قلم باشلور عشقین حکایتلریندن #زینبیه_عینی_فرد

پند و نصیحت به گرفتاران ماهواره
و گریز به شهادت قهرمان کربلا حضرت زینب (س)
.
.
عینی فرد زنجانی
.
قلم باشلور عشقین حکایتلریندن
حقیقی مجازی روایتلریندن
.
همیشه گرک شکر ایدم کردگاره
که خلقی غنی ایتدی نعمت لریندن
.
عدمدن وجوده بو انسانی گتدی
قویوب اختیارینده ثروت لریندن
.
یری بستر ایتدی که راحت دولانسین
بشر، کوه و دشتی فراغت لریندن
.
سمایه طرف قوزاسا باشین آدم
گورر آسمانین جلالت لریندن
.
گوزی ایشلدو قجا گورر سقف آبی
یغوب سینیه ماه طلعت لریندن
.
گویون ارزشی یردن آرتقدی انسان
اشاره ایدوم بعضی زینت لریندن
.
گون اوردان سالور تپراقین أؤسته نورین
گزور اوردا آی اولدوز آیت لریندن
.
او چشمک وران اولدوزون پندی واردور
ویرور گوز کواکب اشارت لریندن
.
که یعنی یرین مسکنین بوردادور گل
ال اوز بو جهانین مشقت لریندن
.
دعا ایلینلر باخار آسمانه
ملک لر یازار استغاثت لریندن
.
بو یدّى طبق آسمان سندن اؤتری
بزنمش قبول ایت ضیافت لریندن
.
بش اون گون بو دنیاده هشیار اول انسان
رقابت لریندن رفاقت لریندن
.
یوزه چخموری عمر لر بو زماندا
اولوب خسته انسان جهالت لریندن
.
حیا گیتسه هر یرده اوردان گیدر دین
حیاسیز لارین وای جسارت لریندن
.
اولوب گوزگوزه زندگی یاده دوشمور
جهان بقانین قضاوت لریندن
.
ئولوم دعوت حقدى سوز یوخ، ولاكن
بلردی بشر بعض علامت لریندن

مسلمان گورن وقتده اللى ایل عمر
شروع ایلیردی وصیت لریندن
.
مواظب اولاردی ئولوم گلسه بیرگون
مبادا اولا قرضی ثروت لریندن
.
دلیندن الیندن مواظب اولاردی
ایدردی رضا خلقی رأفت لریندن
.
جوانلاری قویمور قوجالسین خیالات
امان شرق و غربین خیانت لریندن
.
مواد مُخدّر تصادف آلور جان
قالوب عزرائیل مات رحلت لریندن
.
روایتده وار گر زنا اولسا رائج
گلر قهره خالق او جرأت لریندن
.
آلیر زلزله ،سیل جان چوخلارینان
یانار خشک و تر باهم هیبت لریندن
.
سیزه موعظه ایتمورم ای جوانلار
سیزی چوخلار اینجیتدی صحبت لریندن
.
بیر عده ویرور وعده اما عمل یوخ
مدیریّتندن وکالت لریندن
.
اویانناندا دین اوغروسی ماهواره
اولوب آزدیرور خلقی فطرت لریندن
.
دیمه اختراعاته بدبین اولوبدی
بو شاعر یازور هی خرافت لریندن
.
پیمبر بویوردی که الحقُّ مُرٌّ
آجی حق سوزون وار صداقت لریندن
.
او سیماده یوز منفعت اولسا امّا
بیریسی خطا؟ بسدی نیّت لریندن
.
قبول ایلیون شیعه لر ای جوانلار
او ماهواره نین قاچ خیانت لریندن
.
اولار که دگل معتقد کردگاره
سوزوم یوخ اولارین رذالت لریندن
.
لَكُمْ دینُكُم واردی قرآنمزدا
بودور ختم مرسل عدالت لریندن
.
مسلمانه وار نهی از منکر حکمی
بلر امر معروفی غیرت لریندن
.
بشر اشتباه ایلر هیچ عیبی یوخدی
گل الله باغشلار جهالت لریندن
.
آچقدور عزیزیم کرم بارگاهی
ایدون استفاده سخاوت لریندن
.
اولوب زینبیه پَنَه گاه مردم
نتیجه آلوبلار ارادت لریندن
.
نه اندازه غفلت؟ نه اندازه عصیان
داخی ال گوتور بسدی غفلت لریندن
.
گلون عرض ایداخ دردیمیز واردی زینب
بیزی سرفراز ایله رأفت لریندن
.
وجودینده بو آدمین سرّلر وار
بیری عقل دور حق کرامت لریندن
.
ویروبدور بیان منشأ ارتباطات
ایدر فایده یاخچی صحبت لریندن
.
ویروب نفسی انسانه بیر امتحاندور
سال عقلون ایشه استعانت لریندن
.
بو عقلیله نفسین کنارینده وار عشق
مواظب اول عشقون شرارت لریندن
.
بو عشقین کنارینده گر عقل اولسا
اولار جلوه گر یاخچی سیرت لریندن
.
ولی عشق بی عقل ایدر پرت چاهه
سالار آدمی اوج رفعت لریندن
.
بیری عشق ایدور ایلسین خلقی رسوا
ویرور آبرومنده تهمت لریندن
.
بیری عشق ایدور پول نزوله ویرنده
لجن زار ایدور خلقی سیرت لریندن
.
بیری عشق ایدور حقی کتمان ایدنده
موفق اولانماز او فکرت لریندن
.
بیری عشق ایدور گشت و کشتار ایدنده
بیری عشق ایدور زور و قدرت لریندن
.
بولار عشق اولانماز مقدسدور عاشق
بولار ظلمدور بی نهایت لریندن
.
بیری عشق ایدور خالقه بنده اولسون
ملک غبطه ایتسون عبادت لریندن
.
بیری عشق ایدور مردمه خدمت ایتسون
که سالسون اله حق رضایت لریندن
.
بیری عشق ایدور عاشق اولسون حسینه
دوشونسون او شاهون رشادت لریندن
.
نماز عشقدندور حجاب عشقدندی
حیا عشقدندی حلاوت لریندن
.
خدایا جوانلاره طوی قسمت ایله
که اولسونلا حافظ شریعت لریندن
.
گلون زینبه آغلیاق ایندی باهم
سالاخ یاده ایثار و محنت لریندن
.
او زینب که دین اوسته دوشدی بلایه
حسینون اولوب یار نهضت لریندن
.
مقامه باخون اولدی سِرُّ أبیها
کفایتدی بو رتبه رتبت لریندن
.
عُبُودِیّتی خالقه اولدی ممتاز
خلوص عملدور بیر عادت لریندن
.
رضای خداوندیدن اُترى زینب
اولوبدور حسینون شراکت لریندن
.
كه أمُّ المصائب لقب ویردى تاریخ
قبول ایلیوب غصّه قسمت لریندن
.
او زینب که قیلدی نماز شبنده
سالوب مریمی بهته طاعت لریندن
.
حسین جان ویروب نیزیه گچدی باشی
اوجاتسون مسلمان باش عزّت لریندن
.
خانم زینبون قوللاری باغلانوبدی
آچلسون بشر شرک اسارت لریندن
.
اولار که خانم زینبه نوکر اولدی
عمل ایتدی قرآنه غیرت لریندن
.
قراسین گینلر عزاسین دوتانلار
سیزه شرح ایدوم آغلا محنت لریندن
.
خانم زینبون باشنه قمچی دگدی
مواظب زنان اولسون عفت لریندن
.
یزیدین پوزوب شامیده اقتدارین
ایدوب انتقادین حکومت لریندن
.
رقیه قوناقى ئولور ای جوانلار
اونون داغ داش آغلوردی غربت لریندن
.
الی سینه سینده دیور وای حسین وای
سالور یادینه رنج و محنت لریندن
.
مجسّم ایدور گوز قباقینده شمرین
جسارت لریندن عداوت لریندن
.
گورور شمر ایاخلور چخور سینه سینه
حسینون اوتانمور او ساعت لریندن
.
کسنمور بوغازین سالوبدور ئوز اوسته
کسور باشینی دالدان عادت لریندن
.
اوتوز مین قوشوندا مسلمان تاپلمور
دفاع ایلسونلر امامت لریندن
.
دیدی دورموسان چوخ اوجا یرده ظالم
کیمه گورسدورسن لئامت لریندن
.
اوتان دوش یره عرشی تیترتمه قاتل
آخور قان گورورسن جراحت لریندن
.
گورورسن حسینیم كمكسیزدی الان
ادامه ویرورسن اهانت لریندن
.
ئولون اى ابوالفضل الیندن قاچانلار
که قورخورسوز الاندا صولت لریندن
.
گهی کربلایه باخور سسلنور گل
حسین فیض آلوم توشه صحبت لریندن
.
باجون جان ویرور بیر نفر یوخ یانندا
اونا شرح قیلسون وصیت لریندن
.
الیمدن گیدوبدور توانیم برادر
گل آل گوگلومی مهر و رأفت لریندن
.
قیامون تكان ویردی حکّام جوره
جهان شاهد اولدی قیامت لریندن
.
منه تاپشوروب گیتدون اهل و عیالون
مواظب اولام تا امانت لریندن
.
دیمورسن ندن زینبی تز قوجالدی
امان شامیانون شماتت لریندن
.
رقیه ئولن وقته ئولدوم دیریلدیم
یانور قلبیم الاندا حسرت لریندن
.
توکولسه اگر گوز یاشیم سینم اوسته
سونر شمع دردیم حرارت لریندن
.
آغاردی ساچیم من آنامی تاپونجا
آلور کام زینب لقایت لریندن
.
گویرمش بیلکدن من اؤپدوم یرین بوش
آنام آلنمی ئوپدی دقّت لریندن
.
بقیعدن گلن لر گلوب هارداسان بس؟
دارخدی ئورک غملی فرقت لریندن
.
بالا یاره سیندن آنا توخدار اؤپسه
آنامون پای آلدوم طبابت لریندن
.
توکولدی گوزوندن یاشی سینم اؤسته
دوشوب نار دردیم حرارت لریندن
.
خیال ایلورم بش یاشیندا قزام من
چکور باشیمه ال محبّت لریندن
.
گنه گوگلی ایستور حسین «عینی فردین»
او ششگوشه قبرین زیارت لریندن
.
نه تنها اوزی مکتب الزّینبینده
گله باهم اعضای هیئت لریندن
.
.
#زینبیه #عینی_فرد #پندیات #زینبیه_شهادت #ترکی #زبدةالاشعار