ماهِ تابانِ سپهرِ اِتِّقا عباسدور #عباسیه_هدایت_تبریزی

در احوالات حضرت اباالفضل علیه السلام
.
زبدة الاشعار

?: @nohe_torki
.
محمد هدایتی تبریزی
.
ماهِ تابانِ سپهرِ اِتِّقا عباسدور
ساقیِ عشق و وفا، بی ادعا عباسدور
.
.
چارم شعبان او مه صورت گوز آچدی عالمه
آدینی شیر خدا ایتدی قولاقه زمزمه
گوز گوزه باخدی حسین عباسه ، ویردی دم دمه
سیر ایدوب لایق اوان قارداشلقا عباسدور
.
.
بیله بیر اهل وفانی گورمیوبدور روزگار
معتبر ایتدی وفانون لفظنی بو نامدار
تا جهان واردی وفانون کلمه سی عنوان اولار
عالم ایلر اعتراف عین وفا عباسدور
.
.
درس عشقی مرتضانون دامنینده مشق آلوب
عشقی سیر ایلوب علینون سیرتینده عشق آلوب
مشق عشقه مرتضانون عشقنی سرمشق آلوب
مرتضی سیرت ، حسن صورت، آقا عباسدور
.
.
اوچ امامون محضرینده فقهده استاد اولوب
شاد ایدنده اهل بیتین قلبنی دلشاد اولوب
رادمرد عالم اوغلی سربلند و راد اولوب
مرد جود و بخشش و اهل سخا عباسدور
.
.
مه جمالی انجم و خورشید و مه دن باج آلان
قامت موزونی خلقی واله و حیران قویان
سینه سینده عبد صالح کلمه سی زیبا نشان
سالک معنا و عبد پارسا عباسدور
.
.
عبد صالح رتبه سی باشنده تاج افتخار
ساقی مستان عالم می فروش و کامکار
سالک سیر الالله حق شناس و بردبار
کعبهء عشقه ایدن سعی و صفا عباسدور
.
.
کعبهء عشقین ایدن مین شوق و ذوقیله طواف
قائم الیل و تقی و زاهد ، اهل اعتکاف
زاکی و پاک و سلیم و رادمرد و سینه صاف
ایلین شیر خدایه اقتدا عباسدور
.
.
عارف کامل مطیع پیر عرفان مصطفی
رهرو دین ، فعل و رفتارینده ثانی مرتضی
مخزن علم و ادب ، لایق وزیر مجتبی
حکمتیله آشنا علم آشنا عباسدور
.
.
معرفت گنجینه سینده در ناب و بی بدیل
عرصه گاه عشق و ایمان و یقینده بی عدیل
ساقی و سرلشگر جان بر کف آل خلیل
حال دنیایه اولان بی اعتنا عباسدور
.
.
لشگر مهر و وفائیله قلوبی فتح ایدن
گل وجودی زینت هر محفل و هر انجمن
لعل مستین ترپدنده پخش ایدن در سخن
ایدمش اول کس که سخن حقین ادا عباسدور
.
.
سالک حق ، حق یولوندا حق دیوب جاندان گیچن
پر تلاطم بحرده امواج و طوفاندان گیچن
جسمنین زخم سیوف و تیری میزاندان گیچن
باشی غوغایه دوشن باشدا یارا عباسدور
.
.
دولدوروبدور جسمنی نیزه ، قلج ، داش یاره سی
مرتضانون یاره سیندن کاری دور باش یاره سی
مرحم و درمان قبول ایلیدی ایکاش یاره سی
یاره درمان سیز ئوزی درده دوا عباسدور
.
.
اللری گیتجاخ توکولدی درد عالم قلبینه
بیر اوجا داغ تک دومان چوکدی دمادم قلبینه
تشنه قزلار فکرین ایتدی اگلشوب غم قلبینه
تشنه لردن چوخ ئوزی عطشان اولا عباسدور
.
.
طاقتی قالموب آچا سقای خوبان گوزلرین
یاره لی باشدان سوزوبدور دولدوروب قان گوزلرین
اولمادی ال پاک ایده فی الفوری قاندان گوزلرین
باشنه گلدی او کی هر بیر بلا عباسدور
.
.
باشنی ایتمیش سپر تیغه آتوب باش فکرینی
گچسه باشدان کیم گتورمز یاده گوز قاش فکرینی
باش چخوب یاددان آتانمور لیک قارداش فکرینی
فکر و ذکری وا اخا ، وا غربتا عباسدور
.
.
من ننوعی شرح ایدیم آتدان نجه گلدی یره
اولمادی ال پیکرینده اللره تکیه ویره
گلدی یوز اوسته نظام جسمی دگدی بیر بیره
ال یرینده تکیه ایلن اوخلارا عباسدور
.
.
عشق عباسیله آزدور هر قدر وورسام قلم
یوخ قلمده قدرت ایدسین حال عباسی رقم
گوز یاشین خوشدور بو محنتده مرکب ایلسم
یازسا کپریک محنتی بی انتها عباسدور
.
.
ای (هدایت) روز میلاد ابوالفضل رشید
دامنیندن دوت بو مولا سائل ایتمز نا امید
روسیه لر گلدی بو درگهده اولدی رو سفید
ایسته ، بذل ایلر یقین ، صاحب عطا عباسدور
.
.
#عباسیه_مدح
#عباسیه_شهادت
#ماه_تابان_سپهر_اتقا_عباسدور
#هدایت_تبریزی
#ترکی
.
#زبدةالاشعار

?: @nohe_torki