پاکبازان حسین
..
..
..
مرحوم کریمی مراغه ای
..
..
..
پاکیزه دولان اگنیوه گی قاره حسینچی
اوخشات اوزیوی دائم عزاداره حسینچی
..
..
..
نوکرسن اگر ساخلا شئونات حسینی
اخلاصیله درک ایله مقامات حسینی
حالونده گرک گورسنه حالات حسینی
اول صدقیله وابسته بو درباره حسینچی
..
..
..
اوّل آقاوین رتبه و شخصیتین آنلا
منظورینی بول نهضتنون علتین آنلا
اوندان صورا نوکرلقیوین قیمتین آنلا
تا دردیوه بوردان آلاسان چاره حسینچی
..
..
..
لازم دگی وور باشیوه هر روز و شب آغلا
بیر قطره فقط آغلا ولی با ادب آغلا
باخ گور نه دی بو آغلاماقوندا سبب آغلا
کورانه قدم قویما بو بازاره حسینچی
..
..
..
حقا که حیا شمعنه فانوس حسیندور
حقا لغت غیرته قاموس حسیندور
حقا شرف و عزت و ناموس حسیندور
چوخ حفظ ایله ناموسیوی همواره حسینچی
..
..
..
منظور فقط آغلاماق اولسا شه دینه
شمر آغلیوب اولده او سلطان مبینه
قان ویردی حسین سو یرینه گلشن دینه
عزت قازانوب مردم دینداره حسینچی
..
..
..
ال چک بو حسین خاطرینه رنگ و ریادن
آز شعبده باز اول کیشی شرم ایله خدادن
قاچ توطئه دن حیله و تزویر و ریادن
دشمندی حسین چونکه رباخواره حسینچی
..
..
..
تقلید ایلمه ابن زیادیله یزیده
قاچ موسیقی دن گیتمه یاخین فعل پلیده
توهیندی سنون بوعملون شاه شهیده
بیر شرم ایله سنده نه گلوب عاره حسینچی
..
..
..
بسدور کیشی ختم ایله بو تزویر و ریانی
هر مجلسه دعوت ایلمه خیر نسانی
زهرایه مکان ویرمه بو کانون خطانی
وورما یارا اوستن اورگه یاره حسینچی
..
..
..
دوزدور دولانار جمله عزاخانه نی زهرا
هر مجلسه گتمز بونا وار مدرکیم اما
دلّال ربا مجلسی انسیة الحورا
گلمز اوزیوی ایلمه آواره حسینچی
..
..
..
بعضی یازیلان سوزلره ده ایلمه باور
گیت چیخ هر اویوندان آدیوی قوی گینه نوکر
وسعتلیدی دربار حسین اولما مکدّر
بیجادی قولاق ویرمه بو گفتاره حسینچی
..
..
..
بیروقت نمازون گیچه از روی تکاهل
یوخ ارزشی نوکرلقیوین ایتمه تجاهل
فرصت قوتارور بس ندی سنده بو تغافل
بیر توشه گوتور محضر داداره حسینچی
..
..
..
تحریم ایدوب اسلام بیزه شرب قماری
یوخ شارب خمریله حسینون سر و کاری
بیجا یوزیوه ایلمه شور اشگیوی جاری
گوهر یرینه ساتما خریداره حسینچی
..
..
..
دکتر اتگیندن چک الون آلما دوادن
آل نسخه دواخانۀ شاه شهدادن
اخلاصیله بیماریوه ویر خاک شفادن
دارودی حسین تربتی بیماره حسینچی
..
..
..
قرآندا حجاب آیه لرین ایله تلاوت
مستوره لقین رسمینی ویر اهلیوه عادت
زهرایه خانملار گرک ایتسون تبعیت
تقلید ایلسون عترت اطهاره حسینچی
..
..
..
زهرا یخیلاندا در و دیوار آراسندا
دوشدی یوزی اوسته یره اشرار آراسندا
تا گل یوزی گورسنمیه اغیار آراسندا
قویمازدی یوزی کشف اولا اغیاره حسینچی
..
..
..
بیرمرد قوی غیرتی یوخ کان قساوت
یانمش قاپویا تکیه ایدن حامله عورت
بولمم نجه وردی لگد اوز ویردی نه حالت
باجادی سرشگون آخا رخساره حسینچی
..
..
..
گوردی قاپی یاندی دیریلقدان داخی دویدی
فوراً قاپودان چکدی الین سینیه قویدی
مسمار اوجی پیغمبر اؤپن سینه نی اویدی
صندوق غم و غصه اولوب پاره حسینچی
..
..
..
بولمم چاغیروب فضه نی یا شیر خدانی
شه صحنه چیخوب گوردی او غملی جریانی
تعجیلیله چگنندن علی گوتدی عبانی
باخ ساقی کوثرده کی رفتاره حسینچی
..
..
..
تیز سالدی عبانی بدن فخر زنانه
اورگتدی حرم ساخلاماقی پیر و جوانه
ناموسیوی حفظ ایله دیمه دوندی زمانه
مختار ایلیوب یولاما بازاره حسینچی
..
..
..
ای کاش اولیدی بو علی کرب و بلاده
زینب یخیلاندا باش آچوخ بین عداده
بیر صاحب غیرت یوخیدی اهل جفاده
ال ورمیالار معجر زرتاره حسینچی
..
..
..
زینب دیدی کاشا منه بیر یاور اولیدی
یانیمده بو وقتیمده آتام حیدر اولیدی
یا رب یوزیمی دوتماقا بیر معجر اولیدی
باخ عصمت کبرادہ کی اطواره حسینچی
..
..
..
مجبور قالوب تاپمادی بیر حایل صورت
ناچار ایلدی قانه باتان زلفه قناعت
سالدی اشاقا باشنی چوخ اولدی خجالت
مه صورتی گوسترمدی کفاره حسینچی
..
..
..
قورتارما عزیز عمریوی عیش و طربیله
مشغول ایلمه فکریوی لهو و لعبیله
گل درگه والای حسینه ادبیله
دردون دیگلن قولسوز علمداره حسینچی
..
..
..
شهرتده کریمی سگ دربار حسینم
سوددن آچیلان گوندن عزادار حسینم
مداح علی ناشر اشعار حسینم
ایراد ایلمز یازدیقیم اشعاره حسینچی
..
..
..
توفیق اللهیه اولوب حالمه شامل
دنیاده باشاردیقجا وارام دینمه عامل
افعالیمله ایتمرم اشعاریمی باطل
شاید یازالار آدیمی طوماره حسینچی
..
..
..
..
..
#حسینیه #کریمی_مراغه_ای #پندیات_کریمی_مراغه_ای #حسینیه_مدح #ترکی #شاعر #مداح #زبدةالاشعار
نظر دهید