یا علی
.
✍️ #زبدةالاشعار ✍️
.
🆔: @nohe_torki
.
سید عظیم شیروانی
.
هر کیمین مولاسی عالمده شه مردان اولور،
چکمه سین غم کیم اونون هر مشکلی آسان اولور
.
اولسا هر کیم کشتی آل پیمبر ساکینی،
باکی اولماز دهرده گر گونده یوز طوفان اولور
.
هر کیمین کیم حیدر کرّار تک مولاسی وار،
خاطیری خوش، کؤنلو خرم، دائماً شادان اولور
.
خاصّه بو موسم کی اعجاز ید شیر خدا،
دین حق اثباتینا بیر حجّت برهان اولور
.
اول شهنشاه فلک رفعت جهان معدلت،
کیم سلاطینلر اونون درگاهینا دربان اولور
.
دست حق، نفس نبی، میر عرب، شاه عجم،
کیم اونون بیر بنده سی عالملره سلطان اولور
.
اول امام دین و دولت، کیم اونون انکارینین،
دینینه دونیاسینا یوز نقص و یوز نقصان اولور
.
اول شهنشاه ولایت کیم شب معراجدا،
خوان قربوندا اونون شاه رُسُل مهمان اولور
.
ائلییبدیر تازه دن بو معجزی اظهار کیم،
شادلیقیندان خلق عالم گول کیمی خندان اولور
.
باخسا هر کیمسه حقارتله اونون درگاهینا،
چشمینه بالله کی هر مژگانی بیر پیکان اولور
.
بیلمیه ن واجب سجود آستان دولتین،
گر ملکدیر، گر بشر، هم رتبۀ شیطان اولور
.
اولمایان قائل امامتله بو مولا حقّینه،
گر یوز ایل طاعت قیلیرسا، جمله سی عصیان اولور
.
کیمسه اخلاصیله دوتسا بو شهین دامانینی،
قدرده مقداد و بوذر، رتبه ده سلمان اولور
.
ای خدا اول روضه ی پر عطرِ خلد آثارا کیم،
کمترین خادملری اول روضه نین رضوان اولور
.
جامه ی استبرق و سندسدن آلیر خلعتین
هر او کس کیم شور عشقیندن اونون عریان اولور
.
سنسن اول شاه غدیر خم کی حقدن شأنیوه،
مصطفایا آیه ی تبلیغ ایچون فرمان اولور
.
سنسن اول شاه قضا فرمان کی ابراهیم ایچون،
آتش نمرود حؤکمونله گول و ریحان اولور
.
اولماسان گر خضره رهبر ای دلیل کاینات
حشره تک صحرالار ایچره خضر سرگردان اولور
.
.
.
ساقیا! می حسرتیندن ملک تن ویران اولور،
بیر آیاغیله ألیم دوتسان مگر کیم قان اولور
.
وئر منه اول باده دن کیم کیم ترشح ائیلسه،
جامدان هر قطره سی بیر مئهر نور افشان اولور
.
خاصه بو موسم منه می وئر کی ابنای زمان،
ذوق سئیر گولشن و گولزاردان شادان اولور
.
خاصه بو موسم منه می وئر کی خلق روزگار،
واله اعجاز شیر حضرتِ یزدان اولور
.
دست حق نفس نبی میر عرب شاه عجم،
کیم سلاطینله اونون درگاهنه دربان اولور
.
گوشه ی زندان محبّ حیدره گولزار اولور،
دشمن بدخواهینا گولزارلار زندان اولور
.
اول امام حقّ کیم حبّی اونون مؤمنلره،
سینه ده رونق قرارِ مشعل ایمان اولور
.
جمع اولوبدور هر یئره اعیانلار اشخاصلار،
انبساط عیش ایچون یوز بذل و یوز احسان اولور
.
هر محله اؤز بساطین عقد ائدیب پروین کیمی،
زهره تک رقّاصله پاکوب و دست افشان اولور
.
هر طرف انجم کیمی شهرین چراغانین گؤروب،
گئجه لر چشم فلک تا صبحه جن حیران اولور
.
مومکون اولدوقجا هره بیر نوع ائیلر شادلیق،
عیش ائدر مردم غرض هر نحو کیم امکان اولور
.
شئیخلر تسبیح ائدر تهلیل عالیملر دوعا،
روض خوانلار وصف ایچون بیر مرغ خوش الحان اولور
.
گرچه اسماعیل ایچون خلق ایلده بیر قوربان کسر،
سندن اؤترو گونده عالم یاعلی! قوربان اولور
.
رود اولور آب روان گر قهریله قیلسین نظر،
لطفله باخسان اگر، او چشمۀ حیوان اولور
.
یا علی! سنسن او مولا کیم بو فانی دهرده،
شفقتیندن جمله عالم دردینه درمان اولور
.
سنسن اول سرور کی قنبر تک قارا خادیملرین،
هر بیری معنا ایله بیر یوسفِ کنعان اولور
.
سنسن اول مشکل گشا کیم یا علی ،! آدین سنین
صدقله یاد ائده نین هر موشکولو آسان اولور
.
چکمه سین هر بیر ایکی دنیا آرا بیر ذرّه غم،
هر کیمین مولاسی عالمده شه مردان اولور
.
یا علی! سنسن او مولا کیم محبّین دهرده،
گر یوز ایل جرم ائیله سه، مستوجب غُفران اولور
.
ذات پاکین اولدو مظهر گر چه حق اثباتینا،
لطف و قهرین مظهری فردوس و هم نئیران اولور
.
«سیّد» بیچاره بیر کمتر غلامیندیر سنین،
لطفله قیلسان نظر، هم رتبۀ «حسّان» اولور
.
.
#هر_کیمین_مولاسی_عالمده_شه_مردان_اولور
#حیدریه_مدح
#ترکی
.
✍️ #زبدةالاشعار ✍️
.
🆔: @nohe_torki
![](https://zobdatolashaar.ir/wp-content/uploads/2020/07/حیدریه01-740x518.jpg)
نظر دهید