عجب زمانه اولوب روزگار ، یابن الحسن! #مهدیه_امانی_اردبیلی

گلایه به حضرت ولی عصر (عج)
.
.
حاج علیرضا امانی اردبیلی
.
.
.
عجب زمانه اولوب روزگار ، یابن الحسن!
قفسده بلبل ائدور آشیان ، چمن ساتیلور
.
یانان ئورکده اولان درده ، آغلاروق گئجه لر
نهاندا هر کیم آلوب هر نیین ، علن ساتیلور
.
گوزیله گوردوگونی، دیل دیینده ، باغلانور ال
او قدری مجرم اولوب آیینه ، رسن ساتیلور
.
گلنلر عبرتیلن ، باخمئیور گئدنلرینه
اوجوز بهایه اودور ، هر گلن گئدن ساتیلور
.
مدار غمده قالوب روزگار ، ایله ظهور
او قدری مشتری وار محنته ، محن ساتیلور
.
آقا بیزیم الیمیزدن گئدوبدی هر نَییمیز
ساتیلسا هر نه بیلورسن ، به نام سن ساتیلور
.
نه حشری یاده سالان وار ، نه امتحانه باخان
بساط محکمه ده ، رأی ممتحن ساتیلور
.
بهشت باغلارینی ، ئولمه میش ، بیر عدّه آلور
صف جهالته باخ ، روضۀ عدن ساتیلور
.
کتاب ، فکره خیانت ائدور ، کتابه قلم
سوزون اجاره وئرور دیل دوداق ، دهن ساتیلور
.
غزل ، قصیده کیمین ، مدحیلن تجارت ائدور
بئش آلتی شاعر اگر اولسا ، انجمن ساتیلور
.
او کی علی نی ساتوب عشق آدیلا منفعته
بیلور ، حسینی آلان اولماسا ، حسن ساتیلور
.
دوشوبدی مسئلیه ، گور نه حالدا تعزیه میز
عزا گلنده ، عزادار آرا ، سخن ساتیلور
.
محلّه لرده هله ، نوحه نین رقابتی وار
اینان دئسم گلن ایللرده ، سینه زن ساتیلور
.
حریم معرفته ، رخنه ائتدی ریب و ریا
حرم کبوترینه ، صحنلرده ، دن ساتیلور
.
اوقدری ائیله دی یعقوبه ، حیله اون قارداش
تمام ملتِ کنعانه پیرهن ساتیلور
.
بئله بیر آل وئری کیم مردمه حلال ائلیوب؟
قالان شرافتیمز ال به ال ندن ساتیلور؟
.
خیانت ائیله مسه ، گر امین ، امانتینه
نه دشتیمیز بولونر آیری ، نه دمن ساتیلور
.
ندندی یاسمنه اوخشیان یتیمه لرین
قابار الینده مزار اوسته یاسمن ساتیلور؟
.
آغاجلار آغلاسالار بو غمه اگر ، یئری وار
یاغیش حراجه گئدوب ، یوللار اوسته چن ساتیلور
.
حقوق خلقه اگر ، ال اوزاتسا غارت ائدن
تعجب ائتمه اگر جبر اوزیله ، تن ساتیلور
.
وطن اگر آنادور ، ننگ اولان اوغوللارا کی
منافقانه بیلور ، دشمنه وطن ساتیلور
.
نظام معدلته خائن اولماسوق ئوزوموز
گئدر خرید و فروشه نه سن ، نه من ساتیلور
.
حسینه آند اولا ، هر یئرده سایه سالسا یزید
مدینه ملکی ، اِلی کوفه … باش کسن ساتیلور
.
#مهدیه_پندیات #امانی_اردبیلی #زبدةالاشعار
#عجب_زمانه_اولوب_روزگار_یابن_الحسن
#پندیات_امانی_اردبیلی
#ترکی
.
.