هلاله اوخ آتور قاشون اوغول #راه_شام_عاصی_زنجانی

راه شام
زبانحال مادر
..
..
..
..
شیخ علی اصغر رسولی (عاصی زنجانی)
..
..
..
..
صورتون گوندی هلاله اوخ آتور قاشون اوغول
نه گوزل نقشیه سالموش سنی نقاشون اوغول
ویریلوب نیزیه دوشمور الیمه باشون اوغول
ایستورم صورتون آلقانینی اشکیمله سیلم
سنی آغوشه چکوب اللرى قوینوندا ئولم
..
..
..
..
گوزون آچ گور آنان آهو کیمی چوللرده ملر
ناقه لر اوسته دالینجا گوزونون یاشین الر
زحمتون چکدوم اوغول یوخلامادیم چوخ گئجه لر
قوجالان وقته دئدوم بلکه الیمدن دوتاسان
دئمدوم ای اورگیم میوه سی قانه باتاسان
..
..
..
..
راه و بیراهله قوؤدی بیزی اشرار بسی
بو سینوق قافله نون اولمادی بیر دادرسی
آز قالوب سیندیرا روحیم قوشی تار قفسی
نه اولور باشون اگر نیزه ده بیر دم دایانا
گل یوزون شمعینه بو سوخته پروانه یانا
..
..
..
..
عزتیم گئتدی اوغول دشمنه قهریم سنیدون
عاقبت مزرعۀ عمرده بهریم سنیدون
آغاروب زلفیم على حاصل دهریم سنیدون
ایندی بیچاره آنان فرقۀ اشرار آپارور
قولی باغلی بو سولان گل لروی خار آپارور
..
..
..
..
طلعتون قان بولودی جلوه سین ای ماه آلوب
بولود آلتیندا عزیزیم نیه رنگین سارالوب
پیکرونلن دایان ای باش اورگیم یرده قالوب
قیدوم بیر یارالی پیکریلن جان گتورم
دشمنون ظلمونه تا مدرک و برهان گتورم
..
..
..
..
سالموسان چوللره مدّتدی من دربدری
گزدیرولّر بو اوزاق یولاری شام و سحری
اوغلی ئولسه آنانون قالماقینون یوخ ثمرى
«عاصیا» دوشدی علی عترتی بیداد الینه
خسته آهو نه روادور دوشه صیاد الینه
..
..
..
..
#راه_شام #عاصی_زنجانی #اکبریه_شهادت #قاسمیه_شهادت #ترکی #زبدةالاشعار