چون قدم قویدی ترابه نور چشم بوتراب #حسینیه_عامل_سرابی

در ولادت حضرت امام حسین (ع)
.
مرحوم عامل سرابی
.
چون قدم قویدی ترابه نور چشم بوتراب
سویلدی عرش برین ، یا لیتنی کنت تراب
.
.
جان مریم ، روح روح اللّهه اولدی حامله
یتدی عقل اوّلین مقصودی حدّ کامله
امر اولوب لعیایه بو مولوده اولسون قابله
حقّ ایده انسیّه ی حورانی خلقه انتخاب
.
.
صبح صادق جلوه گاهیندن ایدن دمده ظهور
تازه دن موسایه اولدی آشکارا شرق طور
ایتدی دنیانی منوّر آیه ی الله نور
زهره ی زهرادن اولدی آشکارا آفتاب
.
.
واریدی لعیایه یتمیش مین بهشته خادمه
خدمتین کمتر ایدن حوری ، اولوردی نادمه
حکم اولوب اولسون شرفیاب حضور فاطمه
ایلسون زهرایه خدمت تا که اولسون کامیاب
.
.
بیله بولمه قابله اولماقه بیر لعیا گلوب
حور عین و هم خدیجه ، مریم کبری گلوب
آسیه ، بلقیس و حوّا ، هاجر و سارا گلوب
صف چکوب حوران جنّت ، با کمال احتجاب
.
.
سیر ایدوب لاهوتیدن ناسوته چون نور حسین
انفس و آفاقی محو نور ایدوب طور حسین
اولماقا دایه گلوب جبریل مأمور حسین
پر آچوب ، شهپر ووروب ، مین شوریله قیلدی شتاب
.
.
بیرده جبریل امین گلدی او شاهین یانینه
عرصه گاه کربلاده غرق اولاندا قانینه
آچدی شهپر ، سالدی سایه پیکر عریانینه
ایتمیشدی ضعف ، گوز آچدی قیلدی جبریله خطاب
.
.
جبرئیلا سالما سایه پیکر عریانیمه
قوی حرارت ایلسون تأثیر جسم و جانیمه
من بو نوعیله گرک جان تاپشورام جانانیمه
عاشق و معشوق آراسیندا دگل لازم حجاب
.
.
جبرئیلا کشته ی عشقین اولار گر غسلی قان
ایستمز گونلر قباقینده بیر اوزگه سایبان
شهپرون ایله کناره ، قوی ویروم آسوده جان
جانه منّتدور که مین دفعه دگه تیر شهاب
.
.
دستماز آلماقه تکلیف ایتمه آب سلسبیل
قانیله قربان عشق ایلر وضو یا جبرئیل
وار سویون گیت خیمه گاهه،سسله عطشان السّبیل
یاندی اطفالیم سوسوزدان ، جبرئیلا قیل ثواب
.
.
جبرئیلا چکمه زحمت ، شهپر بیجا ندور
عشق اودوندا یانماقا پروانیه پروا ندور
ایله مستم بولمورم دنیا و ما فیها ندور
گون قباقینده بو عریان پیکریم اولسون کباب
.
.
جبرئیلا احتیاجیم یوخدی ظلّ شهپره
آرزوی خدمتون گر اوسا آل حیدره
گیت دولان تاپ نعشینی سال سایه اوغلوم اکبره
قویما یانسون اول شبیه صورت ختمی مآب
.
.
شاهباز ذروه ی اعلا دوشوب بی پرّ و ال
گون اونا گر سالسا سوزش ، منده آرتار ابتهال
گیت کنار نهرده سایه علمدار اوسته سال
قوی زیادت ایلسون سوز و گدازیم جبرئیل
.
.
صف چکوب ،صف صف دوزلموش جمله دورموش انبیا
یوز ایگرمی دورت مین ارواحیله یکسر اوصیا
من امامم ، سن دئ تکبیر ، ایلسونلر اقتدا
درگه حقده قبول اولسون نمازیم جبرئیل
.
.
بارور اولدوقجا نخل،اول نخل اولار بس سنگسار
ایلیر هر دست رس هر دست نارس سنگسار
ایلیوب علّت اودور هر ناکس و کس سنگسار
نیزه و اوخلار اولوب دست درازیم جبرئیل

.

#حسینیه #حسینیه_میلادیه #عامل_سرابی #ترکی #زبدةالاشعار