ویرانه ده رقیه دل داغداریله #حضرت_رقیه_فریدی

زبانحال حضرت رقیه (س) در خرابه شام
..
..
..
حاج علی اصغر فریدی
..
..
..
ویرانه ده رقیّه دل داغداریله
شام ایتدی گوندوزین الم بیشماریله
…
هر قدری دیندیرردیله دینمزدی بو بالا
توپراقلارا قویاردی یوزین آه و زاریله
…
سویلردی هارداسان على قارداش اماندی گل
گور بیر گونوم گیچور نجه بو روزگاریله
…
توپراقلار اوستی گوشۀ ویرانه دور یریم
یوخ بیر نفر انیس اولا بو دلفکاریله
…
شام اهلی اینجدوبدی زبس جانه گلمشم
ساق قالماقا رضا دگولم بو فشاریله
…
بلبل کیمی صباح و مسا ناله دور ایشیم
قانه دونوبدی اشگ تریم جورو خواریله
…
نه چکمیشم بو شامه گلینجه خدا بولور
اشرار شام و کوفه ایدن انزجاریله
…
من آغلیاندا قمچی وروب زجر باشیمه
طعن ایلیوب منه أو شقی افتخاریله
…
ویرانه ده نه وقته کیمی گوز تیکیم بولا
هجرانیوه دوزوم نجه بو انتظاریله
…
گوزده مجسم ایلرم اول گول جمالوی
گوز کاسه سی لبالب اولار آبشاریله
…
دیبایه ناز ایدردی بو باشیم یاتان زمان
مأنوس اولوب خرابه ده ایندی جداریله
…
بیر یوز کی او لطفییدی گولدن روادی گور
سیلی دگوب گویرده قالا بو قراریله
…
بیر قیز کی اورگشوب عمو قارداش قوجاقینه
ویرانه ده یاتار نجه گور بو وقاریله
…
بیر قول کی لعل و گوهر اونون حسرتین چکر
زنجیره باغلانوب ستم ناگواریله
..
شام اهلی دسته دسته گلولّر خرابیه
قان ایلرم اورکلرینی بیر نظاریله
..
بیر زلف کی اولاردی گلابیله شست شو
آلود اولور خرابه ده ایندی غباریله
..
یازما فریدی بیر بیله ویرانه محنتین
چوخ خوشدی سوز یازولسا اگر اختصاریله
..
..
..
..
#حضرت_رقیه #فریدی #ترکی #زبدةالاشعار #حضرت_رقیه_شهادت