مراد عالم ایجادیدن محبتدور #غدیریه_صافی_تبریزی

غدیرخم
گریز به شجاعت حضرت اباالفضل (ع)
.
.
.
.
مرحوم صافی تبریزی
.
مراد عالم ایجادیدن محبّتدور
بو کون خلقتی بیر حُبّدن عبارتدور
.
خدای خلق او گیزلین خزینۀ مصداق
سؤوب تانیماقنی اولدی عالمه خلّاق
.
بو خلق عالم خلقتده جمله یکساندور
یهود و گبر و مسیحیدی یا مسلماندور
.
سؤوب یاراتدی بو مخلوقه جسم و جان ویردی
هدایتیله ضلالت یولین نشان ویردی
.
محبّین ایلدی خلقه آیت ایمان
نجه که کفره ضلالتدن اولدی بُغض نشان
.
تمام خلقه محبّت گوزیله ایتدی نگاه
قویوب محمّد و محمود آدین حبیب الله
.
ولی محّبته بو خلق ایچون مراتب وار
همامی مراتبه دار فناده صاحب وار
.
بیری محبّت مال و منال دنیا دور
مراتبین هاموسندان مقامی سفلادور
.
ایکیمجی مرتبه اولموش محبّت اولاد
قویاندا بیر یره اوّلدہ کی اولونماز یاد
.
اوچومجی مرتبه هر نفسون اؤز محبّتی دور
حیاته باغلادوقی بیر علاقه آیتی دور
.
محبّت اللّهه مرکز قلوب دور مطلق
او دور که قلب لره چوخ توجّه ایلر حق
.
شکسته قلبلرین نسبتین وئروب اوزینه
اورک گوزیله نظر ایله سنده حق سوزینه
.
خیال ایلمه سن بو سوزی حدیثی دور
کنایه ایله قبول ایت حدیث قدسی دور
.
خدا دیوب منه نه یر ویرور نه گوگ وسعت
مگر او دل ویروله عبد مؤمنه نسبت
.
اگر چه اوّل بو کعبه آبیله گِل دور
خدای عالمیانه بو کعبه منزل دور
.
او دور که شیعیه اوز قلبی دور زیارتگاه
حسین قبریدی چون فی قلوب من والاه
.
گوگلده اولسا اگر بو محبت آثاری
تمام غیری آتار آختارور تاپار یاری
.
.
تاپان بو مرتبه نی اوّل اولدی نفس رسول
دالنجه گیتدی علی و حسن حسین و بتول
.
.
حسین که اوّل انوار تسعه صاحب دور
او صلبدن گلن انوار حقّه طالب دور
.
امام دور هاموسی باب فیض و رحمت دور
نجوم لامعۀ آسمان عسرت دور
.
بولار که عین خداونده نور عین ساییلور
بولار اولاردی که ذریّۀ حسین ساپیلور
.
مقام حبّه بو اوندورد وجود اولوب نایل
دگل بو رتبیه بیر نفس محترم قابل
.
او کیمدی خلق اولونوب بو جلال و شوکتده
بولار کیمی هانی اَقرب او قُرب وحدتده
.
اودور که اشرف مخلوق و صادر أوّل
رسول عالمیان نور وحدته مشعل
.
غدیر خمّ ده تا یتدی پیک ربّ جلیل
گتوردی آیۀ بلّغ جناب جبرائیل
.
دوه جهازلریندن قویولدی بیر منبر
صعود ایلدی اوُل منبر اوسته پیغمبر
.
فصیح لحنیله بیر خطبه ایلدی انشاد
قیلوب او خطبه ده اوّل خدای عالمی باد
.
که هر نه گلسه خیاله او چولده کثرتیدی
تمام ملّت اسلام و آدی امّتیدی
.
سکوت تام تمامیله اولدیلار سامع
فضای دشت اولوب بیرجه مسجد جامع
.
دوتوب علی کمریندن او بی نظیر و بشیر
او قدر قوزادی گوردی هامی او جمع کثیر
.
اوجاتدی ایله ال اوسته او نور لم یزلی
که گورسنوردی ایشیق گون کیمی جمال على
.
بلند صوتیله سسلندی سیّد لولاک
ایشیتدی بو سسی سکّان قبّۀ افلاک
.
کای گروه مهاجر معاشر و انصار
بودور علی اسدالله حیدر و کرّار
.
منیم یریمده ولى دور وصیّ بر حق دور
اطاعتی هامی مخلوقه فرض مطلق دور
.
بو گون من هر کسه ای قوم اوزوندن اولایم
مطیع حقّه مطاعم امیر و مولایم
.
منیم کیمی بوعلیده او نفسه مولادور
تصرّف ایتماقا هر بیر یولیله اولادور
.
منی سؤوب بونی هر کیم سُوؤَه بو مجمل دور
مقام حبّ علی بلکه بوندان اکمل دور
.
وَ مَن أَحَبَّ عَلیّاً فَقَد أَحَبَّ الله
على عدوّی او کس دور که ضالّدور گمراه
.
علی ولایتینه ایله سیدی خلق اقرار
خدا اوزی بیوروبدور لَما خَلقت النّار
.
بلی محبّت حیدر محبّت دیندی
اودور ولایتی تحکیم دین و آییندی
.
ولایتین یتورن دم بو آیه نازل اولوب
بو گونده نعمت دینوز تمام کامل اولوب
.
نجه علی هامویه نفسدن مقدّم دور
هامی امام اولانی بیله بیلماق الزمدور
.
نچون امام اولان جمله نور واحد دور
تمام صائم و قائم مدام ساجد دور
.
ویروبدی موجد عالم خدای بخشش وجود
هامی ائمّییّه بیر نوردن ازلده وجود
.
یر اهلنی ولی فیضیندن ایتمیوب محروم
گلوبدی عالمه بیربیر بو اون ایکی معصوم
.
بو خلقه لازم اولوب هر زمان وجود امام
نقدر واردی زمان اهلی وار امام مدام
.
همین بو مطلبه وار شرعیمزده نصّ صریح
که ایلیوب علما خوش بیانیله تصریح
.
ایکی نفر قالا گر چولده تشنه و عطشان
بیری رعیّت اولا اول بیری امام زمان
.
رعیّتون اولا بیر شربه آب یانینده
او آب گر چه حیات اولسا جسم و جانینده
.
أو سوئی ویرسین امامه اوزون فدا ایتسون
امام نفسینی بو ورطه دن رها ایتسون
.
.
/// #گریز ///
.
سو آدی گلدی دوشوب یاده تشنه لب سقا
او یادگار علی شیر بیشه هیجا
.
او دم که گیردی فراته سوسوز دوداقیله
ازل باخوب سویا بیر وجد و اشتیاقیله
.
اولوبدی گوزلری خیره گوروب سویون موجین
اوزین ایتوردی سودان دولدوروب ایکی اوجین
.
جگر اودین او سودان ایستدی ایده خاموش
تجلّیات محبت گتوردی باشینه هوش
.
سوسوز امامی او ساعتده یادینه سالدى
امام بیلدی نه حاله که قارداشى قالدى
.
خطاب ایلدی اوز نفسینه عتابیله
اوزین آییتدی دوباره همان خطابیله
.
حسیندن صورا ای نفس هر زمان خوار اول
گر ایسته سن اولاسان اولما بیرجه هشیار اول
.
امام تشنه دی ایستر ایچه ئولوم جامی
سو ایچمگون دگل هرگز محبت انجامی
.
وفا خطین هامی سندن گرکدی مشق آلسون
روادی سن ایچه سن سو حسین سوسوز قالسون
.
ایله مقامده عباس نفسین ئولدوردی
تمام عالمه مهر و وفانی بیلدیردی
.
اوزینه واجب و لازم بیلوب سودان گچسون
او قدر جهد ایلسون سو یرینه قان ایچسون
.
سرشگ دیده سین أوجندا کی سویا قاتدی
ایچنمدی او سویی گوتدوگی یره آتدی
.
الین بوشاتدی گوروب قلبی مهریله دولودور
بلی بودور اثر حبّ بو وفا یولودور
.
ایکی اووج سودان ال چکمگی اونون خوشدور
الى دولی گله حشره دیمه إلى بوشدور
.
فراتدن ولی دولدوردی مشکین آبیله
او مشگی چگننه سالدی چوخ اضطرابیله
.
نه مشک آب اولوب تار و پودی تار حیات
سوسوز اوشاقلارا اول مشکیدی امید نجات
.
سو جامی ألده گزر خیمه لر کنارینده
امام قیزلاری اول مشکون انتظارینده
.
سرشگ دیدۀ زینب کیمی فرات آخور
حیات آل رسول خدا او مشگه باخور
.
دولار سرشگ لریندن اگر چه دریالر
او مشکی گوزلوری مجنون مثال لیلالر
.
ال ایتدی قبضۀ شمشیره حیدر ثانی
رکاب چکدی عقابه او عشق قربانی
.
نهنگ بحر وفا کثرت تولّادن
سوسوز گیروب سویا لب تشنه چخدی دریادن
.
سو ایچمدی او سوسوز کثرت محبّته باخ
تصوّر ایله مواساته باخ اخوّته باخ
.
هواده رعد کیمی برق وردی شمشیری
اوجالدی نعرۀ تسبیحی صوت تکبیری
.
صاق الده تیغ شرربار صول الینده علم
ایدردی لشکر کفّاره حمله چون ضیغم
.
عدوى اهل حقیقت صدیق اهل مجاز
کَسَن شریعه نی دورت مین پیاده تیرانداز
.
گوروب بو حالی هامی اوخلارین کمانه قویوب
او بیر نشانه نی دورت مین نفر نشانه قویوب
.
صاقا صولا دالیه دوندریردی سینه سنی
گلن خدنگه ویریردی نشان خزینه سنی
.
بولوردیلر که یغوب نقد عشق سینه سنه
آچاردی هر اوخ آتان بیر قاپو خزینه سنه
.
یاراردی صفلری دشمن شکار صفدر تک
پوزاردی دسته لری اوز باباسی حیدر تک
.
على الیدی الى تیغی ذوالفقار علی
ایدردی جنگ علی تک او یادگار علی
.
وراردی آتلو باشندان قلج او شیر اوژن
چخاردی تیغ شرربار تنگ مرکبدن
.
بودور طریق بیان و مبرهن مطلب
که بیر یره یخیلوردیله راکب و مرکب
.
دگوب یخاردی قاچان آتلولار پیاده لری
اولوردی اکثرینون مرگ استفاده لری
.
قاریشدی بیر بیرینه هرج مرج اولوب صفلر
داغیلدی مور و ملخ تک حساب سیز لشکر
.
عیان اولوب او بیاباندا شور رستاخیز
قاچان قاچوب قالانا قالمیوبدی راه گریز
.
وروردی قان چوخنون قورخودان ایکی دوداقی
دایاندی کوفیه آخر قاچانلارین قاباقی
.
ایله ایدردی یمین و یسار قلب و جناح
که قالمامیشدی داخی بیر کسه امید فلاح
.
دوشوبدی لرزه چوله پرچم لواسیندن
دوتولدی گوش فلک الحذر صداسیندن
.
ایتوردیله قوشون اهلی ایله بیری بیرینی
که بیر نفر تاپا بولمزدی اولدوقی یرینی
.
توکوب کچوردی او قومی بسان برگ شجر
بو ضرب شصته مگر بیرده کیمسه تاب ایلر
.
قویاردی هر طرفه یوز قباق آچوخ یولیدی
هواده بیربیره پیونده باشیدی قولیدی
.
یوزینه قطرۀ اشگین توکردی اشگ اوسته
گزردی طایر روحی همیشه مشگ اوسته
.
دگلدی فکری لب تشنه و کبابینده
خیالی قالموشدی بیرجه مشک آبینده
.
اگر چه جسمی یارالیدی جانی خسته ایدی
هامی مجاهدتى حفظ مشگه بسته ایدی
.
آپارماقا او سوئی خیمیه اولوب مایل
گلنده اوخ قولین ایلردی مشگنه حایل
.
دیردی بلکه چکه رنج و محنتی یتوره
او مشگی خیمه ده کی تشنه لبلره یتوره
.
دیردی بو سوئی بیر خیمیه یتورسیدیم
سکینه قلبی سنقدور اله گتورسیدیم
.
بو گیر داریده بیر دشمن خدا یتدی
آقاج دالندان او بی یاوری کمین ایتدی
.
حسین فاطمه نون اختیارینی آلدی
او صاحب علمون صاق قولین یره سالدى
.
ولیک ویرمدی تغییر حال اوّلینه
دوشه دوشه صاقی آلدی قلنجی صول الینه
.
اولوب بو قصّۀ جانسوزه راوی مطلب
بلا خزینه سی مظلومۀ جهان زینب
.
دیر که دورموشیدیم قارداشیم حسینیله
همان او لحظه ده تلّ اوسته شور شینیله
.
که ناگهان ساری گل تک سارالدی رنگ امام
بدون اینکه ایده قارداشیمدان استعلام
.
کمال حزینله باخدیم او قانلو میدانه
ایدردی قارداشیم عباس جنگ مردانه
.
او شاهه عرض ایلدیم ای امام جن و بشر
سارالدی رنگ شریفون گنه نه واردی مگر
.
هنوز ایلور علمدار جنگ میداندا
قلنجی برق ورور هر طرفده هر یاندا
.
بیوردی ای باجی أیلور نبرد او کان وفا
هزار حیف که صول الّی ایلیری دعوا
.
دوباره قیلدی کمین بیر ستمگر بی دین
قلجلیوب صول الینده یره سالوب أو لعین
.
تعجّبم او رشیدین بو گوردیکی ایشینه
قلنجی مشگیله باهم نجه آلوب دیشینه
.
.
بو یرده بیر نچه سوز وار گرک مقاله گله
سوز اهل دل سوزیدور گر بیان حاله گله
.
.
اگر چه ایچمدی آب فراتیدن عبّاس
سو ایچمه ماقنا معذوریدی او زبدۀ ناس
.
حسین تشنه لبی یاده سالدی ایچمدی سو
الین یوزین یومادی ئولدی بَر طریق وضو
.
که دستمازیلی اولماق اولیدی اوز نظری
حرارت عطشین سوندوروری سو اثری
.
اولوردی ممکن اولا بیرده بیر نماز قیلا
اشاره ایله خداونده کشف راز قیلا
.
همین بو نکته نی مدّتدی من خیال ایدرم
جواب ویرّم اوزوم چون اوزوم سئوال ایدرم
.
حسین جمالنی گوردی سودا ایتیردی اوزین
حرام بیلدی سویا باخماینی یومدی گوزین
.
وجودینی او سو بیر منجنیق تک سیخدی
خیالی سهلیدی روحین سودا قویوب چخدی
.
او قدر کچمدی گلدی او تشنه لب اوزینه
باخاندا تیره و تار اولدی یر یوزی گوزینه
.
گوگلدن ایستدی دفع غم و تألّم ایده
بو فکره دوشدی وضو اولمادی تیمم ایده
.
بیلوردی آخر عمرینده سجده ایلیه جاق
تیمّم ایلمسه ایمدی اوندا نیلیه جاق
.
بونی خیال ایلمزدی که گل کیمی سولاجاق
تیمّمنده او سجده اؤزی بیر عضو اولاجاق
.
کرک ووریدی یره هر ایکی الین بیردن
دوباره بیر گوتوریدی اوز اللرین یردن
.
اولان حسینله دل بیر خیال بیر سر بیر
ایکی الین یره ووردی بو قصدیله بیر بیر
.
الى قایتمادی چکسون یوزینه تپراقی
اولوب تیمّمی ناقص قالان قالوب باقی
.
دگلدی اللری گویا اوز اختیارینده
نجه دوشوب ایله قالمیشدی سو کنارینده
.
بقیّۀ قولونان ساخلامشدی بیدقنی
أو بیدقینده بیلوردی امام رونقینی
.
بیلوردی بو علمین یاتماقی دگل مطلوب
بلونمری بوعلمدن که غالب و مغلوب
.
بیلوردی یاتسا علم ولوله دوشر حرمه
بیلوردی اهل حرم گوز تیکوب باخار علمه
.
بیلوردی یاتسا علم زینبه قیامت اولور
نقدر ساخلاسا سرمایۀ شفاعت اولور
.
بیلوردى یاتسا علم چون شکست علامتیدی
علم دوتان ألینه تک اونون خجالتیدی
.
گتوردی تیر بلائیله قوش کیمی پر و بال
گنه گلن اوخی ایلردی دلدن استقبال
.
دوشردی یادینه هر دم سکینه میثاقی
گزردی مشگ دیشینده او تشنه لب ساقی
.
او شاهباز حقیقت پر آچدی چون شهباز
بو فکردیدی ایده اوج وحدتده پرواز
.
بیر اوخ گلوب او زمان دگدی ناگهان مشگه
که باعث اولدی سو گتماقی قانلو پر اشگه
.
بو مقصدیدی که مشگه دگن دگه گوزینه
ولیک باخمادی بی رحم أوخ آتان سوزینه
.
گوروب که تیر جفا مشگین ایلدی پاره
توکولدی سو یره یوخ دردینه داخی چاره
.
امید رشته سنی قطع ایدوب حیاتیندن
رضا اولوب ئولومه کچدی اوز نجاتیندن
.
گلوب بیر أوخدا اوز آنّندا دگدی بند اولدی
دوباره گوزلرینون جامی قانیله دولدی
.
چخاتماقا او اوخی گر چه اللری یوخیدی
شجاعدی ولی از بس رشادتی چوخیدی
.
باشین قویوب دیزینه ایستدی که زور ویره
اوخی چخاتدی ولیکن عمامه دوشدی یره
.
آخا آخا یوزه قان چشم نازنینندن
ایکی دیزیله چخاتدی اوخی جبینندن
.
اشاقه سالدی باشین تا آچوق قالوب باشی
دولوب گوزوندن آخان قانیله اَیَر قاشی
.
خضوعه سیر ایله بیر کثرت خشوعنه باخ
دالنجا سجده سی وار ایمدیده رکوعنه باخ
.
زیارتینده اوخورسان یانقلی بیر دلیله
که ئولدوروبله سنی هم دیلیله هم الیله
.
یتوب أو وقتده بیر ظالم ستم پیشه
بیلوب که یوخ داخی علّت هراس و تشویشه
.
آت أوسته بیر دوزلوب آهنین عمود الده
ووروب او بیکسه بیر دیل یاراسی اولده
.
دیدی که بس نیه عبّاس ایلمورسن جنگ
مگر که ایتمه میسن عرصه نی بو لشگره تنگ
.
بویوردی اوندا گلیدون که قوللّاریم واریدی
او شاهبازیدیم اوچماقه شهپریم واریدی
.
الیم که یوخدی اوزومدن ایدم مدافعه من
دلیوی باغلا الون آچ ایله نه ایتمه لیسن
.
دیدی سنون گر الون یوخ ولی منیم وار الیم
الیمون أولماقئی ایمدی بیلدیریر عملیم
.
دمیر عمودی ایله ووردی کاسۀ سرینه
که کاسه سینده اولان گلدی دولدی گوزلرینه
.
ایله شکت تاپوب بیر دمیر عمودیله
که اول باشین عدمی بیر اولوب وجودیله
.
اولوبدی کیسۀ سر پاره بیر نمودی قالوب
توخونموشی توکلوب بیرجه تار پودی قالوب
.
بوشالدی کاسه سی مشکلدی بیرده دولدورسون
شکست جامیده ممکن دگل که سو دورسون
.
دولاندیرا یری وار «صافی» اوز تکلّمنی
چکه بیانه او شاهون گنه تیمّمنی
.
بیلوب تیمّمنی باعث اوز تقدّمینه
دوباره ایستدی مشغول اولا تیمّمومینه
.
یر اوسته مسح ایده تپراقی یوز گوزی اوسته
عقابدن یره سالدی اوزین یوزی اوسته
.
دوشنده سسلدی گل قویما سرّیم اولسون فاش
یارالیم ئولورم قارداشیوی تاپ قارداش
.
باتاندا گل یوزی تپراقه سجده حالینده
واریدی کسر تیمّم گنه خیالینده
.
او سجده نی گوروب افلاک شوریله دولدی
تیمّمنده همان سجده سی بیر عضو اولدی
.
یارا سیزیلتسی اوز ناله سی او شوریله
ویروب مقابله طبلین او عرصه طوریله
.
یر اوسته صاق صولا از بس یوزینی سورتردی
تمام صورتنی تپراقیله اورتردی
.
بیلوردی ایسته سه یتسون تمام مقصوده
گرک یوزین ایلسون خاک و خونه آلوده
.
که باشی اوسته گلنده او شاه عرش اساس
قویا قدملرینه بیله بیر یوزون عبّاس
.
.
گنه خیالیمه بیر سوز گلور که مجبورم
اونی دیماقا گذشت ایلیون که معذورم
.
او نکته نون یریدور من گرک بیان ایلیوم
اگر چه سرّ خفی دور گرک عیان ایلیوم
.
بدنده ال بو قدر محترمدی علّتی وار
ایکی الون هامی اعضاجه قدر و قیمتی وار
.
تمام عضودن ال جامع منافع دور
که زحمته متحمّل بلایه دافع دور
.
ایکى ال ایلیوب آسوده نوع انسانی
همیشه حفظ قیلان الدی سایر اعضانی
.
ال اولماسا بو هنرلر مگر گلور عمله
هامی وجودیوی محتاج بول بو ایکى اله
.
اگر چه عقلیله هر بیر مقامه قابل سن
ولیک چوخ عمله اللرونله عامل سن
.
یتنده صدمه بیوک سهلدور کیچک اوشاقا
مُمیّز اولسا یقین اللرین ویرور قاباقا
.
مجسّم ایله گوزونده او دشت و صحرانی
او وضع حال علمداری قانلو میدانی
.
نه چکدی نازل اولاندا یره عقاب أوستن
أنوب نه زحمتیله پلۀ رکاب اوستن
.
دمیر عمودی باشندان ووران زمان دشمن
ازل او بیکسین آلتندا رَم یِئدی توسن
.
اونون او حالی گنه قلبیمه شرر سالدى
نچه قدم بیر ایاقی اوزنگیده قالدى
.
وفا یولون گیدن عشّاقی هوشیار ایتدی
یوزیله تپراقی نچّه قدم شیار ایتدی
.
دینمیرم که بو نچّه قدمده نه چکدی
بو قدر تخم وفانی او تپراقا اکدی
.
الی یوخدی دوتا مرکبین اوزی یالین
گوگل دونر قانا فکر ایلینده احوالین
.
علاوه باشدان ایاقه بدن دولی اوخیدی
نه بیر نه یوز نه مین آخر یاراسی چوخ چوخیدی
.
دوشنده سهلیدی آتدان یتنده جان دوداقا
باشین کسنده ده ال اولمادی ویره قاباقا
.
هامی خیالی هامی فکری باشدان آتدی
یوز اوسته تپراقا تا دوشدی مقصده چاتدی
.
گوروب او پیکری تیر و خدنگ خوش یریدی
یره دگنده او اوخلار دوباره دن یریدی
.
یتیشدی تا سسی سمع امام مظلومه
نه یوز ویروب اونی الله بیلور او مغمومه
.
سوار اولوب آتنا یوز قویوبدی مقتلینه
وراردی حسرتیله هر ایکی الین ألینه
.
گیده گیده توکولوب اشگ چشمی آخدی یره
دایاندی مرکبی دوردی امام باخدی یره
.
گوروب که قارداشنون اللرى دوشوب یرده
گوتوردی اللری دولدوردی گوزلرین بیرده
.
ازل او اللری جان تک باسوبدی آغوشه
گتوردی قارداشنون عطری قارداشی هوشه
.
اگر چه سینیه باسموشدی قارداشین یرینه
او سینه ده ایکی ال مسح اولوندی بیربیرینه
.
امام عالمیدی چون عمل تجسّمنه
بو مسحی عضو بیلوب قارداشین تیمّمنه
.
تیمّم عضوینی قویموبدی ناتمام امام
اولوب تیمّم ناقص امام الیله تمام
.
گلوب یتوب باشی اوستونده باشلادی فریاد
باخوب نه گوردی وار اون یدّی سنگدل جلاد
.
بیری بیرینه او لشکر تبادر ایلوردی
او باشی کسمگه تک تک تفاخر ایلوردی
.
ووروب داغیتدى أو ظالملری شه دوران
قاچاردیلار قاباقیندان او لشکر شیطان
.
قایتدی حسرتیله دوردی قارداشا باخدی
سرشگ دیده سی باخدوخجا گل یوزه آخدی
.
بولنمرم نجه شه ذوالجناحدن اندی
أنوب ولیک ئولوم حالی اوندا گورسندی
.
گوتوردی باشینی آلدی ایکی دیزی اوسته
قویوب او قانی آخان اللری یوزی اوسته
.
بیوردی گوزلرون آچ ای مه بنی هاشم
گوزوم ایشقلقی روحیم وفالی قارداشیم
.
سنی نه دللریله اوخشیوم ائدیم افغان
بو قدر وار دیه بیلّم اوزوم سنه قربان
.
وفا و مهر و محبّت ندور نشان ویردون
تمام قوّت قلبیله امتحان ویردون
.
نه دل دوتور نه گلور سس نه وار علاج مفید
آزالدی چارم اولوب سنسیز انقطاع امید
.
گوزونده کی قانی سیلماقا یوخ الون بولّم
غم ایلمه اوز الیمله او قانی من سیلّم
.
منه بلا و مصیبت گونونده یولداشیدون
اوغول برابری ایستردیم آدی قارداشیدون
.
دوباره من گورورم اکبریمی جان اوسته
گرک یانام نجه یاندیم او نوجوان اوسته
.
خیال ایتمه بو محنت لریله دینجلّم
او قدر گچمیه جاق منده بو یولی گلّم
.
مگر گیدر بو قدر داغ سینه و دلدن
نه نوع اکبر و عبّاس آدی دوشر دلدن
.
گوزیوی آچگله باخ سیلمیشم گلن قانی
که گور نه حاله سالوبسان بو دیده گریانی
.
اؤزوم خوشام دیمورم محنت و ملالیمه باخ
بو قدر وار گوزی یولدا قالان عیالیمه باخ
.
وصیّتون وار اگر رشتۀ بیانه گتور
اورکده قویما قالا سوزلرون بیانه گتور
.
امام ناله سی تا یتدی جان قولاقینه
گوز آچدی اوندا کی یتمیشدی جان دوداقینه
.
مسیح عصر أو دم مرده جسمه جان ویردی
همان أو قالب بیروحه بیر روان ویردی
.
باخاندا گوردی دوتوب کربلانی شور حسین
احاطه ایلیوب اول سرزمینی نور حسین
.
ایدر جمال منیرینده جلوه نورالله
گرک اوزین بیله عباس فی حضور الله
.
غریبه حالیده یتمیشدی یار محضرینه
خیال ایدردی که سورته یوزین قدملرینه
.
همان او حالیده مبهوت قالدی موسی تک
توکوردی سیل سرشگین یوزینه دریا تک
.
دانشماقا اوزی چون شه اجازه ویرمیشدی
او کهنه قالبه بیر روح تازه ویرمیشدی
.
کمال عجزیله عرض ایتدی ای امام نبیل
کلیمه نطق مسیحه روان خلیله دلیل
.
سنی قسم ویریرم جدّیون رسالتینه
آناوین عصمتینه هم آنان ولایتینه
.
نقدر منده نفس وار آپارما خیمه لره
بو التماسیمی آل عین لطفله نظره
.
سو اولمادی بیلوسن من نقدر منفعلم
نه تک سکینه هامی اهل بیتدن خجلم
.
آپار بو مشگیمی قوی نعشیمی قالا یرده
سوسوزلارین یوزینه من باخانمارام بیرده
.
گورن سو مشگینی بو پاره پاره صورتده
بیلر که منده قصور اولمیوبدی خدمتده
.
علاوه چوخلاری آگه دگل بو حالیمدن
قوشون هنوز منیم چخمیوب خیالیمدن
.
بیله بیلوله همان صولتیله من قالورام
هنوز بولموری قان ایچره ال ایاق چالورام
.
هنوز یوزده بیری بو صفوف دشمندن
نه واردی آنلامیوب بی خبردیلر مندن
.
اورکلرینده منیم ایمدیده هراسیم وار
سبب اودور سنه بیر بسیله التماسیم وار
.
اگر خیامه آپارسان منی بو حالتده
جری اولور سنه دشمنلریم او ساعتده
.
دیه دیه سوزین عبّاس گوزلری آخدی
آخا آخا گوزی حسرتله قارداشا باخدی
.
که یعنی ای گل باغ وفا خداحافظ
قتیل عشق و شه کربلا خداحافظ
.
امام قبلیه ایستردی دوندره یوزینی
باخون محبّتنه هیچ ایترمدی اوزینی
.
چووورمدی یوزینی قبلۀ انامه طرف
وئرنده جان یوزینی دوندروب امامه طرف
.
بولوبدی قبلۀ اصلی دوروب باشی اوسته
شهادتیننی بیر بیر دیردی آهسته
.
وصیّتی بوئیدی هر قدر وار اوندا نفس
خیامه نعشینی حمل ایتمسون شه بیکس
.
نه مانع أولدی ئولندن صورا او غم حشمه
که نقل ایتمدی قارداش جنازه سین خیمه
.
آپارسون ایستدی عبّاسی خیمه گاهه طرف
گوروب که اولموری ممکن قیلوب فسوس و اسف
.
یارا گوتورموشیدی بسکه جسم زیباسی
ووراندا ال داغیلوردی تمام اعضاسی
.
بیری بیریندن اولوردی او گل کیمی جسدی
بو مشگل امره امامون یوخیدی چون مددی
.
دوشن یرینده قویوب قارداشین جنازه سنی
نشانه گوتدی ایکی الده خون تازه سنی
.
الى بلینده گلوردی ولی امیر حرم
مخدّرات حرم پیشوازه چخدی او دم
.
نه گوردیلر او شه دین الی بیلینده گلور
اوزین گتورمیوب امّا آدی دلینده گلور
.
اشاره ایله یتوردی بلالی زینبینه
ایتورمیوی اوزینی پرده چکدی مطلبینه
.
گلوب او حالده بیر خیمیه اولوب داخل
یغوب عیالنی باشه او شاه دریا دل
.
وفالو قارداشنا ساخلیوبدی ازّل یاس
هامی بو حالی گوروب بولدولر ئولوب عباس
.
سیری بیرینه قارشدی او عترت یاسین
اوشاق بویوک هامی دوتدیله یاسین عبّاسین
.
اوزی امام توکوب قانلو یاش سنق باشی تک
آتا کیمی دیوب اوخشاردی تک نه قارداشی تک
.
سکینه گوردی حرم اهلینی بو حالتیله
باخاردی بیربیر او جمعه کمال حیرتیله
.
امام عالمیدی چونکه قلب عالمیدی
بیلوب سکینه نون آخر او دم ئولن دمیدی
.
دیدی بو مجمعه بیر شیون دوباره سالون
گلون سکینه نون اوّل باشینا قاره سالون
.
غبار قلبنی تا چشم اشکباری یوسون
بلی بو آب گرک دلدہ کی غباری یوسون
.
غریبه عالمیدی عرصه گاه محشریدی
باخیدون هر کسه محزونیدی مکدّریدی
.
سو مشگینی قویوب اثنای بزم ماتمده
گورونمیوب بیله ماتم سرا بو عالمده
.
گرک تسلّی ویریدی امام عترتینه
اوزی قارشمیشدی اهل بیت عصمتینه
.
بیری دیردی عموم وای بیریسی قارداش وای
بیری دیردی عمودیله بیر سینان باش وای
.
بیری دیردی آناسی یانندا گر بوخدور
آنا کیمی باش آچوب آغلیوب یانان چوخدور
.
حرمده قالمادی آخر آچیلمیان بیر باش
وئروبله سس سسه عورت اوشاق خانم قره واش
.
بیلوردیلر ایله یوخدور او یرده نامحرم
تمام باشلارین آچمیشدی بانوان حرم
.
ایدردی ناله خواتین پردۀ أعزاز
حرملر اولموشیدی بیر بیریله هم آواز
.
ووراردی گه یوزه گه سینیه خانم قیزلار
چخارتدی یاددان أوغول ماتمین اوغولسیزلار
.
آچیلدی عقدۀ پرچینلر آه و زاریله
دونوبدی چینه حرم زلف مشکباریله
.
توکردی گونۀ رز فامه جمله سیم سفید
ساری گل اوسته داغیلمشدی عقد مروارید
.
عبث دگلدی بو غم بیله دلنشین اولدی
خانملارین چون اسیر اولماقی یقین اولدی
.
محقّق اولدی داخی زینبه اسیر اولماق
دیار شامه کیمی شمره دستگیر اولماق
.
سفر تدارکی گوردیله «صافیا» شامه
الیوی ساخلا دایان بسدی اود دوتوب خامه
.
قارشماسون بو غمه بیر مصیبت دیگر
که شام قصّه سنه وورسان ال یانار دفتر
.
سنه بو مطلبه هادی اولان او پیر اصیل
دیوب که حضرت عبّاسه سال اؤزیوی دخیل
.
اگر چه اکبره همنامدور او روشندل
اولوب بو وقعه ده عبّاس ذکرنه مایل
.
او خالقی که باغشلار قایتسا دشمنیده
باغشلاسون اونودا حاضرینیده منیده
.
.
.
.
.
#غدیریه #صافی_تبریزی
#مراد_عالم_ایجادیدن_محبتدور
#ترکی #حیدریه #زبدةالاشعار