عشق اقیانوسی سن طوفان سنوندور یاحسین #اصغریه_قاسمی_اردبیلی

مدح امام حسین (ع) و گریز به شهادت علی اصغر(ع)
.
.
.
بهزاد قاسمی اردبیلی
.
.
عشق اقیانوسی سن ، طوفان سنوندور یاحسین
ناخداسن کشتی عرفان سنوندور یاحسین
.
درگهون درگاه اعظمدور ، همان درگاهیده
حضرت جبریل تک دربان سنوندور یاحسین
.
ابر رحمتدور وجودون رحمت الله اوغلوسان
آسمانلاردان یاغان باران سنوندور یاحسین
.
باغبانلار صف چکوب تا گلشنوندن گل دره
چون سراسر گلشن رضوان سنوندور یاحسین
.
وابن ثاره سن اولوبسان خلق ثاراللهیدن
قان خداوندینکیدی ، شریان سنوندور یاحسین
.
بدو میلادونده گئتدون عرشه معراج ایلدون
گلدی سس گویدن بو عرش الان سنوندور یاحسین
.
کهکشانلار قوی زیارت ائلسون قنداقوی
هم مکان هم لا مکان ، یکسان سنوندور یاحسین
.
کیمدی لقمان اهل درده نسخه درمان یازا
درد ئوزی فریاد ائدور درمان سنوندور یاحسین
.
عمریدور بیز خوان رحمتده نمک پروردیوک
سفره زهرانین کیدی ، احسان سنوندور یاحسین
.
سن بیزیم دادمادیمیزسن ، شهر بانو تک گرک
تا نفس وار سسلیک ایران سنوندور یاحسین
.
عهد ائدوب ایچدون بلالر باده سین روز الست
سسلدی روح الامین پیمان سنوندور یاحسین
.
حاضر اول پیمانه وحدتده سر مست اولماقا
اعتبار جمع سرمستان سنوندور یاحسین
.
ایندیدن گوزلور سنی میعادگاه کربلا
غملی میدان ، قانلی نخلستان سنوندور یاحسین
.
منتظردور ذات اقدس ذکر یا قدوسوه
حق و تسبیح حق منان سنوندور یاحسین
.
سن اگر امر ائتمسون خنجر کسنمز باشوی
شمر کیمدی ، اوردا دا فرمان سنوندور یاحسین
.
وئر اجازه قوی او قانلی خنجر آلسون جانیوی
جاندان ال ا وز ، چون خود جانان سنوندور یاحسین
.
گل مرور ائت نامه پیمانوی آماده اول
چونکه بو پیمان جاویدان سنوندور یاحسین
.
عشق بازارینده ئورگش ایندیدن گل ساتماقی
گلفروش اول ، لاله و ریحان سنوندور یاحسین
.
اکبرین نعشین عبایه بوک ئوزون آل سینوه
تا کی گورسونلر گوزل قربان سنوندور یاحسین
.
تازه دامادین دارا قانه بویانمیش تللرین
قوی دئسونلر طره افشان سنوندور یاحسین
.
تاسون عباسین دوشن قوللارینی باس باغریوا
افتخار ائت ساقی عطشان سنوندور یاحسین
.
اصغرون گولسه اوخا ئوپ لبلریندن آغلاما
آلتی آیلیق غنچه خندان سنوندور یاحسین
.
فورا آچ بند قماطین ال ایاق چالسون بیر آز
چاره ائت چون چاره سیز مهموان سنوندور یاحسین
.
چوخ گوزتله تا چیخاداندا اوخی دیسگینمه سین
قانلی قنداقدا یاتان جیران سنوندور یاحسین
.
.
الغرض تکمیل اولوندی نامه پیمان عشق
ائتدی امضاء ئوز تعهد نامه سین سلطان عشق
.
سوز بئله قالدی ، گئچوب گونلر دولاندی روزگار
ظهر عاشورا یتیشدی تیتره دی ارکان عشق
.
قالدی اواره اوغول الده غریب کربلا
باتدی قانه قانلی میداندا قوزی قربان عشق
.
کسدی بیر نازک بوغازی اوچ پر اوخ شمشیر تک
یعنی دگدی صود امر بیر عاشقه پیکان عشق
.
یاتمیان گوزل یومولدی ، یوخلادی یورقون بالا
راحت اولدی گوئیا بو طفل سرگردان عشق
.
دینمه دی چون دیلسیزیدی ، بیر گولومسوندی فقط
تا اولا آرام قلب شاه مظلومان عشق
.
گر دیلی اولسیدی عرض ایلردی آی مظلوم بابا
قویما آخسون گوزلریندن توپراقا باران عشق
.
صبر ائله دشمن باخور سن بیل رقیه اغلاما
ال چالور سن آغلیاندا لشکر عدوان عشق
.
باشوی قلخیز ئوز وغلوندان اوتانما آی بابا
باخما حسرتلن سووا ، ای حجت یزدان عشق
.
دای سووا یوخدور نیازیم ، قان دولوبدور آغزیما
ایسلانوبدور ایستی قانیلن لب عطشان عشق
.
گل گئدک اخیامه با هم گوزلیور عمم بیزی
منتظردور تلین اوسته غمکش دوران عشق
.
تئز منی قیتر ننمدن بیر حلالیت آلیم
چوخ اونی اینجیتمیشم ، شاهددی بو میدان عشق
.
گوردی شاه کربلا الدن گئدوز دیلسیز بالا
آز قالور کی جان وئره سرباز نیمه جان عشق
.
دوشدی بو فکره اونی فورا خیامه قیتره
سینه مادرده تا آرام اولا مهمان عشق
.
آیریلوب اول وعده گاهیندن ذبیح الله او دم
خیمیه یول باشلادی اجرا اولا فرمان عشق
.
الله عالمدور نلر چکدی حسین اخیامه جک
یول قوتارموردی ، یانوردی سینه سوزان عشق
.
هر قدم آتدوقجا سسلوردی منی عفو ائت رباب
اولموشام شرمنده سندن ای مه نسوان عشق
.
غنچه وی سالم منه وئردون گل ایندی پرپر آل
پرپر اولدی سینم اوسته غنچه خندان عشق
.
شاه دین غرق خیالیدی او حالدا ناگهان
گوزلری بیر صحنه گوردی اغلادی چشمان عشق
.
گوردی تل اوسته دوروب زینب دئور جان جان حسین
اشک حسرتلن دولوبدور دیده گریان عشق
.
سسلیور سن گلمه قارداش صبر ائله قوی من گلیم
چونکه یورقونسان، سنی دیلدن سالوب طوفان عشق
.
گون چیخان وقتدن داشورسان هی جنازه خیمیه
دیزلرونده یوخ توان ، لرزان اولوب بنیان عشق
.
گوزلری دولدی حسینون ، سسلدی تئز گل باجی
گلمگوندن قویما اولسون باخبر طفلان عشق
.
قالمیشام آماره زینب دلبریم الدن گئدوب
اوخلانوب دیلسیز بالام ، قانه باتوب دامان عشق
.
اللریم تیترور ئوزون گل آل الیمدن اصغری
تئز آپار اخیامه تا گورسنمیه نقصان عشق
.
وئرمه چوخ الدن اله یورقوندی سال گهواریه
چال اونا لایلای یاتا بلکه قوزی قربان عشق
.
گوزله زینب ، گورمسین قانلی دوداقلاری رباب
چونکه گورسه جان وئرر اول مادر نالان عشق
.
.
قاسمی خاموش ائله بو لحن آتشباروی
اشکبار ائتمه ربابی قورتار اوز گفتاروی
.
.
#اصغریه #قاسمی_اردبیلی
#حسینیه_قاسمی_اردبیلی #اصغریه_شهادت #یاحسین
#عشق_اقیانوسی_سن_طوفان_سنوندور_یاحسین
#ترکی
#زبدةالاشعار