مرغ خوشخوان رازینی پنهان صبادن ساخلاماز #حسنیه_مصیبی_تبریزی

در شهادت حضرت امام حسن مجتبی علیه السلام
.
زبدة الاشعار
.
: @nohe_torki
.
محمد علی مصیبی تبریزی
.
مرغ خوشخوان رازینی پنهان صبادن ساخلاماز
آشنا سرّین خفاده آشنادن ساخلاماز
.
بلبل ، عالی نغمۀ مستانه سین گلزاریده
اختفاده یاس و نسرین و همادن ساخلاماز
.
بستۀ زنجیر زلف یار ، سوز آهینی
سینه ده گیزلین نگار مه لقادن ساخلاماز
.
خال اگر چه صورتین حُسن و جمالین آرتیرار
لیک رخساری خدنگ ابتلادن ساخلاماز
.
رسم عالم دور وفا اهلی سوزون یاره دیئر
سینه ده سرّین وفالی ، بی وفادن ساخلاماز
.
یار ایللر یاریلن همدوش و همخواب اولسادا
چرخ گردون قلبینی تیر خطادن ساخلاماز
.
سنگ خارا آفتابیلن اگر هم توش اولا
قلب خاراسی همان نور و ضیادن ساخلاماز
.
سودۀ زهریله الماس وجودی دوغرانان
شیشۀ تقدیرینی سنگ قضادن ساخلاماز
.
بیر سبوی آب سیراب اولسا زهر نابیلن
دیل دوداقی یاندیرار قلبی نوادن ساخلاماز
.
رسم دوران دور کی صرصر گلسه گولزاری پوزار
نقش فتّان هئچ گولی باد فنادن ساخلاماز
.
هانسی گولدور حُسنِ طلعتده حَسَن تک بی بدیل
بیر گوزل کی خلقی لفظ مرحبادن ساخلاماز
.
همجوار اولدی بو گول ایللر مغیلان خاریلن
خارِ بنیانکن ئوزون نیش جفادن ساخلاماز
.
.
گور نئجه بیر قطره پوزدی رحمتین دریاسینی
آرتیروب آل علی نین محنت عظماسینی
.
جُعده مسموم ایلیوبدور اشبه پیغمبری
سالدی شمسِ هل اتایه سایۀ اغواسینی
.
نیله میشدی یارینه آخر سلیل مرتضی
قاسمین قویدی آتاسیز شاد ائدوب اعداسینی
.
مکریلن آدون قویان دنیاده خال المومنین
تولیوبدور جعده نی اول هنده نین همتاسینی
.
وئردی بیر کیسه قیزیل ، آلدی اونون ایمانینی
کوزۀ آبه توکوبدور سودۀ الماسینی
.
نیمۀ شب مجتبی دُوردی مُشوَّش ، خوابیدن
سو ایچوب رفع ایله سین مولامیز استسقاسینی
.
کوزه نی یتجاق دوداقه گور نئدوب آب سبو
رنگ رخسارین پوزوب الدن آلوب یاراسینی
.
ایچدی سو اما ئورک اودلاندی آرتیردی عطش
صرصرجور اسدی صولدورسون ولایت یاسینی
.
نور عین فاطمه ئولماقینه آگاه اولوب
ال آتوب اوغدی ئورک باشین،یانان اعضاسینی
.
اللرین قویدی یئره دورسین ایاقه مجتبی
گوردی دیز گلمور فلک بوکموش قد رعناسینی
.
آگه اولدی کوزه ایچره آب یوخ زهرآب وار
بولدی کیم سیراب ائدوبدور زهریلن صهباسینی
.
سسلنوبدور زینبین امداده حال زاریلن
دوردی زینب خوابیدن آلجاق اونون نجواسینی
.
گوردی تا قارداش دوداقینده باجی قان لخته سین
ووردی باشه قوزیوبدور عرشه آه و واسینی
.
اضطراب بی نهایت زینبین قلبین آلوب
راه چاره آختاروب غمدن قوتارسین یاسینی
.
سسلنوب قارداش سنی کیمسه بو احواله سالوب
کیم ایاقدان سالدی آیا زینبین طاهاسینی
.
سویلیوبدور غمکشیده زینبه مظلوم حسن
علتین آلما خبر کیم بیلمه سین آیاسینی
.
بیلمسون جَرْیانی عبدالله و بَکر و قاسمیم
نه حسین بیلسون نه آگاه ائت اونون عبّاسینی
.
آگه اولسا ماجرادن گر ابوالفضلیم باجی
تیغ جانفرساسی دوغرار قاتلین اعضاسینی
.
لیک تنها بیر اشارت ائتدی آب کوزیه
زینب آلدی مطلبین سرّین ،سوزون ایماسینی
.
بیرده سسلندی ؛ باجی ایله حسینی باخبر
تا گله بالینیمه بیرده گوروم سیماسینی
.
سویله قارداشین اولوب زهریله قارداش خونجگر
مجتبانین درک ائله ساعات وانفساسینی
.
ترک ائدوب تا منزلی زینب ،چاغوردی مجتبی
جعده نی ، اول قاتل دون مایۀ سفلی سینی
.
تترین لبلر دگوبدور بیربیره ؛ ای بی وفا
نیله میشدیم من سنه ییخدین ولا عنقاسینی
.
داغدار ائتدون علی نی روضۀ رضوانیده
ایلیوبسن باغریقان پیغمبرین زهراسینی
.
الغرض گلدی حسین قارداشینون بالینینه
بیلمورم گوردی نه نوعیله گل حمراسینی
.
اختیارین وئردی الدن ووردی باشیندن آقام
سیل اولان گوزیاشی دوتدی پهنۀ سیماسینی
.
تا بیلوب آب سبو اول دیل دوداقه نیلیوب
کوزه نی آلدی اله فاش ایله سین احساسینی
.
ایسته دی یتسون دوداقه کوزۀ آبی حسین
مجتبی ایلوب مخاطب زینب کبراسینی
.
سسلنوبدور آل سبونی سن حسینیمدن باجی
قویماایچسون اول سودان یاندیرماسین سوداسینی
.
من سوایچدیم سینه مه وُردی بو سو داغ فراق
قارداشیم امّا ائدر عطشان ، وصال امضاسینی
.
مجتبانین قسمتیندیدی بو صهبای بلا
میل ائدر امّا حسینیم کربلا صهباسینی
.
اوندا کی خنجر دمیندن نوش ائدر قان تشنه لب
چشمه چشمه قان دوتار درد و بلا صحراسینی
.
ماسوانی شوق وصل یاریلن باشدان آتار
بیر چوخور یئرده ائدر آللهیلن نجواسینی
.
گون قباقینده قوم اوسته پیکری عریان یاتار
قیزلاری عرشه سالار فریاد واویلاسینی
.
اوندا کی باشسیز بدن آتلار ایاقینده قالار
چاک چاک ایلَلّه سبط احمدین اعضاسینی
.
اوندا کی گون کربلاده نیزه باشیندان چیخار
اوندا درک ائت نهضتین سن وقفۀ حسّاسینی
.
هاله تک ،دوش، نی ده کی خورشیدعشقین آردیجا
قویما تا یاددان چیخا غوغای عاشوراسینی
.
هرنه گورسن سن بو یولدا ناامید اولما باجی
بجدلین ظلمین و یا شمر و سَنان بلواسینی
.
ایندی من سرمست جام وصل حیّ ذوالمنم
سینم اودلاندی ولی آلدیم شرف قَرطاسینی(1)
.
عازمم کوی وفاده واصل جانان اولام
حق ئوزی یاخشی تانور ئوز وصلینین شیداسینی
.
من کی جان وئردیم؛ باجی اولادیمه اول سرپناه
قویما پوزسون صرصر غم مجتبا اجلاسینی
.
بیر«مصیّب» سائلیم وار گرچه غرق سیّئات
گوسترر امّا روان شعرینده ئوز احساسینی
ـــــــــــــ
(1) لوح و کاغذ
.
.
#حسنیه_شهادت
#مرغ_خوشخوان_رازینی_نهان_صبادن_ساخلاماز
#مصیبی_تبریزی
#ترکی
.
#زبدةالاشعار
.
: @nohe_torki