زبانحال حضرت رقیه (س) با حضرت زینب (س) در خرابه شام
..
..
..
رضا غلامپور (دلپاک)
..
..
..
عمّه اولوب عیان منه سرّ نهان خرابه ده
سرّ نهانه باخ اولوب گور نه عیان خرابه ده
..
..
..
..
محنت دشت غم آغیر سن هامی کوه اصطبار
بار جفای اشقیا سنده فلک تک استوار
کوفه ملالی صبریوه بیرده گواه آشکار
حیف اوجا قامتون ولی اولدی کمان خرابه ده
..
..
..
..
دفتر آرزو اولوب نکته به نکته ازبریم
وقت فریضه حاجته مشتری دیدهٔ تریم
قالماز اورکده آرزو لطفیله بیر یول اکبریم
گلسه نماز وقتی گر وئرسه اذان خرابه ده
..
..
..
..
بس که حدیث غنچه ده واردی نکات ابتلا
منده ندن گرک ائده جلوه تجلی صفا
ایله سارالمیشام دئیر کیم منی گورسه،گوئیا
نخل بهاریدن دوشوب برگ خزان خرابه ده
..
..
..
..
یوخ بولوسن که حیطه‌ی قلبیده محنته حدود
صبح و مسا سیزیلدیری نی کیمی عارض کبود
باخ بیر اوزون امانیمی گور نه کسیبدی بو وجود
وئرمیر اذیتی منه بیردم امان خرابه ده
..
..
..
..
کشتی حالتیم باتیب بحر ملالیده گله
عفو ائله گلمیشم اگر بو گجه غصه دن دله
گل دله سنده حالت خاصیله بیر دعا ائله
غملی رقیه بو گجه تا وئره جان خرابه ده
..
..
..
..
اهل عزا گئیر قرا اشکین اوزه روان ائدر
گاهی سکوت ائدیب گهی سوز سوزون بیان ائدر
آتش غمده اود دوتوب صیحه چکیب فغان ائدر
بس دئیوسن ندن منه ائتمه فغان خرابه ده
..
..
..
..
وقت سخن روا دگول صحبت ائدم بهانه دن
زلفومه یا باخیب دئیم حسرت اوزیله شانه دن
وار نه لزومی عرض ائدم محنت تازیانه دن
وار نه یئری دئیم ائدیب باغریمی قان خرابه ده
..
..
..
..
بیرده لوای طاقتی بام دله وورانمیرام
خیمه ی استقامتی ملک غمه قورانمیرام
یئردن ایاقه عمه جان هر نئدیرم دورانمیرام
بس کی بو جسمه قالمییب تاب و توان خرابه ده
..
..
..
..
ائیله عطشدی بو گجه درد دله یانان اورک
یاندیریری خیالیمی سوز ملالی تک به تک
عرصه گه ملالیده بو سبب ای منه کمک
هی بوشالیر دولور گینه جام بیان خرابه ده
..
..
..
..
مندرجات صفحهٔ دل هامی شرح رنج و غم
کلک مصائب آرتیریر درجینی عمّه دم به دم
بس کی یازیبدی پوزمامیش قصهٔ غم اولوب ورم
گل سنه من وئریم بیرین بیرده نشان خرابه ده
..
..
..
..
سانما ملال جان گلیب جان وئرنی بیانیمه
نسخه ی التیامیدن چاره چاتار بو جانیمه
جان ندی دولت فرح حاکم اولار جهانیمه
یاده منی اگر سالا جان جهان خرابه ده
..
..
..
..
سینمی سوز آهیله محنتیم اوسته داغلارام
وای بابا وای دئیوب یوزه اشک روانی باغلارام
سن کیمی منده عمه جان چوخ گجه گیزلین آغلارام
عارضه باغلارام نهان اشک روان خرابه ده
..
..
..
..
محبس جسمی ترک ائده طائر روح ائدیب هوس
ائیله نظر بو خواهش قلبیمه سینمامیش قفس
من سن زاره سس وئریم سنده من ملوله سس
اصغره بیز بیر اوخشیاخ اشک فشان خرابه ده
..
..
..
..
امر وفاته مستمر جانیله چوخدی چالشیم
خاک خرابه بستریم خشت خرابه بالشیم
بولمورم ئولمورم نیه ختم اولا تا کی بو ایشیم
جانیمی بس اجل آلار هانسی زمان خرابه ده؟
..
..
..
..
اشک عزا ندور بولور هر گجه دامنیله من
سن سنیله گچینمیسن غملر آرا منیله من
گویلومه چوخ دوشوب دورام بیر دولانام سنیله من
حیف اوزومه وئرنمیرم بیرده تکان خرابه ده
..
..
..
..
«دل» حرم حبیبیده دولسا مرام «پاکیله»
صحبت ائدر فلک غمین نکته به نکته خاکیله
گوزیاشیدی ای اهل دل کی هامی بو ملاکیله
گوزدن آخیب دونوب اولوب درّ گران خرابه ده
..
..
..
..
#حضرت_رقیه #دلپاک #حضرت_رقیه_شهادت #ترکی #زبدةالاشعار
نظر دهید