نه قدر عشق و صفا وار حسینون حرمینده #حسینیه_مصیبی_تبریزی

زبانحال زائر کربلا
« حسینون حرمینده »
.
زبدة الاشعار
.
: @nohe_torki
.
محمد علی مصیبی تبریزی
.
نه قدر عشق و صفا وار حسینون حرمینده
گوزل صحن و سرا وار حسینون حرمینده
حزین صوت و نوا وار حسینون حرمینده
سینان قلبه جلا وار حسینون حرمینده
مناجات و دعا وار حسینون حرمینده
کی هر درده دوا وار حسینون حرمینده
.
.
نه تربت دی ملکلر او توپراقی ئوپللر
ضریح ِ حرمین و قیزیل طاقی ئوپللر
اولان قانیله الوان او قنداقی ئوپللر
حرملرده گزن پای عشاقی ئوپللر
طراوتلی فضا وار حسینون حرمینده
کی هر درده دوا وار حسینون حرمینده
.
.
بهشتین گوزل عطری اسور صحن حرمدن
گلن حاجتین ایستور شهنشاه کرمدن
بیلور صحن و سراسین گوزل باغ ارمدن
آلور روحه طراوت اَسَن قرمز علمدن
صفای دو سرا وار حسینون حرمینده
کی هر درده دوا وار حسینون حرمینده
.
.
ائدللر گوزه سرمه او توپراقی ملکلر
قالار حسرت او قانه دونن خاکه فلکلر
فراقینده یاناللار لطافت لی ئورکلر
همان یردی کی غارت اولوب قانلی لچکلر
علاماتِ بلا وار حسینون حرمینده
کی هر درده دوا وار حسینون حرمینده
.
.
بو توپراقیدن اشرف مگر واردی جهاندا
اونون شور و صفاسی گلوب فاش و نهاندا
محبّت او مکانه یازیلمیش تن و جاندا
او صحنه باش اگللر گدالرده شهاندا
صفای ِ نُجَبا وار حسینون حرمینده
کی هر درده دوا وار حسینون حرمینده
.
.
اولِیدی او گون الله صفا قلبه سالیدیم
او شش گوشه مزارین براتین من آلیدیم
گئدوب تا نفسیم وار او مأواده قالیدیم
او درگهده کیچیلجاق جهاندا اوجالیدیم
فنا یوخدی بقا وار حسینون حرمینده
کی هر درده دوا وار حسینون حرمینده
.
.
.
اونون صحن و سراسی رواق حقه بنزر
یر اوستونده دی اما گویون عرشینه منظر
مقام ائتمیش او یرده جمالُ اللهه مظهر
سالوب کشتی ایمان او گردابیده لنگر
یقین قبله نما وار حسینون حرمینده
کی هر درده دوا وار حسینون حرمینده
.
.
نوای ملکوت اذان وار اوحرمده
سلام و صلواتی آلان وار اوحرمده
گوزللیقدا صفای جنان وار اوحرمده
دیوللرکی ئولن جسمه جان وار اوحرمده
کرامات خدا وار حسینون حرمینده
کی هر درده دوا وار حسینون حرمینده
.
.
طویون حجله سی یاسه دونوب غم اتاقیندا
صولوب غنچۀ عطشان طراوت بوداقیندا
سوکوبدور بوغازون اوخ حسینون قوجاقیندا
ئولونجه آناسی قالدی گونلر قاباقیندا
قضایایِ منا وار حسینون حرمینده
کی هر درده دوا وار حسینون حرمینده
.
.
.
بو توپراقیده قانه باتوب سرور احرار
دوشوب توپراقا آتدان ابوالفضل علمدار
گئچوب ایکی قولوندان ره حقده او سردار
بیرایش گوردی کی نوفل چاتوبدی باشا طومار
سینان باشه نما وار حسینون حرمینده
کی هر درده دوا وار حسینون حرمینده
.
.
بو توپراقد ا «مُصَیـّب» سینوب شهپر ایمان
او شش گوشه حرمده یاتوب شاه شهیدان
ئوزی اوغلی اخاسی باتوب قانه لب عطشان
سینوب رکن هدایت چیخوب نیزیه قرآن
کسیک باشه جدا وار حسینون حرمینده
کی هر درده دوا وار حسینون حرمینده
.
.
#حسینیه_مدح
#کربلا_آرزوی_کربلا
#نه_قدر_عشق_و_صفا_وار_حسینون_حرمینده
#مصیبی_تبریزی
#ترکی
.
#زبدةالاشعار
.
: @nohe_torki