کیمدی بو نور رخی عالمی حیران ایلیور #قاسمیه_آسال_اردبیلی

شجاعت حضرت قاسم علیه السلام
..
..
..
..
..
نوید آسال اردبیلی
..
..
..
..
..
کیمدی بو نور رخی عالمی حیران ایلیور
هیبت حیدری بیر یولدا نمایان ایلیور
..
..
..
..
..
سنی آز مکتب عشق و ادبین استادی
مجتبی دلبری ، شاه شهدا دامادی
توکوجن خلقتینون یوخدی یقین ایرادی
برهوتی ایلیر بیر نگهی آبادی
ولی مستانه گوزی مین دلی ویران ایلیور
..
..
..
..
..
یوزی چون شمس ضحی قاشلاری شمشیر کیمین
پلکی اوسته اوتوروبدور مژه لر تیر کیمین
توکولوب تللری چین چین یوزه زنجیر کیمین
باغلیوب زلفینه عشاقینی نخجیر کیمین
عشقینه لشکر عشاقینی قربان ایلیور
..
..
..
..
..
کائناتی بوجوان والح و حیران ایلر
گورسه مه،صورتینی نورینی پنهان ایلر
قوس ابرولری مین عاشقی بی جان ایلر
گورسه یوسف یوزونی عزم بیابان ایلر
قدرتین بوندا خداوند نمایان ایلیور
..
..
..
..
..
قامتین سرو دیسم ،سرو هارا بو قامت هارا
صورتین ماه دیسم،مه هارا بو صورت هارا
هیبتین کوه دیسم،داغ هارا بو هیبت هارا
همتین بحر دیسم،بحر هارا بو همت هارا
بو تشابه لرین اونون قیمتین ارزان ایلیور
..
..
..
..
..
چشم مخموریلری دلبر و شهلا یارانوب
قامت بی مثلی اشبه طوبا یارانوب
تاری زلفلری چون شب یلدا یارانوب
من بیله فکر ایدورم طلعتی یکتا یارانوب
نقدر قدرتی وار حق بونا احسان ایلیور
..
..
..
..
..
قلب میدانیده واحد دایانوب حیدر وار
ال قاش اوستونده باخور لشکره دریای وقار
تا ایده قوم ستمکاری مهارتله شکار
آنلادی بو سوزی اعراب دنی بالاجبار
تک وقاری سپه کفری پریشان ایلیور
..
..
..
..
..
سسلدی وقرینه احسنت حسین بن علی
یوز دوتوب سمت سمایه دیدی رب ازلی
باتمیا قانینه ای کاش سریه گوزلی
نوعروسون هله مخیمده حنالیدی الی
نیه بو چرخ فلک قلبیمی شان شان ایلیور
..
..
..
..
..
غیبیدن سس گلوب ای میر هدی شاه زمن
عهدنامونده یازیلمیش بو محن یوخدی سخن
اکبرون نعشی کنارینده یاتا ابن حسن
دولانا شهریلری تازه گلین مستحزن
درک ایده عشق نجه عاشقی ویلان ایلیور
..
..
..
..
..
سمع شاه شهدایه یتیشوب بیر آوا
او صدائیله تاپوب جان دگر شاه ولا
درک ایدوب خطبه اوخور ناشر اهداف خدا
مرحبا نطقووه سسلندی حسین میر هدا
نطقی خنجر کیمین اعدا اورگین قان ایلیور
..
..
..
..
..
یوز دوتوب قوم ستمکاره بو زیبنده جوان
دیدی ای لشکر بی عاطفه و هرزه روان
هانی عجزیله بیزی دعوت ایدن نامه یازان
سویونون جنگ لباسین گیینون رخت زنان
ولی یوخ طعن سیزه یکسره نسوان ایلیور
..
..
..
..
..
بیزه روشندی کی سیز فاقدشخصیت سوز
مسلم اولسوزدا اگر عابد بی طاعت سوز
طالب نام ونشان عبدمی وشهوت سوز
گوزلروزدن توکولی ملت بی غیرت سوز
غیرتین هر بشرون گوزلری اعلان ایلیور
..
..
..
..
..
فکر ایدورسوز کی اگر قانه بویانسا اخیار
اولاجاق تا به ابد آل رسول الله خوار
ولی یوخدور غمیمیز ای سپه کینه شعار
قانیمیز باتمیاجاق تا نقدر عمم وار
نطقینه غبطه اونون خنجر بران ایلیور
..
..
..
..
..
ایسته دی ازرقی سعد اوغلی اودم محضرینه
دیدی باخ لشکریمون عرصه ده سرتاسرینه
هامی مبهوت باخور بو گوزلون پیکرینه
آز قالور قوم ویره بیعت الین اللرینه
همهمه لشکر آرا بوسوزی عنوان ایلیور
..
..
..
..
..
امر ایدوب عازم پیکار اولا اول تخم زنا
عرض ایدوب زادۀ وقاصه او تندیس جفا
مضحکه ایلمه شخصیتیمی لشکر آرا
جنگ ایدوم طفل دبستانیله ای شوم دغا
بوسوزون ازرقی یوخ لشکری حیران ایلیور
..
..
..
..
..
دورت اوغول صاحب خنجر واریم ای پست ودنی
اولارین شهرتی تسخیر ایلیوبدور زمنی
وقت دعواده یخار هر بیری مین پیل تنی
ویر اجازه بویوک اوغلوم ایده پیکار علنی
گوره سن خوار نجه خصمی بو اوغلان ایلیور
..
..
..
..
..
ارشد اوغلون او دنی عازم ایدوب پیکاره
بیر قولاق ویر نچه لحظه سخن اشراره
بیری دی قاسمه اول پست ویرار مین یاره
بیری دی جنگ چاتوب مرحلۀ دشواره
هر بیری مین یل دستانی هراسان ایلیور
..
..
..
..
..
اولین فرصتی قاسم ویروب اول فتنه گره
ویردی بیر ضربت شمشیر عدو خوش سیره
صول الین یاره لدی صدمه یتیش دی سپره
یتیشوب نوبت ابراز هنر شیر نره
عرصه ده جنگ یقین کفریله ایمان ایلیور
..
..
..
..
..
ناگهان لغزش ایدوب خصم آتی دوشدی خطره
راکبین سالدی دوشوب تیغ و کله دور و بره
تا یتوب زلف عدو پنجۀ زیبا گهره
قالخیزوب پیکرینی لاشه کیمین ویردی یره
گوره لر تا نجه بو دشمنی بی جان ایلیور
..
..
..
..
..
ازرقون اوچ بالاسی رخصت پیکاری آلوب
هره بیر سمتیده بیرنحویله میداندا قالوب
اوچ قلیجلان بو جوان دورت یلی تپراقه سالوب
ازرقون آه دلی یدی سمایه اوجالوب
بو محن هر آتانی دیده سی گریان ایلیور
..
..
..
..
..
الغرض جامه جنگی گیینوب ازرق دون
بیر یل نامی اوزی صاحب ابزار و فنون
نعش اولادی گورنن بو تاپوب حال جنون
قصدی وار تا ایده حیدر بالاسین غرق به خون
منتظر دور هامی ،تا بو نجه جولان ایلیور
..
..
..
..
..
باشلادی یاوه سرای اموی یاوه سخن
چوخ تبسمله باخوردی اونا دلبند حسن
آچدی لعل لبینی سسلدی ای اهریمن
منه عباس ویروب درس ادب سن کیمسن
ادب ساقیه فخر عالم امکان ایلیور
..
..
..
..
..
بویوروب کیم سنه عالمده دیور شیر ژیان
باغلاماز مرکبینون تنگینی شجعان جهان
اگدی تا قدینی ازرق باخا تنگه ،اوجوان
ویردی بیر ضربت اونا جسمینی بولدی آرادان
یاحسن گورنه بالون عرصه ده طوفان ایلیور
..
..
..
..
..
ولی بو فتح و ظفر تاپمادی چوخ حال دوام
قوردی اعراب دنی قلب رسول اللهه دام
تلین اوسته یغیشوب یکسره سکان خیام
بی عدد یاره ویروب پیکرینه فرقۀ شام
کی فقط صحبتی هر سینه نی سوزان ایلیور
..
..
..
..
..
ویردی بلواده شبث سینه سینه بیر یاره
کورگین نوک سنان ایله دی یارب پاره
پرده لی عرض ایدورم بو محنی حضاره
سالدی زهرا او زمان قاره نین اوستن قاره
دیدی قاسم بو غمون جنتی ویران ایلیور
..
..
..
..
..
اوقدر قوم دنی ویردی یارا پیکرینه
اوخشادی جسمی عبایه بوکولن اکبرینه
طوی حناسی یرینه یاخدی قانین اللرینه
جسم صدپاره ایلن گیتدی علی محضرینه
بی گمان قانینی حق زینت رضوان ایلیور
..
..
..
..
..
چاتمامیش وصل حقه گل دیدی امداده عمو
سایووی لطف ایله سال باشیمه دنیاده عمو
توش اولوب بند دلون خنجر جلاده عمو
گل گلوبدور بو چوله حضرت زهراده عمو
باشیمون اوسته ننم ناله وافغان ایلیور
..
..
..
..
..
تا گلوب قتلگهه قاسمه شاه شهدا
مجتبی دلبرینی گوردی حسین غرق بلا
سسلدی نار غمیلن سینم اوتلاندی بالا
هانسی بی عاطفه ویرمیش بوگوزل جسمه یارا
بو قدر ظلم بیزه هانسی مسلمان ایلیور
..
..
..
..
..
تازه دامادی گوروب غرق بلا قیناتاسی
گوردی یاخمیش الینه جشن گونی قان حناسی
بوریوب جسمینی باشدان باشا خنجر یاراسی
چیخدی یاددان بیله فکر ایلورم اکبر بالاسی
چونکی سربازینی شه اوغلونا همسان ایلیور
..
..
..
..
..
ایسته دی حمل ایلیه دلبرینی شاه زمن
بوردا عذر ایستیورم سندن آقا یابن الحسن
نجه احواله قالار لشکر آرا الده ئولن
سورونیدی ایاقی یرده اوزانمیشدی بدن
بو غم هر سنگدلی حالی پریشان ایلیور
..
..
..
..
..
یتیشوب خیمه سلطانه غرض فدیه شاه
گیدیروب اهل خیم مادرینه رخت سیاه
بالانی گورجک آنا چکدی اورکدن بیر آه
دیدی لا حول ولا قوة الا بالله
فرقتون گوزلریمه عالمی زندان ایلیور
..
..
..
..
..
وار امیدیم قورا بیر بزم عزا شیر خدا
اولا اول محفل ماتمده ائمه ، زهرا
صدر مجلسده اوگون حضرت احمد اوتورا
شعرا دعوت اولا منده گلم ،شاه ولا
تا(نویدی)دیه شه بزمینه مهمان ایلیور
..
..
..
..

#قاسمیه_شجاعت
#آسال_اردبیلی
#ترکی