جریان مجلس ابن زیاد و حالات عبداله عفیف
.
#زبدةالاشعار
.
: @nohe_torki
.
مرحوم انور اردبیلی
.
فخر آدم شرف عترت خاتم زینب
لاله گلشن پژمرده ماتم زینب
.
حلقه معرفت و عفته ارزنده نگین
فی المثل یا او نگینه اوزی خاتم زینب
.
نجبا عمّه سی آزاده زنان سیده سی
آناسی فاطمه تک شهرۀ عالم زینب
.
آناسندا اولان اوصاف قزیندا واریدی
زینبه هم دیرم فاطمه من هم زینب
.
او خدیجه قزى بو فاطمه نون اوز قزیدی
صدف برتره گوهردی مسلم زینب
.
اللى بش ایل یاشیوب اللى ایلین زجر چکوب
آتشین دمله اولوب گرم دمادم زینب
.
گیجه گوندوز آلشوب یاندی حوادث اودونا
ایتمدی شمع کیمی قامتنی خم زینب
.
قدرت صبرینی یازماقه کیمون قدرتی وار
بلن اولماز نه چکوب ماه محرم زینب
.
گوره بلمز بشریت بیله شایسته خانم
صف ایثارده گورسندی مقدم زینب
.
درک ایدوب فوج اسیرانه اوزون سرکرده
یورولان لشکرینی ایتدی منظم زینب
.
هم حسینون ایشنی گوردی هم عباسین ایشین
ایتدی مسئولیت احساس مکرّم زینب
.
بلدی ایستور شهدا قاننی دشمن باتورا
انتقامه اوزینی ایتدی مصمم زینب
.
قویدى مقتلدہ حسینون بدنین کوینکسیز
قویمادی یاروه قارداش دیدی مرهم زینب
.
ایش بیله دوشدی خداحافظون اولسون یارالی
اشکنی گلشنوه ایتمه دی شبنم زینب
.
آغلارام دردوه یولدا دوه آتدوقجا قدم
شعلۀ غمده گرکدور یانا کم کم زینب
.
ای صفا مروه منا اوغلی یات عریان نینک
ایدر هر بیر گوزونی چشمۀ زمزم زینب
.
چوخ آغیردور سفریم آند اولا اکبر جاننا
یوخدی عباس اولوب صاحب پرچم زینب
.
متوسّلدی باجون قلبدن اصغر قاننا
دل تمنّاسین ایده کاش فراهم زینب
.
کوفه ده مطلبی روشن ایلسم دینجلم
قویا هیهات بو جریانلاری مبهم زینب
.
قلبده سونمز اودی والی خونخواره اگر
سوزیله تو دهنی ویرماسا محکم زینب
.
.
دیدی هر سوز عمل ایتدی او پریشان گیسو
بزمره ابن زیادیله اولوب رویارو
.
.
خامیدی والی غلط فکرت و پندار ایتدی
اسرایه نظر اول مردک بی عار ایتدی
.
تانیدی زینبی اما تانموردی ایکاش
نچه جمله سوز او مظلومیه اظهار ایتدی
.
هر کس اوز فهمنه اوز درکینه لایق دانشار
یازمارام آیدین او ناجنس نه اقرار ایتدی
.
ولی بیر جمله سوزی زینبی چوخ یاندیردی
او سوزی یازدی قلم محنته معیار ایتدی
.
قارداشون ئولدی دیدی درد دلیم تاپدی شفا
خانمی دیل یاراسی صحبته وادار ایتدی
.
ئولمیوب ئولمز حسین معرفتون یوخدی دیدی
ساکت اول طعنه لی سوز قلبمه آزار ایتدی
.
قارداشیم حق دانشوب چاتدی لقاءاللّهه
قارداشیم میل حرم خانۀ دلدار ایتدی
.
قارداشیم قویمادی مرآت حقه لکّه دوشه
آیت لم یزلی چهره نمودار ایتدی
.
من سخنگوی حسین سن طلقا نوکری سن
گور فلک کیمله کیمی وارد گفتار ایتدی
.
یابن مرجانه یزیدون نه فضیلت واریدی
کرسی سلطنتی قبضه او خونخوار ایتدی
.
جدّى حرب ابن اُمیّه ازل ایمان گتدی
صورا اللهی دانوب وحی ده انکار ایتدی
.
سرِ مردمدن اگر سایۀ سرنیزه گیده
اوندا معلوم اولی کیم دینیله رفتار ایتدی
.
خفقان حاکم اولوبدور دانشانمور ملت
افق دینی یزیدون عملی تار ایتدی
.
من نه سر نیزه نه شمشیری حسابه قویورام
گرچه باشیم یاراسی صحبتی دشوار ایتدی
.
لذت عشق شهادتله سلاح ایمان
سیزی فرّار بیزی جنگده کرّار ایتدی
.
هانسی نامردیدی فاش ایله گوروم چکدی قوشون
کربلانون چولنی صحنۀ کشتار ایتدی
.
کیمدی نعش شهدا اوستونه آت سالدیردی
نعل و میخه گل زهرانی گرفتار ایتدی
.
بی حیا پارچالیوبسان جگر طاهانی
یاخاسین چاک بابام احمد مختار ایتدی
.
هامی بلسین بو سوزی دوشسون آغزدان آغزا
قارداشیم عدله گوره ظلمله پیکار ایتدی
.
واژۀ واهمه مردودیدی فرهنگمده
شکر او اللهه منی حقه طرفدار ایتدی
.
.
زینت دوش نبی عترتنی خانه بدوش
گزدیرورسن هله بازاریدہ مین محنته توش
.
.
زینبون سوزلری سندیردی او بی وجدانی
ظهره چکدی جلسه مجلس اولوب طولانی
.
مسجدی قصد ایلدی حاکم جبار و دنی
ویردی دستور اسرانی ایده لر زندانی
.
گلدی محرابه اوزین ایلدی قائم بصلات
دوتدی شیطان اوزینه منظرۀ روحانی
.
دشمن کعبه دوروب کعبیه دوندیردی یوزین
ضد قرآن عجبا ذکر ایلدی قرآنی
.
مجلسینده قوناقین لبلرینی پارچالیان
راکع وساجد اولوب حمد ایلدی یزدانی
.
نه نمازیدی قیلوردی گوره سن ابن زیاد
نه امامتدی ایدوردی او کثیف و جانی
.
قورتاروب سجده لری ایلدی منبرده جلوس
شرح ایدوب مردمه قلبنده اولان جریانی
.
کی جماعت سیزه بیر مژدۂ اعظم ویرورم
حق گرامی ایلیوب نسل ابوسفیانی
.
یاغی اولموشدی یزیده خبروز واردی حسین
گورموسوز مفتی دین صادر ایدن فرمانی
.
کسدیریدوم باشنی واجبیدی کسدیردیم
کسلور هر باشون اولسا هدف عصیانی
.
مسجد أهلنده زیاد اوغلی یاراتدی وحشت
سینه لرده نفس آز قالدی اولا زندانی
.
کیشی ایستور ایله موقعده دوروب حق دانشا
نفی ایده حاکم خونخوار دیین جریانی
.
حق سسی بیر کیشینون قوزانوب حلقومندن
جاننون قیمتنه رد ایلدی بهتانی
.
آدی عبدلله عفیف اوغلی نژادی اَزُدی
ایکی گوزدن ده چوخ ایستوردی علی مولانی
.
بیر گوزون عرصۀ صفّینده ایتمیشدی فدا
بیر گوزون جنگ جملده او شرافت کانی
.
مسجده طنطنه سالدی اوجالان فریادی
دیدی ختم ایله زیاد اوغلی یالان دستانی
.
او حسین که سن اهانت ایلدون منبرده
بو ذلیل جان اولا ایکاش اونون قربانی
.
بی شرافت نیه تهمت وروسان معصومه
مطلقا لکه گتورمز آقامون دامانی
.
جدینون منبری اوسته نوه سین سب ایلمه
دینه خاطر آخوب آزاده حسینون قانی
.
اگر الآن قورولا محکمه دوز داور اولا
سنی ظالم تانیار معدلتون دیوانی
.
.
نُجبا طایفه سین گزدیروسن بی پرده
سینوه سنگ تدیّن وروسان منبرده
.
.
پیر روشندل و روشن هدفین اخطاری
نظر خلقده خوار ایلدی استانداری
.
ویردی دستور کسون باشنی عبداللهین
یتورون کیفرینه عُنصر بدکرداری
.
قان توکنلر چالشوب دوتسون حسین عاشقنی
ایله سونلر یره القاننی قهراً جاری
.
اَزُدی طایفه سندن واریدی مسجده
هاموسی دوردی عفیف أوغلونا ایتدی یاری
.
صاف و سالم یتورویلر اونی اوز منزلنه
آز زمان کچدی او پیرین پوزولوب پرگاری
.
کوفه جلاد لری حمله ور اولدی ایوینه
دور ایدوبدور خطر اول شاهد شیرین کاری
.
یا حسین سسلدی آلدى الینه شمشیرین
شیر تک صحنه دوشوب ایتدی شروع پیکاری
.
دشمنی گوز گورر امّا ایکی گوز نابینا
دولانوردی اوزی اوز دوره سینه تکراری
.
خورداجا بیر قزی واریدی فقط منزلده
گتوروردی سسه فریادی در و دیواری
.
دشمن هر سمتدن ایستوردی که ورسون آتاسین
خطره حالی ایدوردی بالانون گفتاری
.
ایتدیلر چار طرفدن اونا غیظیله هجوم
مردی یخدی یره نامردلرین رفتاری
.
بدنی پارچالانوب دوشدی الیندن قلجی
اولمادی قدرتی دورسون ایاق اوسته باری
.
قزینا لحظۀ آخرده یتوردی بو سوزی
دلخوش اول یتمیش اوچ اولدی شهدا آماری
.
بالا باخدی آتانون باشی بدندن گتدی
دلبرین صحنه دوشوبدور یارالی دلداری
.
گلدی باشسیز بدنون اوسته باشین آچدی او قز
بویادی قانه تلین باخدی سمایه ساری
دیدی الله ائله نابود عبیداللهی
منی ده ایتدی حسین قزلارینون اوخشاری
.
آغلارام تا نفسیم واردی بو باشسیز بدنه
سکۀ اشکمیله گرم اولی غم بازاری
.
آتام ئولدی نجه الله بو گیجه تک قالام
گوز تحمّل ایلمور منظره دشواری
.
صحن ده قالدی بدن دفنه هله یوخدی گلن
راضی اولما قالا یرده بدنی خونباری
.
گلسه همسایه لر امداده دارخماز قلبیم
گون گیدوب مغربنه چاره سیزم ای تاری
.
.
#کوفه
#مجلس_ابن_زیاد_انور_اردبیلی
#فخر_آدم_شرف_عترت_خاتم_زینب
#آخرین_یادگار_انور
.
#زبدةالاشعار
.
: @nohe_torki
نظر دهید