خرابه شام – حالات حضرت رقیه (س)
.
#زبدةالاشعار
.
: @nohe_tork
.
مرحوم عاصی تبریزی
.
چون اولدى آل حیدره ویرانسرا مقام
اولدی جناب زینبه هر صبح شام شام
.
بیر مدّت مدید قالوبلار خرابه ده
قول باغلی دلشکسته عیال شهِ اَنام
.
نه یاتدیلار دویونجا بو مّتده بیر نفس
نه بیر دویونجا ایچدیله سو نه ییوب طعام
.
خوردا اوشاقلارا زبس آجلیق ائدوب اثر
گل تک سولوب سارالدی فسرده اولوب تمام
.
علیا مكرّمه دیریلقدان اولاردی سیر
هر دم دینده بیر بالا ای عمّه من آجام
.
سالموشدی چوخ فشاره غم و غصّه زینبی
گئتمیشدی صبر و طاقتی اولموشدی بی قوام
.
جمعیتین گورردی پریشان و دل غمین
دلدن چکردی آه ائدردی نوا مدام
.
حسرتله گه باخاردی او پوزقون اوشاقلارا
سرشار ائدردی گوزلرین اشگیله، همچو جام
.
بی اختیار سس چکوب آغلاردی اهلبیت
فریادیله دولاردی او ویرانسرای شام
.
قلبین كباب ائدردی اوشاقلار سیزلتسی
اول بی کسین اولاردی گوزینه یوخی حرام
.
هر بیر اوشاق گورردی یاتانمور ائدور نوا
آغوشینه آلاردی ائدردی اوزینه رام
.
گوزدن سیلردی اشگنی از بس دیردی دل
تا اینکه یوخلاداردی بالانی او خوش کلام
.
بو طرزیله گئچدّیله بیر عمر روزگار
ویرانسراده آل خداوند لاینام
.
نه اولدولار خلاص فشار یزیدیدن
نه تاپدی محنت و الم و غصّه اختتام
.
شام اهلی ایستییدی گئده سیر و گردشه
ویرانه دن سالاردی گذارین على الدّوام
.
از بسکه رقّت آوریدی حال اهلبیت
نادم اولاردی گلماقنا فرقۀ ظلام
.
سیره گلن جماعتین آغلاردی چوخلاری
افسرده دل اولاردیلار اول قوم کین مرام
.
زینب اوزی بو قصّه جانسوزه راوی دور
دل ایستوری بو شرح غمه ائیلسون دوام
.
چون سرپرستیدی او خرابه نشینلره
اول بی کسه محوّلیدی نظم و انتظام
.
یاتمازدی یانمینجا بیریسی اوشاقلارین
ائیلردی چوخ مواظبت ایتامه صبح و شام
.
نازین چکردی رغبت تام و تمامیله
وئرمیشدی گوئیا بئله بیر امره التزام
.
حتّی دئیر که بیر گئجه گوردوم رقیه چوخ
ناله ائدر او دختر سلطان مستظام
.
ائتدیم سئوال یاتمامانون علی ندور
گلمور نیه یوخی گوزیوه ای عزیز بالام
.
وئردی جواب عمّه یریم توپراق اوستی دور
جسمیم علیل اینجیری جان قویموری یاتام
.
من عزّتیله تاپموشودوم عمّه پرورش
سالدى غریبه ذلّته بو چرخ نیلفام
.
دائم یاتاردیم عمّه آتا سینه سینده من
جان تک باساردی باغرینا من بی کسی آتام
.
عبّاس عموم منه هامودان مهربانیدی
قویمازدی بیر دقیقه ائده غصّه تلخ کام
.
قارداشیمی گورنده دوراردیم ایاقنه
تعظیم ائدوب ائدردیم الیم سینه ده سلام
.
آغوشنه آلوب اوپوب ایگلردی گل کیمی
اول شبه روی حضرت پیغمبر کرام
.
زردوز معجریم واریدی پرنیان لباس
گورموشدی بو عزیزه قیزون عزّ و احترام
.
ایندی خرابه ده قوری یرده اوزوم اسیر
نه وار باشیمدا چادر و معجر نه بیر لئام
.
بو دللّر آلدی زینبین الدن تواننی
آلدی کناره طاقت و آرام جاننی
.
گویا زبانحالیله اول دخت بوتراب
سویلردی ای رقیّه اولان بستری تراب
.
گلمه بوقدری ناله و افغانه آغلاما
آهون شراری سالدی شرر جانه آغلاما
.
گر بسترون قیزیم قوری یردور یاتانموسان
قوی باشوی بو سینۀ سوزانه آغلاما
.
سن آغلیاندا غصّه ائدور قلبیمی کباب
غمدن دونور دل و جگریم قانه آغلاما
.
رخسار زرده توكمه بئله اشگ آلوی
اشگون وئرور بو عالمی طوفانه آغلاما
.
باخ گور قالور نه حاله آنان آغلیاندا سن
رحم ائتگیلن او غمکش دورانه آغلاما
.
عمریم نه قدری وار چکرم نازیوی سنون
وار هر سوزون سؤله من نالانه آغلاما
.
کهنه لباسیوه باخوب اولما فسرده حال
ائتمه فغان و ناله یانا یانه آغلاما
.
بیرگون اولور رقیّه سفردن گلور آتان
ائیلر لباسیوی گنه شاهانه آغلاما
.
گلسه اگر عمون سنی قویماز بو شهریده
مسکن اولا بو گوشۀ ویرانه آغلاما
.
نیلوم قیزیم یتشمور الیم ائل قبیلمه
بو ورطه دن چکه بیزی بیریانه آغلاما
.
یوخدور بو شامده بیزه بالمرّه آشنا
بیر شهریدور تمامیسی بیگانه آغلاما
.
بو دللّریله ساکت ائدردی او مضطری
گوردی گنه سرشگ توکور یاشلی گوزلری
.
قلبین اووشدورور ائدوری ناله یاتموری
آغلور یواش یواش ابداً سس اوجاتموری
.
ائتدی دوباره ناله سینین علتین سئوال
وئردی جواب عمّه سینه چوخ شکسته حال
.
بیر درد بی دوایه گرفتارم عمه جان
قویمور یوخوم گله اودی بیدارم عمه جان
.
بیر درد دور که چاره سی یوخدور مگر ئولوم
بو دردی چکماقا اودی ناچارم عمه جان
.
نه بو اسیریلیق و نه عمریم گلور باشا
افسرده ام به نوعی دل افگارم عمه جان
.
دور زمانه دن اوره گیم قان اولوب منیم
سرّی او دور که دیده سی خونبارم عمه جان
.
تا من وارام بو درد منیله انیس دور
منله بو درد وار نه قدر وارم عمّه جان
.
عمریم بهارینه یتشوب صرصر خزان
جاندان سالوب حیاتیمه بیزارم عمه جان
.
نولدی مدینه بس هانی عزّتلی گونلریم
ذلّتلره من ایندی گرفتارم عمه جان
.
آلموش اسیریلیق غمى الدن قراریمی
دردیله دولدوروبدی بو قلب نگاریمی
.
بی جا یره بو گوز یاشیم آخمور عذاریمه
هر سمتدن سپاه غم آلموش کناریمی
.
آجلیق غریبلوق قوری یر خصم سنگدل
فریاد و آه و ناله ائدوبدور شعاریمی
.
هر صبح و شام ایسترم الله ذوالجلال
باشه وئره بو زندگی مستعاریمی
.
خوشدور منه ممات بو نوعی حیاتیدن
بو نه حیاتیدور که آلوب اختیاریمی
.
نه درده تاب وار و نه بو حالته دوزوم
وضعیتیم الیمدن آلوب بردباریمی
.
گاهی لباسیمه باخورام قلبیم اود دوتور
سالّام خیاله گاه گئچن روزگاریمی
.
دردیم اورکده شدت ائدور حالیمی پوزور
بی اختیار فاش ائدوری آہ و زاریمی
.
هی ایستورم که دردیمی سیزدن نهان ائدیم
اشگیم یازور عذاره غم جان شکاریمی
.
بیر عمریدور که سیزلری ناراحت ائتموشم
معذور دوت قبول ائله بو اعتذاریمی
.
نیلوم ای عمه آغلاماقیم بی سبب دگول
معلومدور سنه گوروسن وضع کاریمی
.
گر قسمت ائتسه لر بو جهان اهلینه یقین
تاب ایلمز بو محنت و رنج و فشاریمی
.
عمّه منم بو سنّیمیله ائتموشم هدف
پیکان محنت و المه جسم زاریمی
.
بیجا دگول خرابه ده من مسكن ائتموشم
ویرانه دن من آختارورام اوز نگاریمی
.
بو تزلقیله دامن وصلی دوشر اله
سوندورّم اوندا دلده کی هجران شراریمی
.
گوز تیکمیشم گلن یولونا، هر صباح و شام
گوزلر گوزوم همیشه شهِ تاجداریمی
.
آیریلمارام اگر بابامی تاپسام عمه جان
قیلّام نثار مقدمینه جان نزاریمی
.
اولماز رضا بو قالماقیما ائتمیشم یقین
وئرسم اگر نشان اونا نیلی عذاریمی
.
چون چوخ سُؤَر منی اودی هیهات داغلیا
داغ فراقیله بو دل داغداریمی
.
بیر عمریدور که زحمتیمه دوزموسن منیم
سوندورمیسن محبّتیله دلده ناریمی
.
من آغلیاندا قویماموسان دست لطفوله
پاک ائتموسن بو دیدۂ پر اشگباریمی
.
سن بو جلالتیله او شأن و وقاریله
حفظ ائتموسن منیمده شئون و وقاریمی
.
مین لطفیله محبّت بی انتهائیله
گوگلومدن آلموسان الم بیشماریمی
.
سینون بو دلشکستیه سن بستر ائتموسن
آرترموسان بو رأفتیله اعتباریمی
.
بیر زحمتیم قالور اونی ائتسن اگر قبول
قیلّام ثنا همیشه خداوندگاریمی
.
ئولسم همین خرابه ده قیل غسل و کفنمی
قاز بو محلّ محنت و غمده مزاریمی
.
دفن ائیله اوز الونله منِ بینوانی سن
توپراقدا قیل نهان بوتن زخمداریمی
.
یاز نبریم اوسته غصّه لریمدن مقدمه
ایام نامساعد و ناسازگاریمی
.
صغرایه بیرده ئولمگمی وئرگیلن خبر
مدّتدی منتظر دی چکور انتظاریمی
.
بولسون که اولدی بیرده منی گورمانی محال
دوشموش مدینیه داخی گورمز گذرایمی
.
«عاصی» دوشوبدی مشگله عرض ائیله عمّه وه
مشکلده قویما عمّه او خدمتگذاریمی
.
دردیمی بیر امیدیله کشف ائیلدیم سنه
مأیوس ائیلمه دل امّیدواریمی
.
#خرابه_شام #عاصی_تبریزی
#حضرت_رقیه_شهادت
#چون_اولدى_آل_حیدره_ویرانسرا_مقام
#ترکی
.
#زبدةالاشعار
.
: @nohe_tork
نظر دهید