نجات کشتی سینه میر و ناخدادی حسین #حسینیه_ستار_رزاقی

عرض حال به حضرت حسین ابن علی (ع)
..
..
..
ستار رزاقی تبریزی
..
..
..
نَجات کشتی سینه میر و ناخُدادی حسین
حَقیقتین یولونا مَشعَلِ هُدادی حسین
..
جمالی عالمِ امکانی ایلیوب روشن
سراج اَنوَرِ خلّاق کبریادی حسین
..
خُدا بو نوری یارالدوبدی پاک نوریندن
اودور خلایقه دنیاده دلربادی حسین
..
وجودی مایه ی رَحمَتدّی مایه ی عزّت
کی ذات حَق طَرَفیندن بیزه عطادی حسین
..
آناسی فاطمیه نور عین و پاره ی تن
عزیز و بند دِل خَتم الاَنبیادی حسین
..
علی ولیّ خداوندِ اکبره وارث
ولایت اهلینه سرمایه ی بَقادی حسین
..
عزیز و خامس آل عبا، شهَنشه دین
صَفای کون و مکان حُجّت خدادی حسین
..
وجودی مظهر ایثار و عشق و شور و صفا
تمام خَلق آرا آئینه ی وفادی حسین
..
سالوب محَبّتین الله قلوب عُشّاقه
همان مُحبّلرین قلبینه صفادی حسین
..
چاتار سعادته کیم اُئوپسه آستانه سینی
باخار او کیمسیه چون صاحب عطادی حسین
..
یَزید علیهینه ایلوبدی کربلاده قیام
حقیقت اهلی دیدی نور حق نمادی حسین
..
بویوردی ظالمه هرگز باش اَگمز عبدالله
گرکدی خَلق بوله بنده ی خدادی حسین
..
بقای دینه گوره اَل چَکوب حیاتیندن
نشان ویروب کی ره دینیده فدادی حسین
..
خَم ایتمَدی باشینی ظالمه، کسیلدی باشی
بیلورتمام جهان کُشته ی جَفادی حسین
..
یزیدی قانلی قیامیله ایلدی رُسوا
جهانه ثابت اولوب شاه کربلادی حسین
..
همیشه اَل یتیریبدور جهاندا نوکرینه
ولایت اهلینه چون دهریده آقادی حسین
..
اُؤپ آستانه سینی صادقانه «رزّاقی»
ایکی جهاندا یقین دردیوه دَوادی حسین
..
#حسینیه #ستار_رزاقی #حسینیه_مدح #ترکی #زبدةالاشعار