غمیله الفت ائدر عشقه مبتلا گجه لر #حضرت_رقیه_نادربابایی

شهادت حضرت رقیه (س)
.
.
.
حاج نادر بابایی
.
.
غمیله الفت ائدر عشقه مبتلا گجه لر
شکسته نی مثلی باشلیار نوا گجه لر
.
گئدنده مغربه گون اختران شب اویانار
تعلقات سما باشلیار ادا گجه لر
.
عبادت اهلی وئرر دم نوای العفوینه
دوشر ترابه ائدر سجده بی ریا گجه لر
.
کبوتران شب آهنگ اوخور غم آوازی
ئورک سوزی دیولر دیلده برملا گجه لر
.
غریب اولاندا بیری گون باتاندا غم گله جک
قوتاردی عمر دیر گلمدی باشا گجه لر
.
قولاق وئرر ئورگی آیریلیق ترانه سینه
باتار خدنگ کیمی قلبه اوخشاما گجه لر
.
غریبیدن چتینی یوخ مگر اسیر غمی
ئورک سوزون دئمگه تاپماز آشنا گجه لر
.
اسیره بیر قز اوشاقی یتیم اولا نه چکر
دیزین قوجاقه آلار آغلیار قرا گجه لر
.
یوخی گلنده ائدر تکیه کنج دیواره
یوزونده اشکی اولار شبنمه نما گجه لر
.
ائدنده زلفینی یل شانه دیسگینر اویانار
الین آتار باشینا ایلیر دعا گجه لر
.
اشاره بسدی قلم یاز مدار عشقیمدن
غمینده هی گلوری باشیمه هوا گجه لر
.
رقیه دور نظریم گللرین گلابی اولان
قضا بگندی الین قوینونا قویا گجه لر
.
مرید عشق عجبا بیرگجه مراده چاتوب
خرابه دن اوجالوب صوت ربنا گجه لر
.
یارالی باشه باخوب طشتیدن آلوب قوجاقا
بو باش دئدی وئره جک بو یره صفا گجه لر
.
یارالی باش یاراشور ایندی یاره لی سینمه
ایکی یارا اولا تا بیربیره دوا گجه لر
.
قوجاقدا یاره لی باش قاره گوزلری آخونوب
قوتاردی غم یازیسی دینجلوب بالا گجه لر
.
یاتانلاری اویادوب سسلنوب خانم زینب
رقیم ئولدی دورون باشلیاق عزا گجه لر
.
بوخسته دل بالامون ملک عدنه وار سفری
روادی خوش باخیشی زینب اوخشیا گجه لر
.
بو طفلیدن الووی اوزمه (نادرا) که یقین
خرابه دن تاپیلار گنج پر بها گجه لر
.
.
#حضرت_رقیه_شهادت
#غمیله_الفت_ائدر_عشقه_مبتلا_گجه_لر
#ترکی #حضرت_رقیه #نادربابایی
#زبدةالاشعار