هر کس غم و محنتده ابوالفضلی چاغورسا #عباسیه_علومی_تبریزی

توسل به حضرت ابوالفضل (ع)
گریز به وداع و شهادت
.
.
.
علومی تبریزی
.
.
هر کس غم و محنتده ابوالفضلی چاغورسا
هنگامه زحمتده ابوالفضلی چاغورسا
.
دامان ابوالفضلی اگر صدقیله دوتسا
درمانده و حسرتده ابوالفضلی چاغورسا
.
قلبینده ریا اولماسا اخلاصیله گلسه
پنهانیده خلوتده ابوالفضلی چاغورسا
.
مأیوس ایلمز آند اولا قارداشی حسینه
هر کیمسه حقیقتیده ابوالفضلی چاغورسا
.
زهرا ایده جاق هر کسه صدقیله شفاعت
گر روز قیامتده ابوالفضلی چاغورسا
.
غمدن قوتولار دار فناده او کسی که
هنگام مصیبتده ابوالفضلی چاغورسا
.
بو باب الحوائجدی یتر کامه جهاندا
هر کیمسنه حاجتده ابوالفضلی چاغورسا
.
قویماز بیرینی بندیده هر بندۀ آزاد
وار بیله روایتده ابوالفضلی چاغورسا
.
.
یاز سنده قلم واقعۀ کرب و بلاسین
برپا ایله عبّاس و ابوالفضلین عزاسین
.
.
///اجازه جهاد حضرت عباس///
.
گلزار امامتده گورن وقته خزان وار
لب تشنه گوروب قانه باتوب هر نه جوان وار
.
بیکسدی کومک سیزدی حسین فاطمه اوغلی
رخسار شریفونده اونون اشگ روان وار
.
بیر سمتده قزلار دولانور الده سو جامی
گوز یاشی توکور اهل حرم آه و فغان وار
.
زهرا قزی زینب باخوری قارداشا آغلور
دوردی دیدی منده نه قَدَر تاب و توان وار
.
گلدی شه دین محضرینه شوریله عباس
عرض ایلدی باشیمدا منیم شوق جنان وار
.
ویر سیّدی رخصت منه میدانه قویوم یوز
بیلمولّه ابوالفضل کیمی شیر ژیان وار
.
بو لشگر شامین داغیدوم نظم و نظامین
آخر گوره لر اکبریوین قانین آلان وار
.
من شیر خدا اوغلیام ای شاه لب عطشان
حق شیری علیدن بیلوسن منده نشان وار
.
قول باغلو عمر سعدی گتورّم بو حضوره
بلمور او ستمگر هله بو جسمده جان وار
.
سقّا من اولام آب فراتی دوتا دشمن
چیگنیمده منیم چون بیله بیر بار گران وار
.
.
عبّاسی بو حالتده گورنده شه عطشان
قول بوینونا سالدی دیدی قارداش سنه قربان
.
.
///وداع حضرت ابوالفضل با امام///
.
سنسن بو بیاباندا منیم یاریم ابوالفضل
گئتسن کیم اولار یار و هواداریم ابوالفضل
.
وارسان هله وار عترتیمون صبری بلایه
سنسیز پوزولار ظلمیله پرگاریم ابوالفضل
.
هر چند بو صحراده باتوب قانه جوانلار
اما وار علم الده علمداریم ابوالفضل
.
یوخ رحم و مروّت بو جماعتده گورورسن
لب تشنه قالوب عترت اطهاریم ابوالفضل
.
سو آلماقا گیت ایمدیکه میدانه گیدورسن
سیراب اولا بلکه گل و گلزاریم ابوالفضل
.
چوخ عرصه نی تنگ ایلمه بو لشگر شامه
شامه گیده جاق زینب غم خواریم ابوالفضل
.
بیر مشک سو ممکن اولا آل اهل جفادن
عجز ایلمه چوخ لشگره سرداریم ابوالفضل
.
من نیلرم ئولدورسه سنی دشمن کافر
بُلّم که قالار محشره دیداریم ابوالفضل
.
بو عرصه ده بیز مکتب اسلامه فدایوخ
دنیانی دوتار نهضت خونباریم ابوالفضل
.
.
اسلام علمین آلدى اله گتدی قتاله
بلمم او زمان اهل حرم قالدى نه حاله
.
.
///جهاد حضرت ابوالفضل///

میدانه گلوب سرعتیله حیدر ثانی
بو منظره حیرتده قویوب اهل جفانی
.
چوخ موعظه ایتدی سپهه ائتمدی تأثیر
بیر حمله ده تنگ ایلدی اشراره فضانی
.
سردارلر ئولدی داغلوب یاتدی علم لر
توپراقه ویروب سالدى قباقنده دورانی
.
ناچار آچلوب یول اؤزینی سالدى فراته
سو ایچمدی یاد ایلدی شاه شهدانی
.
سو مشکنی دولدوردی چخوب خیمیه گئتسون
دوتدی قباقین جرأتیله دشمن جانی
.
ایستردی سویی خیمه ده اطفاله یتورسون
دشمن ولی تهدید ایلوردی او جوانی
.
جرئت یوخیدی کیمسه مقابلده دایانسون
اما اله آلموشدی هامو تیر و کمانی
.
اوخ یاغدی یاغش تک ایلدی مشکینی پاره
قولّار قلم اولدی توکلوب ظلمیله قانی
.
بیر صدمه ده ویردی باشنا نوفل بیدین
اولمادی رکاب اوسته دایانماقه توانی
.
قولسوز بدنی ظلمیله آتدان یره دوشدی
عاجزدی قلم یازسون او غملو جریانی
.
آتدان یره دوشماقین ایدوب قارداشا اعلان
میدانه گلوب سرعتیله شاه شهیدان
.
.
///شهادت حضرت عباس///
.
سسلردی علمدارینی میدان آراسندا
تا پدی یارالی قارداشنى قان آراسندا
.
فرمایش ایدوب یاتما عزیزیم بیله راحت
قویما منی یالقوز بو بیابان آراسندا
.
دور گور نه قیامتدی منیم خیمه لریمده
وار منظره اطفال پریشان آراسندا
.
مرهم اله گلسیدی بو صحرای بلاده
باغلاردوم اوزوم یاره وی دونان آراسندا
.
قزلار اؤزون ئولدوردی امیدیم دور ایاقه
آغلاتما منی بیر بیله میدان آراسندا
.
وئرموردوله سو مشکی قویوب کاش گلیدون
کوثر یولوی گوزلوری رضوان آراسندا
.
بیر حاله سالوب جسموی بی رحم جماعت
بنذر او سنق زورقه طوفان آراسندا
.
بو قوم ستمکار بیلور اوزلرین اسلام
وار بیله ستم هانسی مسلمان آراسندا
.
.
محنت شرری سینۀ سلطاندا آلشدی
عبّاس او صون دمده دیله گلدی دانشدی
.
.
///شهادت حضرت عباس ابوالفضل///
.
عرض ایلدی یا سیّدی سعییم هدر اولدی
بو لشگر بی رحمه سوزوم بی اثر اولدی
.
چوخ سعی ایلدیم سو گتورم خیمیه قارداش
او خلاندی سو مشگیم اوخا جسمیم سپر اولدی
.
بو قوم منی ایتدی خجالت حرموندن
سو یتمدی اخیامه ایشیم بی ثمر اولدی
.
قالسیدی سو مشگی گینه قولسوز آپاراردیم
سقّای حرم توش قضا و قدر اولدی
.
تا وار نفسیم قارداش آپارما منی بوردان
گئت پرچم الینده بیله قزلار نلر اولدی
.
شهزاده علی اکبریوین قانینی آلدیم
گوردون که عدو لشگری زیر و زبر اولدی
.
دین اوسته توکولسه یره قانیم نه غمیم وار
بو امر شهادت بیزه ارث پدر اولدی
.
اما بیلورم زینبی یالقوزلادی دشمن
توش غم و اندوه او خونین جگر اولدی
.
.
بو حالده عباسین او شهلا گوزی آخدی
آخر نفسین بیرده چکوب قارداشا باخدی
.
.
.
.
.
#عباسیه #علومی_تبریزی
#عباسیه_شهادت
#هر_کس_غم_و_محنتده_ابوالفضلی_چاغورسا
#ترکی
#زبدةالاشعار