راجع به شهادت حضرت علی اکبر و حضرت قاسم (ع)
.
#زبدةالاشعار
.
: @nohe_torki
.
مرحوم یحیوی اردبیلی
.
مدینه دن ائلیوب کوچ کاروان بلا
قطاریلر دوزولوب با صدای زنگ و درا
.
قباقدا تخت روان زینبه اولوبدی مقام
کجاوه لرده دوتوب آل طاهرات آرام
.
بو کاروان بلانون آلوبلا دور و برین
سالوب ارایه جوانان هاشمی چو نگین
.
خلیل حق بو بساط غمی هارا آپارور
کمال شوقیله معبودینه فدا آپارور
.
حسین گتوردی بلا دشتینه هدیه ی سر
یانیندا قارداشی عباس قاسم و اکبر
.
گتوردیلر او خانملاردا تحفه رسم سفر
حسین مناسینه زلف سیاه آغ معجر
.
بلا چولینده بلا فوجی برقرار اولدی
او تحفه لر نئجه گور بیر به بیر نثار اولدی
.
محرمون اونی یعنی که روز عاشورا
علی و اکبری آتدان یخوب یئره أعدا
.
عبایه قویدی اونون نعشینی امام زمان
انوبدی تلیدن اخیامه واعلی گویان
.
حرمسرانی ائدوب بانگ وای اوغول وای هدف
حرم تلاطمه گلدی توکولدی تله طرف
.
ائشیدجکین بالا قزلار ایاق یالین چیخدی
او قدری سرعتیله قاچدی بیر بیرین یخدی
.
سوواشدی گوز یاشی گیسولره گوگردی چمن
خیام و تل آراسی اولدی مثل بیر خرمن
.
چیخاندا خیمه دن افشانیدی قرا مولر
جنازیه یتیشنده آغاردی گیسولر
.
قاچا قاچا هامی آغ معجرین اله آلدى
یتیشجکین آتوب آغ معجری قرا سالدى
.
تعجبم نیه بس چیخمادی خانم لیلا
اوغول قباقینه پیشوازه گئتمدی آیا
.
دییرله ساخلادی سلطان کربلایه ادب
حسیندن ائتدی حیا دست پرور زینب
.
منیم عقیده مه چادرده بهت آپارمیشدی
على جداله گئدنده باشی آغارمیشدی
.
وجودی باشدان ایاقه قرایه باتمیشدی
ووروب الیله سر و صورتین قراتمیشدی
.
او وقت اولوب او جوان نعشی گلدی خیمه لره
قباقدا قاچدی بیری گئتدی لیلیه خبره
.
نه گوردی یئرده دوشوب حالیدن گئدوب لیلا
میان خیمه ده چوخ سخت غش أئدوب لیلا
.
قیتدی سرعتیله چیخدی خیمه دن او زمان
اوزین یتوردی حرم مجلسینه ضجّه زنان
.
آماندی چاره ائدون بیلمورم نولوب لیلا
بئله گمان ایلدیم خیمه ده ئولوب لیلا
.
نئچه نفر حرم اهلیندن آیریلوب گلدی
نه گوردیلر که دگیل خیمه مثل مغسلدی
.
یوز اوسته گوشه ی چادرده با دل مجروح
یئره یخیلمیش او بانو چو قالب بی روح
.
خانم گوزون آچ او یان یار و یاورون گلدی
دو(ر) چیخ قباقینه میداندان اکبرون گلدی
.
جواب ائشیتمه دیلر ائتدیلر به قدری صدا
قولونی اؤودیلا هیچ هوشه گلمدی لیلا
.
سپیلدی سو باشینا هر چه گوز یاشی یوزینه
وجودینه حرکت گلمدی ایشیق گوزینه
.
اونی آیتماقا لازم دگیلدی عنبر و عود
گتوردی هوشه اونی قلبیدن چیخان بیر دود
.
گیروبله قولتوقینا بأغرى قان اولان آنانون
ایتی قلجلارینان اوغلى دوغوانان آنانون
.
چیخارتدیلر چوله تا خیمه دن او نالانی
اوجا سسیله گلوب نطقه بس بالام هانی
.
عبانی گوردی اولوب غرق خون احمرده
دوباره گلدی یئره نقش باغلادی یئرده
.
ائشیتدیلر دیور آهسته وای جوانیم وای
دولان آلا گوزینه لخته قان جوانیم وای
.
او ساچلاری که آغارتمیشدی ماتم اکبر
مدینیه اولاری آغ آپارمادی ننه لر
.
او گیر داریده بیر طوی بناسی قویدی فلک
او آغ هوروکلره داماد حناسی قویدی فک
.
عروس قلبینی بو قصّه قانه دوندردی
حسین قاسمینی قتلگاهه گوندردی
.
تعجبم نیه لیلا أوزونی ئولدوردی
او که گوزیله بالانون جنازه سین گوردی
.
سریه نیلدی بس قاسمون فراقینده
سسین ائشیتدی اونون آتلارون ایاقینده
.
او دور که تازه گلین باشینه قرا سالدى
سیزون طویوز دیدی یوم قیامته قالدی
.
غرض بونی بیلوسن طوی نئجه تمام اولدی
اوگون به نوعی غروب ائتدی وقت شام اولدی
.
قرا گئجه کئچوب اولدی دوباره روز سیاه
چکیلدی قتلگهه عترت خلیل الله
.
خلیل أوزی یوزی اوسته دوشوب مناسینه
ساتاشماسون گوزی دامادینون لباسینه
.
طوافدن قوتاروب دختر امیر عرب
خانملاریلا گلوب قاسمی گوره زینب
.
قبیله رسمی ایلن حجله گاهه باخسونلار
اله ایاقه باشا طوى حناسی یاخسونلار
.
اوپرله رسمیدی دامادون ال ایاقیندن
أوغول آناسی اوپر اوغلینون دوداقیندن
.
سلامتیدی مگر ال ایاقدان اوپسونلر؟
دوداقی سالمیدی یا دوداقدان اوپسونلر؟
.
او جسم پاکده بیر ذره بوسه گه یوخودی
ایاق یئریدی قلج یاره سیدی یا اوخودی
.
سپوبله گوز یاشینی نقل مرحبا یئرینه
یاخوبلا ساچلارا قانین اونون حنا یئرینه
.
بو طوی نشانینی آغ زلفلرده وامحنات
آپاردیلار او قانی اهل یثربه سوقات
.
هوروکلری که آچیلمیشدی نعشیلر أوسته
او قانللری که یاخیلمیشدی زلفلر اوسته
.
او طره که اونا وورموشدی شانه بارماقلار
توکین داغیتمیشدی تپراق اوسته دیرناقلار
.
داخی هورولمدی عمرینده هئچ گیسولر
داخی دارانمادی دنیاده طرّه ی مولر
.
حنا یاخیلمادی اول خون اکبر اوستیندن
حنای قاسم و داماد نوبر اوستیندن
.
نقدری عمر ایلدی گُلمدی بنی هاشم
أوطاقلارون توزونی سیلمدی بنی هاشم
.
بلی بودور فلک کجمدارون اطواری
جهاندا غم زده ایلر گروه اخیاری
.
گوروم خراب أولاسان ای سپهر کج رفتار
کیمی گور ایلموسن شادمان و کیملری خوار
.
یازار بو نوحه لری «یحیوی» ائدر دفتر
حسیندن ایکی دنیاده خوش معاش ایستر
.
#اکبریه_شهادت
#قاسمیه_شهادت
#مدینه_دن_ائلیوب_کوچ_کاروان_بلا
#اسرار_عاشورا
#ترکی
.
#زبدةالاشعار
.
: @nohe_torki
نظر دهید