مس حقیرم حسین کیمیانین عاشقیم #کربلا_میرزایی_زنجانی

کربلانین عاشقیم
..
..
..
..
میرزایی زنجانی
..
..
..
..
مس حقیرم حسین کیمیانین عاشقیم
دچار درد نهانم دوانین عاشقیم
..
گیجه گونوز قولاقیم سسده دور سراق ایدرم
بیر آشنا سوز اولا آشنانین عاشقیم
..
ایله قولاق آسارام زنگ کاروان ایشیدم
دیار یاره گیدن کاروانین کربلائین عاشقیم
..
منه صفای بهار و چمن نه لازمدور
سولان او گلشن و باغ خزانین عاشقیم
..
اورکده درد بودور پرده سیز دیوم سوزیمی
اسیر عشقم حسین کربلانین عاشقیم
..
او آلتی گوشه مزارین گلوب زیارت ائدم
توزین چکم گوزیمه توتیانین عاشقیم
..
قوجاقه قبرون آلام توختیا اورک یاراسی
مریض عشقم حسینجان شفانین عاشقیم
..
سلام ایدوب نیچه ایلدی اوزاقدان آغلامشام
حسین او بارگه باصفانین عاشقیم
..
محقرانه قویام آستانوه یوزیمی
قالام قاپوندا مُقدّس منانین عاشقیم
..
گورن دیه بو حسینون قاپوسینین ایتی دی
سنه وفالى ایتم من وفانین عاشقیم
..
بیر ایت که صاحبی اولسون حسین اونون نه غمی
ایله حسین کیمی والله آقانین عاشقیم
..
اگرچه توزلیدی قبرون باطناً مَلَکلر اوپر
او آستان مَلَک پاسبانین عاشقیم
..
قوجاقه قبرون آلوب آغلیار آنان زهرا
مزارون اوسته یانقلی آغلیانین عاشقیم
..
قیامته کیمی زهرا دیر سوسوز بالا وای
بلی بوکولموش او قدّى کمانین عاشقیم
..
دیر بالا ننووم دور اوپوم دوداقوندان
حسین بلورسن او تشنه لبانین عاشقیم
..
بهشت روضۀ رضوان منه نه لازمدور
حسین چیم بالا من کربلانین عاشقیم
..
حسینه آغلار آناسی دیر امام زمان
نه نه، دئ اوخشاما بو اوخشامانین عاشقیم
..
سن آغلا جدیمه مادر، من آغلیوم سنیلن
ایله سنون کیمی من کربلانین عاشقیم
..
حسینچیلر اوخویان مجلسه اوزوم گیدَرَم
اوخویان آغلیان هر آغلادانین عاشقیم
..
دیر ننه نه اولار اصغرون بیر آز دانِشا
نه نه من اصغر شیرین زبانین عاشقیم
..
دیر دانشسا بالام قان گلر بوغازیندن
اوزومده یوخسا او شیرین بالانین عاشقیم
..
سوسوز یارالی بالاسین آلوب قوجاقه حسین
دیر بو پاره لی یورقون یاتانین عاشقیم
..
آلوبدی سینه سینه باغبان سولان گلینی
بو گلشنی سارالان باغبانین عاشقیم
..
حسین یارالی قوجاقنده اصغری یارالی
بو ایکی یاره لی باهم یاتانین عاشقیم
..
قلم یازار اَلَر اشکین عذاره «میرزائی»
حسینه آغلار او اشک روانین عاشقیم
..
..
..
#کربلا #میرزایی_زنجانی #آرزوی_کربلا #ترکی #زبدةالاشعار