حضرت رباب در کوفه
در وفای بانوی وفاپیشه حضرت رباب (س)
احوالات کوفه – مجلس ابن زیاد
.
#زبدةالاشعار
.
: @nohe_torki
.
مرحوم انور اردبیلی
.
نوش ائتسه کیم خلوصیله جام محبتی
سوز یوخ تاپار نتیجه ده کام محبتی
.
اوّلده صانع ازلی لطفله ئوزی
تکمیل ائدوبدی نظم و نظام محبتی
.
خلق ائتدیگین محبتله ساخلیوب خدا
نابود اولار آزالسا قوام محبتی
.
اولادینه آتا آنانی مهربان ائدوب
تفهیم ائدوبدی خلقه مقام محبتی
.
قلب خلایقه بو محبت ودیعه دور
خوشلار گوگل قوشی اودی بام محبتی
.
.
پروانه گرم اولور بلی باتدوقجا شعلیه
چون فطرتینده واردی مرام محبتی
.
زاغ و زغن همیشه خزانی چوخ ایستیور
آهو فلاتی کبک خرام محبتی
.
بلبل گلی، خرابه یری جغد خوشلیور
هدهد بهاری شب پره شام محبتی
.
چوخ چوخدی بو زمینه ده سوز مطلبیم قالور
ویرسم سمند طبعه لجام محبتی
.
مهر حسیندور سیزی بو مجلسه چکن
خون و رگوزده واردی دوام محبتی
.
انسانلارا بو رهبر آزاده نون بلی
درس شرف وئروبدی قیام محبتی
.
بیر نکته وار یازوم اونی اولسون مقدمه
گرم ایلیک بو یرده کلام محبتی
.
احباب و آشنالرینه شاه کربلا
پیغام ائدور ئوزی بو پیام محبتی
.
چوخدور علاقه منده رباب و سکینیه
الدن بولار آلوبدی زمام محبتی
.
.
من بو ایکی آنا بالانی آرتوق ایستورم
طاقت یوخومدى یوزلرینی دوتسا گرد غم
.
.
مد نظرده هر بیرینون چوخدی حرمتی
کنز زمانه ده بولارون یوخدی قیمتی
.
هر کیمسه دوتسا بو ایکی موجودی محترم
حتى بو قلبیمون اونادا وار محبتی
.
من خوشلارام رباب و سکینه اولان ایوی
وار گوگلیمون بو ایکی آدا شوق و رغبتی
.
چوخدور قزیم سکینه ده تمکینیله وقار
زیبادی خلق و سیرتی هم طرز صحبتی
.
ایلور کلامین عمه سی زینب کیمی ادا
خوشدور بیانی منطقینون واردى قدرتی
.
شیرین سوزی آناسی رباب اورگدوب بونا
عصمتلی عمه لردن آلوب درس عصمتی
.
ئولسم بوقز منه هامودان آرتوق آغلیار
عالملره موثر اولار اشک رقّتی
.
با اینهمه وفاده یتیشمز آناسینه
گنجینه دور وفایه ربابون طبیعتی
.
چوخدور اورکده عشقی بیزیم آستانیه
بیر پارچا مهر و عاطفه دور پاک طینتی
.
مین قصریله عوض ایلمز صحن خانه می
رفتاری خوشدی واردی پسندیده الفتی
.
اسمایه عار اولا حسنی ایلدی شهید
مشهور اولور جهانه ربابون حقیقتی
.
زینب منه کمکچی اولار زینبه رباب
کیم زینبه کمکدی منه واردی منتی
.
زینب قرا گینده بودا قاره پوش اولار
سهمیۀ عزاده بونون چوخدی قسمتی
.
آینده سی گواه اولاجاقدور بو سوزلره
دنیانی آغلادار سانا گلمز مصیبتی
.
.
ای خامه کوفیه سوزی چکن کچ بو بابدن
شرح ایله بیر نمونه وفای ربابدن
.
.
مرجانه اوغلی بزم ستم ائتدی برقرار
اطرافین آلدی فوج شیوخ جفا شعار
.
چکمیشدی نقشه زینبی مجلسده سندیرا
تجلیل ائده یزیدیدن اول مرد نابکار
.
بیلموردی فاطمه قزی آتش زبانیدور
منطقده آتشیندی مؤثر بیانی وار
.
دوتدی یوزین تبختریله زینبه دئدی
حقّ بنی امیه سیزی ایلیوبدی خوار
.
شکریم واریمدی درگه ذات الهیه
رسوا سیزی یزیدی ولی ائتدی کامکار
.
اگلشدی دوردی قارداشون هر بزمیده دئدی
تقواسی زهدی یوخدی یزید اوینیور قمار
.
نادیده دوتدی حق سلام و قرابتی
صلح و صفانی بوشلادی جنگ ائتدی اختیار
.
گه مسند خلافته من افضلم دئدی
گه جدینه آتاسینه گه قیلدی افتخار
.
باش ساخلیا چتیندی یزیده باش اگمین
باش اگمدی بلایه اوزون ایلدی دچار
.
سالدى سنی بو حالدا کمند اسارته
اگلشموسن بو بزمیده مأیوس و شرمسار
.
سن شهر کوفه ده خانمیدون یادوندادی
الدن نجه خانملوقوی آلدى روزگار
.
باشه یغوب اسیرلری دینموسن نیه
سنکه فصیحه سن سوزوی ایله آشکار
.
دینموردی غفلت هیجان گلدی زینبه
قفل سکوتی آچدی او گنجینۀ وقار
.
فرمایش ائتدی زادۀ مرجانیه دایان
ناحق سوزیله ورما منیم قلبیمه شرار
.
.
بی آبرو یالان سوزی ایله حیا دیمه
عالم تانور حسینی اوتان افترا دیمه
.
.
نور دو عین حضرت خاتمدی قارداشیم
صدق و صفاده زینت عالمدى قارداشیم
.
سلطان عادلیدی باش اگمزدی ظالمه
آزاده خلقه قائد اعظمدی قارداشیم
.
آل امیه ساخلامادی احترامین
آل اللهه عزیز و مکرّمدی قارداشیم
.
اسلامیدن اوزاقدی یزیدون رویه سی
قرآنیله رَویه ده باهمدی قارداشیم
.
عمامه گیتدی تاج شهادت قویوب باشا
اورنگ حقه میر معظمدی قارداشیم
.
شاهد شهادتیله تاپار قرب عزّتی
عزّت مقامی مفخر آدمدی قارداشیم
.
بیگانه دور حقیقته نسلی سمیّه نون
راز حقیقته ولی محردی قارداشیم
.
کسدوز باشین باشندا گنه شور عشق وار
شامه گیدور اراده ده محکمدی قارداشیم
.
وئر بیر قویوم أورک باشنا قانلو باشینی
سوز درون سینمه مرحمدی قارداشیم
.
پروانه تک گورور یانورام سوز عشقینه
قلبیمده کی محبته اعلمدى قارداشیم
.
باخدی دولی گوزیله منه یومدی گوزلرین
منله شریک معرکۀ غمدی قارداشیم
.
دیل یاره سی قبولیدی وورما حسینیمی
مندن جوار حقه مقدمدی قارداشیم
.
گل بیر ترحمه یوزونون وئر کولون سیلوم
یاتمش کول اوسته حالتی برهمدی قارداشیم
.
سن خیزران آلوبسان اله منده زلفیمی
آغلور بو حاله دیدہ سی پرنمدی قارداشیم
.
.
من زینبم حسین قاننى قویمارام باتا
ناکس یزید ظلم ایلیوب مقصده چاتا
.
.
فکر ائتمه ذره وار دل زینبده اضطراب
سن سهلسن امیریویده ایلرم مجاب
.
ذاتون خبیثدور سنه مرجانه صود وئروب
ناپاک صود امن لر ائدر ظلم بی حساب
.
قارداشسیزام حیا ائله آهیم دوتار سنی
قوی دردیمی چکوم ائلمه قلبیمی کباب
.
اینجیتمه یورقونام باشیمون واردی یاره سی
آق زلفیمه بو شهریده قان ائتمیشم خضاب
.
من صحبت ائتدوگیجه فشاره دوشور یارام
گیسولریمه قان آخور ای خانمان خراب
.
ابن زیاده گلدی گران زینبون سوزی
غیظه گتوردی قلبینی بو آتشین جواب
.
زینبدن ال چکوب الین آتدی کسوک باشا
سیماسینه نظاره قیلوب ایلدی خطاب
.
چوخ خوشدی دیشلرون ولی چوخ تز قوجالموسان
حسرتله ئولدون اولمادون عالمدہ کامیاب
.
بیر قطره قان او یاره لی باشدان او بزمیده
دوشدی وئروبدی ران عبیداللهه عذاب
.
ابن زیاد حسین باشینی آتدى مجلسه
دارالامارہ نی بورودی آتش عقاب
.
ائتدی اراده زادۀ مرجانه قاچماقا
سس گلدی غیبیدن ائدوسن قاچماقا شتاب
.
دنیا اودیندان ایلیوسن بو قدر هراس
نار جهنمه ائده جکسن نه نوعی تاب
.
قاچدی قاچان دوتوبدی دل خلقی واهمه
خلوتسرا او بزمی گوروب آل بو تراب
.
بیر یا حسین دیدی وسط مجلسه قاچوب
یردن یارالی باشی گوتوردی خانم رباب
.
.
قلبیم دیدی خدنگ بلایه نشانه دور
من آغلیرام سنه علی اصغر بهانه دور
.
.
اوچ گوندی تنگ اولوب منه دنیای پرفتن
قلبیم یانور شراره چکور آتش محن
.
اغیار مجلسینده کرم قیل کنیزوه
احوالیمی سوروش منیم ای شاه ممتحن
.
دوزمزدون هیچ زمانه ده محزون اولا رباب
کم لطف اولوب سوروشمیوسان حالیمی ندن
.
ئوز دردیمی دئسم پوزارام حالوی سنون
قان آغلادار کسوک باشوی باشیمه گلن
.
سربسته ساخلیرام سوزومی صحن خانیه
ئوز سرگذشتوی منه کشف ایله باری سن
.
کیم گتدی کوفیه یارالی باشووی آقا
اولسون فنا بو آیریلقون نقشه سین چکن
.
مهمانیدون اگر نیه مطبخده یاتموسان
مهمان اولوب تنوره مگر هانسی حق دیین
.
معجرده یوخدی قانلو گوزوندن سیلم کولی
شرمنده ام بو باره ده ای سید زمن
.
کرب و بلانی ترک ایلینده قطاریمیز
گوردوم یارالی جسمووی بی غسل و بی کفن
.
معجر سویان قوشون ائله سویموشدی پیکرون
قالمشدی نه عبا و ردا و نه پیرهن
.
دوندردی زحمتیله باجون آرخان اوستنه
دوشمشدی سینه اوسته او اوراق اولان بدن
.
عهد ائتمیشم یانام گون ایوینده سنون کیمی
تشبیه ائده کنیزه بو رخساریمی گورن
.
یوللاردا ئولمه سم ائدرم عهدیمه وفا
قلبیم گوزیله هی باخارام قتلگاهه من
.
ای کاش ئولم مدینه نی هیچ گورمیه گوزوم
سنسیز کنیزوه آقا زندان اولار وطن
.
یاز سون بوسوزلری اگر از روی اعتقاد
«انور» سنه حسینه گوره سهل اولار معاد
.
.
.
#مجلس_ابن_زیاد_انور_اردبیلی
#کوفه_حضرت_رباب
#نوش_ائتسه_کیم_خلوصیله_جام_محبتی
#ترکی #یادگار_انور
.
#زبدةالاشعار
.
: @nohe_torki
نظر دهید