على مدینه ده بیمارم ئولمرم گلسون #حضرت_صغری_یحیوی_اردبیلی

زبانحال جناب صغرا (س)
.
#زبدةالاشعار
.
: @nohe_torki
.
مرحوم یحیوی اردبیلی
.
على مدینه ده بیمارم ئولمرم گلسون
وطن غریبی دل افکارم ئولمرم گلسون
.
گئدنده طوی اتاقون باغلیوب گئدوبدور آنام
امانتیندی نگهدارم ئولمرم گلسون
.
مریض فرقتوم خاک مقدمون درمان
بلا طبیب و پرستارم ئولمرم گلسون
.
فشار پنجه ی هجران وجودیمی أریدوب
بو قدری درده گرفتار ئولمرم گلسون
.
ائدوبدو باد خزان گللری پراکنده
بقیه ی گل و گلزارم ئولمرم گلسون
.
گلینجه سن أیاقا دورمارام بو بستردن
یقین بو سؤزده وفادارم ئولمرم گلسون
.
آدوندی قوّت قلبیم هنوز ئولمه میشم
حیات عاریه ده وارم ئولمرم گلسون
.
خیال ائوینده جمالون برابرینده دوروب
همیشه آئینه بردارم ئولمرم گلسون
.
گوزوم یولوندا قالوب گوزلیور سنی گله سن
صباحه دین گئجه بیدارم ئولمرم گلسون
.
اوچوب تاپاردیم علی گر قنادیم اولسیدی
ولی خیالده طیّارم ئولمرم گلسون
.
فراقیوون گونین هرگون حساب ائدوب یازارام
دقیقه سیله حسابدارم ئولمرم گلسون
.
سنون یولوندا گلن غملرون متاعینه
وجودیمیله خریدارم ئولمرم گلسون
.
جمع ایلرم اتکیمده جواهر اشگیم
او خاک پایه گهربارم ئولمرم گلسون
.
حیات بخش سؤزون گورسم ای مسیح نفس
اگرچه ناخوش و تبدارم ئولمرم گلسون
.
اتاقوون قاپوسیندا یوزوم قویوب یاتارام
کنیز گوشه ی دربارم ئولمرم گلسون
.
اگر سنون غمون اوسته بیر آیری غم گلسه
دفاع غمده فداکارم ئولمرم گلسون
.
هلالی قاشلاروون طاقینه اوزاق یولدان
حضور قلبیله زوّارم ئولمرم گلسون
.
سنون یانوندادی روحیم قوری قالوب بدنیم
مثال صورت دیوارم ئولمرم گلسون
.
فراقه آغلیورام دوشسه گر وصالون اله
فرحلنوب گینه آغلارام ئولمرم گلسون
.
یتیشسه نامه اگر دست خطّویله منه
قیامته کیمی ساخلارام ئولمرم گلسون
.
اگر گلوب بو سفردن گینه سفر ائده سن
دوباره گئتمگه قویمارام ئولمرم گلسون
.
نیه بوراخدیم الیمدن اتگیوی گئده سن
غریبه عاشق هوشیارم ئولموم گلسون
.
بئله بیلدیم اگر چکمزیدیم إل سندن
که ایندی نادم و ناچارم ئولمرم گلسون
.
اُتورورام قاپو آغزیندا اهل ماتم تک
اؤزوم اؤزیمه عزادارم ئولمرم گلسون
.
غموندی دایره سطحی نوادی نقطه سی عشق
او سطح و نقطیه پرگارم ئولمرم گلسون
.
سینمده هندسه شکلیله وأردی غم خانه م
دل خرابیه معمارم ئولمرم گلسون
.
گهی گزوب گه اوتورّام على على دییه رم
چو نجم ثابت و سیّارم ئولمرم گلسون
.
اورک صحیفه سی اوسته شمایلون چکرم
او قدّ و قامتی اوخشارام ئولمرم گلسون
.
گزارشیم ائله سون دست وصلیله امضا
بلا کتابینی باغلارام ئولمرم گلسون
.
سنی آپارماقا گلّم اوزون دئدون یوخودا
اودور که طالب دیدارم ئولمرم گلسون
.
جزا گونونده اسیر گناه یحیویم
قاپوندا ناظم اشعارم ئولمرم گلسون
.
.
.
#حضرت_صغری #یحیوی_اردبیلی
#على_مدینه_ده_بیمارم_ئولمرم_گلسون
#ترکی
.
#زبدةالاشعار
.
: @nohe_torki