دفن شهدا
..
..
..
..
مرحوم سید حسین رجایی تبریزی
..
..
..
..
کوفه ده الهام اولوندی ساجد آل عبایه
دفن ایدولّه شاه دینی سنده گَل گیت کربلایه
..
..
..
..
گون قباقنده قالوب دور پاره پاره گل بدنلر
چولقیوب شیون صداسی کربلا دشتین سراسر
گیت حسینی قوی مزاره بیله دور امر مقرّر
گرچه دفن ایتماق آتانی امر مشکل دور بالایه
..
..
..
..
تاپشور عمّون زینب مظلومیه آل عبانی
آچ دو شاخه گردنوندن سال یره زنجیرِ پانی
دولدوروب فوج ملائک دسته دسته کربلانی
خسرو دین دفنی دور بو نشر اولوب دور ماسوایه
..
..
..
..
رمزله تا بو کنایه اول شه والایه گلدی
جوش ایدوب دیگ ملالی اشک غم سیمایه گلدی
تاپشوروب غم کاروانین زینب کبرایه گلدی
طُرفۀ العین ایچره یتدی وادی محنت فزایه
..
..
..
..
وارد اولدی کربلایه گوردی فخر السّاجدین
کربلا نه کربلا عنوان فریاد و اَنین
یار و انصارین یغوب اطرفنه سلطان دین
انبیانی دعوت ایلوب شاهد اولسونلار وفایه
..
..
..
..
عاشق اوز معشوقنه یتدی تاپوب دور مدّعاسین
گوردی مکبوباً سالوبلار بیر چوخور یرده باباسین
سایماق اولمور پیکرینده نیزه و خنجر یاراسین
جلدسیز قرآن کیمی اوراق اولوب دور آیه آیه
..
..
..
..
قصد ایدوب دور محضریندن ایلیه تحصیل کام
خاک و خون آتدا گوروب مستوریدی نعش امام
گوز یاشین توکدی یوزه سسلندی بابا السّلام
ای قالان نعشی قوم اوسته ای گیچن باشی جِدایه
..
..
..
..
خسرو ملک هدایت واضح اولدی مسئله
باطل و حق کیمدی استیردون اونی عالم بوله
منده ویّرم شام ایچینده زینبیله اَل اَله
حقّون اثبات ایلروق عالمده هر شاه و گدایه
..
..
..
..
ای شهید راه حق سن ایلدون اخذ مرام
راضیم منده بو یولدا هر بلا گلسه وارام
سرپرستم اهل بیته قیزلارون تک قویمارام
عَّمّه تاپشوردوم ایمدی گلموشم ختم عزایه
..
..
..
..
شکر لِلّه اولدی بیرگلماخ عجب قسمت منه
ناخوشام خاک شفا دور قانلی بو تربت منه
گلموشم دفن ایلیم تا اولماسون حسرت منه
قالماسون نعشون یر اوسته گلمه سون زهرا نوایه
..
..
..
..
ظاهراً دفن امامه گرچه اول سرور گلوب دور
عالم معناده گوردی جدّی پیغمبر گلوب دور
فاطمه سارا خدیجه مریم و هاجر گلوب دور
گه ویرولّر تسلیت زهرایه گاهی مصطفایه
..
..
..
..
سویلدی اهل قبیله آگهم مقصودوزه
گلموشم منده سیزی ارشاد ایدم مطلوبوزه
سیز مُعین اولسوز اگر بیر بیر نشان ویرَّم سیزه
کوفه دن گلدیم دیار محنته بو مدّعایه
..
..
..
..
من سیزون بو نصرتوزدن بی نهایت دلخوشام
یورقونام یول گلموشم زنجیردن قورتولمشام
محنتیم چوخدور عزادارم مریضم ناخوشام
شاه ئولندن بیز اسیروخ کوفه ده اهل جفایه
..
..
..
..
سیز اولون دفنه مهیّا من ویروم بیر بیر نشان
من نشان ویردوقجا سیزده ایلیون حفر مکان
بو ئولنلر کیمدی اسم و شهرتین قیلّام بیان
اوزلرین تسلیم ایدوبلر دین یولوندا هر قضایه
..
..
..
..
بو حسین بن علی دور جان ویروب توپراقلار اوسته
اوغلِیَم من بو غریبون اولموشام چوخ زار و خسته
کوفیانه دستگیرم ناقه اوسته دست بسته
کیمسه یوخدور تسلیت ویرسون بو درده مبتلایه
..
..
..
..
بو جوان که حُسنده چوخ بنزوری پیغمبره
فرقتی لیلانی مجنون تک سالوب دور چوللره
قارداشیم اکبردی یخموش سرو تک اعدایره
حق نُما آینه دور بو جدّی ختم الانیبایه
..
..
..
..
سودامر طفلی گورورسوز گون قباقنده سولوب دور
غنچه گل دور آچماموشدی تیرله خندان اولوب دور
تاپمیوب دور اوزگه ساتر باجیسی زلفون یولوب دور
تار زلفیله بو طفلون نعشی اوسته سالدی سایه
..
..
..
..
قارداشیم اصغردی بو توپراق اولوب گهواره سی
چوخ سیزیلدوردی سوسوزدان گوردولر یوخ چاره سی
ویردیلر سود تیرله دیلدن سالوب اوخ یاره سی
حشر اولونجا آغلاماق عنوانی دور اهل عزایه
..
..
..
..
اولدولار اهل قبیله اول شهه یار و مُعین
بیر به بیر ویردی نشان هر بیر شهیدون پیکرین
یغدیلار شه باشنه مخصوص اولان سرلشکرین
ایتدیلر دربان حبیبی خامس آل عبایه
..
..
..
..
ایستدی امّا قویا قبره اوزون اول سرورین
نعشین اطرافین دولاندی تاپدی بارماقین الین
بیر یره جمع ایتدی اعضاسین او باشسیز پیکرین
حسرتیله چولقادی زهرا عزیزین بوریایه
..
..
..
..
بوردا بعضی روضه خوانون بیر گوزل تقریری وار
بولمورم من هانسی مقتلده بونون تحریری وار
وار گمانیم سوز دوز اولسا قلبه چوخ تأثیری وار
بیر اورک اولماز یقیناً یانماسون بو ماجرایه
..
..
..
..
ذکر ایدولّر ایستدی قبره قویا اول سروری
گوردی بیر سس گلدی تک قویما اوغول بو پیکری
گیت گتور قوی سینم اوسته شیرخواره اصغری
قبرون اوستوندن قولاق ویر بیر صدای لایلایه
..
..
..
..
بیر مزار ایتدی معیّن اوچ وجود انوره
اولدی شه آغوشی مدفن شیرخواره اصغره
ویردی یر پائین پاده شاهزاده اکبره
اوردا ایلّه لّر توسّل بارگاه کبریایه
..
..
..
..
قبرون اوستون خاک ریز ایتدی دوروب اول مقتدا
بارماقیله یازدی هذا قبر ابنُ المصطفی
گوردولر ایله پوزولدی سسلدی ای وای بابا
عمروم هر قَدْر اولسا گلّم بو مصیبتده نوایه
..
..
..
..
سویلدی اهل قبیله وار قالان آیا گینه
قویمیاخ قالسون یِر اوسته تاپشوراخ اوز قبرینه
یوز قویوبلار حسرتیله نهر عقلم سمتینه
امر ایدوب بیر خوردا مدفن قازدیلار صاحب لوایه
..
..
..
..
خوردا قبر اولماز اوجا قامتلی صاحب منصبه
حجّت الله اذن ویر علّت دیوم بو مطلبه
بند بند ایتموشدی اعدا جسمنی وای زینبه
اولدی چوخ نیسگِل بو محنت یادگار مرتضایه
..
..
..
..
دفن قورتاردی زیارت بابنی ایتدی ادا
ایتمیوب بیله زیارت هیچ آتانی بیر بالا
آرزومیز وار اورکده قسمت اولسا کربلا
بو طریقیله اولاخ زائر شهید کربلایه
..
..
..
..
اَلسّلام ای نعشنی، عریان قویان اهل جفا
السّلام ای جسمنی قبره قویان اهل قَری
السّلام ای باشنه منزل اولان نوک جِدا
ای گیدن مهمان یارالی باشله مطبخ سرایه
..
..
..
..
ای «رجائی» وار گناهون گرچه بی حدّ و شمار
ناامید اولما گورورسن خالقون توفیقی وار
گیتموب فرصت اَلوندن ایمدی که وار اختیار
جدّوه ایله توسّل توبه قیل یالوار خدایه
..
..
#دفن_شهدا #رجایی_تبریزی #ترکی #زبدةالاشعار
نظر دهید