ناحق ورولوب قلبیمه اوخ حق یرین آلدی #حسینیه_هندی_تبریزی

#ای_اوخ …
زبانحال حضرت اباعبدالله الحسین (ع) با تیر سه شعبه
.
.
مرحوم هندی
.
.
ناحق وُرولوب قلبیمه اوخ حق یرین آلدی
سکّان سماواته بو اوخ ولوله سالدی
.
.
من حسرت پیکانیله دائیم ایچرم قان
ایتمز نیه بس رنجه قدم هاردادی پیکان
پیکان جفا پیک بلادور اونا قربان
گلسون نگران گویدی منی چوخ گیجه قالدی
.
.
هر طائر تیریله کی بی بال و پر اولدوم
الطاف کریمانه سینه راهبر اولدوم
تقدیس ایدرم مقدمینی مفتخر اولدوم
بو طائر دولتدن عجب باشیم اوجالدی
.
.
ازبس یارالی جیسمیمه دشمنلر اوخ آتدی
اوخ اوخ یانینا باتدی یارا یاریه قاتدی
هر حادثه یوز ویردی او یوزدن یارام آتدی
آرتدیقجا یارا یاره قسم دردیم آزالدی
.
.
گوردوم آچیلوب باب کرم خانهء تکریم
تعظیمه دوروب ایلدیم اولادیمی تسلیم
تقدیم حقیرانه می حق چون گل تقدیم
لطف ایتدی کرم قیلدی قبول ایلدی آلدی
.
.
بو صحنه ده بیر بیر شهدا ویردی نمایش
اولدی او نمایشلری شایان ستایش
داماد اُلومی رونقمه ویردی فزایش
بو منظریه فاطمه باخدوقجا سارالدی
.
.
شهزاده علی اکبریم اول گلبن نوخیز
جام دل غمدیده می خوش ایلدی لبریز
قانه بویانوب شُفّهء گیسوی دل آویز
مجنون کیمی لیلانی بو غم چوللره سالدی
.
.
گهواره ده گوردوم علی اصغر ایدر ایما
حقّنده وظیفم نه ایدی ایلدیم ایفا
آهسته رباب ایتدی نوا نغمه سین انشاء
آز آغلادی چون اصغرینه دردی چوخالدی
.
.
حق بولماق ایچون آغلاماقا هر گجه زینب
چوخ تیز بولَجاقدور منی قالماز گجه زینب
مندن صورا عالم گوره جاقدور نجه زینب
قانلی باشیمی گوردی باشین محمله چالدی
.
.
کلثوم هدف ناوک اجحاف اولی قلبی
نقدینهء غم آلماقا صرّاف اولی قلبی
خیمم یانا خاکستر اولا صاف اولی قلبی
خاکستریله آینه هر یرده صافالدی
.
.
بو سجده بو پیشانی مجروحی حسینون
گون سوزشی بو حالت مذبوحی حسینون
قان گیتدی اجل گلدی چیخار روحی حسینون
ایمدی گورونور گون یوزی تار اولدی قارالدی
.
.
دریا کیمی قان چشمه لری ایلدی طغیان
قان اوزره اولوب تختهء تن کشتی طوفان
قان قطره لرین جمع ایده چون دانهء مرجان
غوّاص قَضا قُلزَم حیرت آرا قالدی
.
.
صاقدان صولا صولدان صاقا اوخ باش باشا چاتمش
تشریف شه عشقه ظَفَر طاقی اوجالمش
وار سرّ قضا پیرهنیم قانه بویانمش
طاق ظَفَر آرایشی چون قرمزی شالدی
.
.
#هندی سنی دور ایتمیشیدی بار تکلُّف
اولموشدی سکوتون سنون اسباب تاٌسّف
ایتدون گینه بو درگهه تحصیل تشرّف
جام گنهون دولموشودی یاخشی بوشالدی
.
.
.
#قتلگاه
#حسینیه_شهادت
#ناحق_ورولوب_قلبیمه_اوخ_حق_یرین_آلدی
#هندی_تبریزی #ای_اوخ_هندی_تبریزی
#ترکی
#زبدةالاشعار