حالات حضرت مسلم ابن عقیل (ع)
..
..
..
عینی فرد زنجانی
..
..
..
چکیلدی منبر و مساجده قراسی مسلمون
حسین عزاسینی خبر ویرور عزاسی مسلمون
..
طلایه دار نهضت حسیندور او نامدار
وروبدی شهر کوفه ده علم وفاسی مسلمون
..
ورق ووراندا دفتر حماسۀ حسینیدن
اَوَل عیان اولور گوزه غم و رثاسی مسلمون
..
رسولی آغلادوب اونون ولادتی شهادتی
هم ابتداسی غملیدور هم انتهاسی مسلمون
..
بو هاشمی نسبدن هیچ اثر یوخیدی دهریده
رسول دینینی قبول ایدوب آتاسی مسلمون
باخوبدى ختم الانبیاء عقیله توکدی گوزیاشین
بویوردی گلسه عالمه بونون بالاسی مسلمون
..
باشندا وار قضیه سی قوتارمیاندی قصه سی
پوزار حسینی غصّه سی غم و بلاسی مسلمون
..
حسین یولوندا کوفه ده غریب و دربدر اولار
نه باشدا یار و یاوری نه اقرباسی مسلمون
..
اونون مصیبتنده هر گوز آغلاسا عزیز اولار
جزاسینی بهشت ایدر حق علاسی مسلمون
..
غرض دولاندی چرخ دون اولیدی کاش سرنگون
مدینه ده چخوب حسین او دلرباسی مسلمون
..
اون ایکی مین حسینه کوفیان نامه یازدیلار
سفیر گوندروب اونی کریم ناسی مسلمون
..
یزید پست و بی حیا اولوبدی خلقه پیشوا
حسینه بیعت آلماقا اولوب بناسی مسلمون
..
چاغیردی محضره حسین سفیر پارساسینی
برابرینه آچدی دفتر سیاسی مسلمون
..
بلوردی واردی زهد و عشق و علم و حلم و قدرتی
علائمین نشان ویروردی اعتلاسی مسلمون
..
نیابت آلدی شاهدن گون آیریلوبدی ماهیدن
گل آیریلوب گیاهدن چخوب نواسی مسلمون
..
امامیلن قوجاخلاشوب یواش یواش اوزاخلاشوب
تمام حرملر آغلاشیب باخوب بالاسى مسلمون
..
قدر کتاب محنتی آچوب قضا ورق وروب
مقدّر اولدی تار و مار اولا اساسی مسلمون
..
صفائیلن ایدوبدی سعی مکه دن وداع ایدیب
سواد کوفه ده اولوب بلا بَداسی مسلمون
..
بیریسی اللرین اؤپوب بیری قدملرین اؤپوب
دیردیلر اولیدی جانیمیز فداسی مسلمون
..
جهانی حیرته سالیب بو پیشواز کم نظیر
نه بیله جان فدا دین نه ایله یاسی مسلمون
باخان حسین سفیرینه سپردی گل مسیرینه
گله جوان و پیرینه دیور قاداسی مسلمون
..
قدم قویاردی هر یره مساجد و معابره
آچاردی منظره گوزونده مامَضاسی مسلمون
..
صاقا باخاردی دردیلن صولا باخاردی دل محن
دوشردی یاده مرتضی و مجتباسی مسلمون
..
دولاندی شاه لافتا مزارینه سلام ایدیب
دگلدی مرقد علی نه چون خِفاسی مسلمون
..
اگرچه خلق بیلمیوردی هیچ نجف هایاندادور
بیلوردی هاردادی ولی او ذوالعطاسی مسلمون
..
صورا خبر ویروب گلور حسین کاروانیلن
اونون لواسیدور الینده بو لواسی مسلمون
..
بو کوفیاندا خاطرات خوش گورونمیوب عمو
گلور یازوبلا نامه سبط مصطفاسی مسلمون
..
عمو سالاندا یاده من باشون یاراسین آغلارام
که قورخورام شهید اولا حسین آقاسی مسلمون
..
بلی او قدری کچمدی عوض اولوبدی کوفیان
پوزولدی طمطراق و جاه و ارتقاسی مسلمون
..
یزید بلدی مکّه دن حسین عراقه عزم ایدیب
همیشه واردی خلقیلن مدام تماسی مسلمون
..
اولوبدی مضطرب اگر یتیشسه کوفیه حسین
یقین حکومته چاتار شه ولاسی مسلمون
..
زیادین اوغلون ایستدی خصوصی مطرح ایلدی
دیدی گرکدی تپراقا آخا دماسی مسلمون
..
یغوبدی یرمی مین نفر حسینه بیعت ایلین
یتیشدى کوفه شهرینه او پیشواسی مسلمون
..
آتاسی مرتضی کیمی الینده ذوالفقاری وار
دمشقه حمله ایتسه پور لافتاسی مسلمون
..
نه سن نه من تمام شام اگر قیام ایده یخار
گرکدی سرنگون اولا بو گون لواسی مسلمون
..
عقیلون اوغلى کوفه ده یقین على یولون گیدور
قوشونی ساخلاسون هانی زر و طلاسی مسلمون
..
خزانه نی آچام گرکدی خلقی من دویوزدورام
بو نحویلن سقوط ایدر بُن تُقاسى مسلمون
..
حسینه کوفیان یازوبدی نامه منتظردیلر
گرکدی باشه چاتماسین بو ادعاسی مسلمون
..
اوزیوی مکریلن یتور حسین آدیلا کوفیه
امیدی ناامید اولار گیدر بقاسی مسلمون
..
مقام و پولدان اؤتری چوخلار اؤزلرین ساتیب
گیدوب داغیلدی یرمی مین باشندا آشناسی مسلمون
..
اولیدی کوفه نی خراب قالوبدى یالقوز اول جناب
ئورکلری ایدور کباب بو ماجراسی مسلمون
..
قویوبلا جایزه اونون یرین نشان ویرنلره
قالوبدی کیملرون الینده آخ یخاسی مسلمون
..
نه واردی ملک شخصی و نه رهن اولان عمارتی
بیر عده دنده قرض آلوب بودور صفاسی مسلمون
..
اودور که گوزلر آغلوری اولونجا حشر مسلمه
آتوبدی خلق اونی دوتوبدی کبریاسی مسلمون
..
گزر او کوچه لرده که گزردی بیر زمان علی
غذا ویروبدی ایو به ایو او ذوالعطاسی مسلمون
..
ولی ،عقیلون اوغلونا بیری قاپونی آچمادی
اوروجدی، تشنه دی، ولی، یوخ اشتهاسی مسلمون
..
ایاق چکیلدی ایولرین خموش اولوب چراغلاری
آزالدی جسمدن رمق گیدوب قواسی مسلمون
..
واریدی رعب و وحشت هریره باخاندا کوفه ده
در سرای طوعه اولدی متکاسی مسلمون
..
ایاق سسین او شیرزن ایشتدی آچدی قاپلاری
گوزونه دگدی قامت ادب نماسی مسلمون
..
ایدوبدی طوعیه سلام صورا سو ایستیوب آقا
یادینا دوشدی بیر دقیقه اوز آناسی مسلمون
..
یامان گون اولسا هر کسه آناسی یادینه دوشر
گتوردی طوعه سو اوجالدی تز ثناسی مسلمون
..
قاپنی باغلادی دیدی دایانما بوردا ای غریب
شروع اولو سفارتنده قَهقَراسی مسلمون
..
حکومت نظامیدور خراب اولیدی بو عراق
یزیدیان باشندا وار قوی هراسی مسلمون
..
بیلیندی طوعه شیعه دور ئورکلنوب غریب آقا
هارا گیدوم بویوردی وار مگر هاراسی مسلمون
..
نه وار ایویم نه بیر کسیم بیریده قویموری ایوه
دیوبدی طوعه گوشیمه گلور صداسی مسلمون
..
بویوردی مسلمم اولوب منه گوره شلوغ شهر
اولیدی جانی طوعه نون دیدی فداسی مسلمون
..
ایویمه گل کنیزیوم کنیز زینبم آقا
بو سوزده تاپدی التیام ئورک یاراسی مسلمون
..
قدم قویاندا منزله خانم دولاندی باشینه
آقانی ساخلادی قوناق اولوب رضاسی مسلمون
..
گهی نماز قیلدی که دوروب دولاندی منزلی
گوزونده اشگ ناب اولوبدی اِشتکاسی مسلمون
..
اولوبدی صبح ناگهان قوشون توکولدی منزله
بلوندی بیت طوعه ده اولوب خفاسی مسلمون
..
گلوبدی طوعه عرض ایدوب منی خجالت ایتدیلر
قوشون توکولدی ایندی بس ندور بناسی مسلمون
..
آقا بویوردی قویمارام، ایوه توکولسون اشقیا
خدای واحده آنا وار اِتّکاسی مسلمون
..
زرهیمی قلنجیمی گتور حلال ایله منی
ئولونجه وارسنه یقین ،آنا دعاسی مسلمون
..
قاپونی آچدی کوچه دن قاچوب دالی دالی قوشون
الینده تیغ تیز اولوبدی اژدهاسی مسلمون
..
سالوبدی قرخ نفر یره دوشوبدی رعشه دللره
اوجالمیوبدی لشگره هیچ التجاسی مسلمون
..
عموسی مرتضا کیمی مصافی لرزیه سالوب
اگرچه تنگیدور چکه قلج فضاسی مسلمون
..
حساب ایله ایشقلانان زمانیدن ایدوردی جنگ
بلوردی قدرتین خدای لا یُراسی مسلمون
..
توکردی باشلاری یره دگردی خلق بیربیره
بلند اولاردی گاه صوت جانفزاسی مسلمون
..
زیادین اوغلی کاخده اولوردی جنگه باخبر
دیردی وار نقدری قدرت نداسی مسلمون
..
سالوبدی تیغی خرمن عدویه اود هر آنیده
نماز ظهریده گلوب ،اذان، دعاسی مسلمون
..
زیادین اوغلی مسجده گیدوردی طمطراقیله
امامت ایلیه اولوب دم بَکاسی مسلمون
..
او کسلری که اقتدا ایدوب او پست و ناکسه
قالاردى اللرینده اوپماقا عباسی مسلمون
..
مؤذن مساجد اوندا باشلادی اذان ویروب
علینون آدین حذف ایدوب اولوب عزاسی مسلمون
..
نمازلارین قیلان گلوب به نوبه جنگ مسلمه
رکوع سجود ایدوب اوجالدی ربّناسی مسلمون
..
ویروبدی آخرین سلام آتوب حسامه پنجه سین
که سخت امتحانه وار بلی بلاسی مسلمون
..
ادامه ویردی جنگنه دونوبدی لاله رنگینه
دَیوبدی ظلم سنگنه رخ صفاسی مسلمون
..
انوبدی گون آغاجلارین دالندا سالدى قان شفق
یواش یواش تمام اولوردی ماجراسی مسلمون
..
غروبده اؤپردی گون هله یارالی پیکرین
دوشوبدی چاهه ناگهان قد رساسی مسلمون
..
درنده خو قوشون آلوب آرایه شیر زخمدار
زره گوزوندن آتدی قان یره یاراسی مسلمون
..
قلنجین اندیروبدی بیر شقی یاروب دوداقلارین
اوجالمیا او ورد و ذکر برملاسی مسلمون
..
یارالی پیکرین سالوب آت اوستونه گتوردیلر
گوروب زیاد اوغلی وار عجب جلاسی مسلمون
..
سلام ویرمدی آقا گلوبدی غیظه بن زیاد
دیدی نقدری وار غرور و ادعاسی مسلمون
..
سوروشدی ویرمدون ندن سلام امیر کوفیه؟
بویوردی یوخدی ظالمه سلام صلاسی مسلمون
..
گلوبدی غیظه بت پرست امیر ایلنده چوبدست
گوروبدی ضربه تازه دن قلج یاراسی مسلمون
..
یارانون اوسته تازه دن دگنده یاره سخت اولور
ولی حمایت ایتدی رَبِّ ماسواسی مسلمون
..
غریبه لر غریبی اوخشاسا ئورک کباب اولار
اولوبدی خوار مجلس و هم اوخشاماسی مسلمون
..
آپاردی قاتلی اونون ایشین تمام ایده اولوب
او دمده بام قصر، مَرْوَه و صفاسی مسلمون
..
الین اؤپنلر آلدیلار او قصر شوم دوره سین
بیری یوخ ایلسین ندا بودور بهاسی مسلمون؟
..
گتوردوز اُؤپدوز اللرین سنا سیزون قلملروز
سیزه نه ایلیوبدی دست با سخاسی مسلمون
..
حسین کاروانینی دیون اقلی گلمسین
یاخونلاشور بو شهروزه شه ولاسی مسلمون
..
گوروبله قطره قطره قان توکولدی ناوداندن
دالیجا دوشدی باشسیز هیکل کیاسی مسلمون
..
خیال ایتمه بیر نفر گلوبدی اوخشاسین اونی
گنه گلوبدی میزبان با حیاسی مسلمون
..
خدایه حمد اولا گنه موفق اولدی «عینی فرد»
گیدوب زیارت ایلدی اولوب گداسی مسلمون
..
..
#مسلمیه_عینی_فرد #ترکی #زبدةالاشعار
نظر دهید