گتوروب غم گنه اندیشه قوشون پروازه #قاسمیه_انور_اردبیلی

جریان عبای یهودی زاده
گریز به حضرت قاسم (ع)
..
..
..
..
مرحوم انور اردبیلی
..
..
..
..
گتوروب غم گنه اندیشه قوشون پروازه
یازورام بو خبری شوشتریدن تازه
..
سکّۀ جان ندی خرج أولمیا جانان آدینا
اسم اعظمدی حسینون آدی قربان آدینا
..
اللى یدّی ایل ایدوب عمر فنا دنیاده
عمر نوحه دگر هر ثانیه سی معناده
..
متمایزدی حسین ابن علی خلقتده
مین سلیمانی تحیّرده قویوب حشمتده
..
بیزیم اربابیموزون دولتی وار پاینده
مثلی ماضی ده گلوبدور نه گلر آینده
..
برکتدور آقامون هر نفس هر قطره قانی
اهل اخبار بلور معجزینون یوخدی سانی
..
زندگی نامه سنون چوخدی گوزل رخدادی
هم شهید اولماقی پُر یُمندی هم میلادی
..
خبری که قلمیم دفتره ایلور انشا
شبهه یوخ صحّتینه شاهدی دور زین العباد
..
بیر اوغول شهر پیمبرده یهودی زاده
سنّی اون دورد اؤزی عشقده صاف و ساده
..
اورگی روشنیمیش نور حقیقت واریمش
ابی عبداللهَه نامرئی محبّت واریمش
..
باطنی رهبریمش عشق او دلی آگاهه
گورممش عاشقمش سبط رسول اللهه
..
عرب اوغلانلارینون رسمدی ای اهل ولا
کیچیگی هم بیوگی چیگننه ئورتلّر عبا
..
آتانون ثروتی آز بلمیرورم یا چوخوموش
دیدیگیم اوغلانون آنجاقکه عباسی یوخوموش
..
بیر گیجه ایلدی اظهار او یهودی زاده
بیر عبا آلماقا ایله اوزووی آماده
..
ای آتا ایلمه یولداشلار ایچینده منی خوار
دَگُلم من سنون اوغلون مگر ای باب کُبار
..
آتانون قلبنه ویردی بالانون دردی تکان
بیر عبا آلدی گوزل اوغلونا قیمتده گران
..
دیدی سال چگنوه کم قیمت اولوبسان اولما
بیر عبایه گوره ناراحت اولوبسان اولما
..
هیچ آتا تاب ایلمز اوغلی حقارتده قالا
نو عباسین گینوب کوچیه گلدی او بالا
..
هر بالا تازه لباسین بلوسوز دوست دوتار
حین بازی ده گوروبدور اولاجاق گرد و غبار
..
بیر سکو اوسته سلیقیله بوکوب قویدی اونی
قوشولوب کوچه ده اوغلانلارا اگننده دونی
..
دست مرموز خیانت اوزانوبدور یاران
سرقت ایتدی او عبانی بیری اوغلانلاردان
..
اویناماق وقتی تمامه یتشوب سوز چوخدی
او بالا باخدی گوروب تازه عباسی یوخدی
..
ایکی گوزدن یوزینه اشکنی ایتدی جاری
ساکت اولمادی ایدوبلر نقدر دلداری
..
دیدی یولداشلارا تیره گورورم آفاقی
بی خبرسوز آتامون واردی خشن اخلاقی
..
بی عبا گورسه منی راه عناد اوسته دورار
تانیام من آتامی صورتیمه سیلی ورار
..
رفقاسی ایدوب اظهار اونا بو عنوانی
تانیان واردی عبانی آپاران اوغلانی
..
دورد نفر شاهدیله بیر او یهودی زاده
سارقین منزلینه گلدی بشی آماده
..
قانونی شدّتیله ایلدیلر دقّ الباب
فتح باب ایتدی عبانی آپاران خانه خراب
..
دیدی فرزند یهودی او خطا بنیاده
گتوروبسن بیر عبا گلمشوک استرداده
..
دیدی سارق اونا چخ گیت قاپوموزدا دورما
خبریم یوخدی عبادن منه تهمت ورما
..
شاهدیم وار دیدی، انصاف ایله اینجیتمه منی
باخ بودورد شخص گوروب موقع سرقتده سنی
..
من یهودی بالاسی زادۀ مسلمدى بولار
دینوزون خاطرینه غائله نی فوری قوتار
..
دزد بی دین دیدی قهراً اونا ای کج مسلک
من قسم یاد ایلیوم سنده یاخامدان ال چک
..
دیدی سن که بیله وجدان و شرفدن کچوسن
هانسی شخصه بیر عبا خاطرینه آند ایچوسن
..
افترادن اوزومی من دیدی آزاد ایدرم
بیر بیوک شخصه یوزی قبله دوروب آند ایچرم
..
جان زهرادی جگر بند رسول الثقلین
مرتضی دور آتاسی اوز آدی مشهور حسین
..
ایشیدن وقته حسین آدینی فرزند یهود
مرغ عشقی پر آچوب ایلدی اعلایه صعود
..
پوزولوب حالی بدن باشدان ایاقه اسدی
دیدی ختم ایله سوزی یاوه دانشما بسدی
..
حکم وجداندی منه عشق حسیندن کچمه
من عبا ایستمورم سنده اوتان آند ایچمه
..
بُلورم سیلی لره توش اولاجاق ایوده یوزوم
نه بلا گلسه گلوبدور باشیما یوخدی سوزوم
..
عاشقون حقّیدی معشوقه پناهنده اولا
اوزی گلدی ایوه شاهدلریده سالدى یولا
..
داستان غمی تشریح ایلدی مادرینه
قورخوسوندان اَوَل آخشام سخلوب بسترینه
..
آتاسی گلدی گیجه بُلدی اولان جریانی
اوغلونی ووردی اَوَل ایتدى صورا زندانی
..
ضربه لردن بالانون لبلرى قانه باتدی
یومدی آغلار گوزینی آب و غذاسز یاتدی
..
او گیجه ظاهر ایدوب معجزینی شاه معاد
عالم خوابده گوردی آتاسین زین العباد
..
عرض قیلدی بابا غملی گورورم صورتیوی
نگرانسان نیه کشف ایله منه صحبتیوی
..
دیدی بیر خورداجا اوغلان آتووا عاشقدی
گورمیودور منی عشقنده ولی صادقدی
..
صدق و اخلاص حسینی ایلیوب شرمنده
ورولوبدور منیم اوستومده دوشوبدور بنده
..
گیت سحر وقتی او زنداننی آزاد ایله
اکبرین داغی چکیلمش اورگی شاد ایله
..
یوخودان حضرت سجّاد اولوبدور بیدار
یاتمادی صبحه کیمی اولدی پریشان افکار
..
اوّل صبحده اقدام ایلیوبدور او جناب
ایتدى شخصین او یهودی قاپوسین دقّ الباب
..
خانه صاحب قاپونی آچدی امامون یوزینه
خوش گلوبسوز دیدی تا گوزلری دوشدی گوزینه
..
بویورون منزله ای سیّد فرخنده لقا
صبح وقتنده گلوبسوز بیزه خیر اولسون آقا
..
دیدی سجاد پوزوبسان گیجه سامانیمیزی
قیدوب منزله آزاد ایله زندانیمیزى
..
دوستاقا سالدوقون اوغلان آتاما عاشقدی
یوخدی بیر ذرّه گناهی عملا صادقدی
..
گیت گتور اوغلوى السّاعه گوروم قامتنی
ایستورم بوسه ایدم سیلی دگن صورتنی
..
او سنق قلبله لازمدی اوزوم صحبت ایدم
آتامون روحی پریشاندی گرک راحت ایدم
..
گوردی بو معجزی حیرتده قویان اقدامی
او یهودی کیشی تصدیق ایلدی اسلامی
..
در زندانی آچوب اشک ترى گوزلرده
بوینی چگننده گوروبدور بالاسین افسرده
..
دیدی بُلموردوم اوغول یاخشی مرامون واریمش
عالم عشقده شایسته مقامون واریمش
..
یوزووه باخماقا الان ایدورم شرم و حیا
دور گیدک سیّد سجّاد گلوبدور قاپیا
..
عاشق پاک حسین صحنه دوشوبدور خوشحال
قولّارین آچدی امام ایتدی اونی استقبال
..
الینی چکدی اونون تل لرینه کاکلنه
اُول قوناقیم دیدی دعوت ایلدی منزلنه
..
صبح ایدوبسن بُلورم گوشۀ محبسده نجه
یاتموسان خفّتیله آب و غذاسیز بو گیجه
..
آتأسین ایئدی مخاطب صورا اول پاکروان
خشک اولوبدور بالووین لعل لبنده دیدی قان
..
بورا یثربدی دگل کرب و بلا اولمیا سو
گل الیندن دوت آپار لبلرینون قانینی یو
..
قرعۀ غصّه منیم چخمش ازلدن آدیما
قاسمون لبلرینی سالدی بو لبلر یادیما
..
عموم اوغلیدی اون اوچ سنّده نورسته بالا
باخان ایستردی گوزل صورتینه بیرده باخا
..
لاله رخساریدی شمشاد کیمی قامتی دوز
ایکی ابروسی کمانی قره گوز شیرین سوز
..
حُسنی انگشتر خلقتده کانّه قاشیدی
اشبه ختم نبی قارداشیما یولداشیدی
..
گل کیمی پرپر ایدوب کوفه لی لر یخدی یره
دئؤلی اَت کیمی گلدی بدنی خیمه لره
..
آتادان چونکه یتیمیدی او فرخنده نسب
قارداشمدان اونا چوخ آغلادی عمّم زینب
..
قبره قویدوم اونی جسمندکی کوینگله اوزوم
آت ایاقندا قالان پیکرینه دوشدی گوزوم
..
یاره تعدادینی آلدیم نظره سان گوردوم
بالانون باشدان ایاقه بدنین قان گوردوم
..
عمرمون ریشه سنه وردیلا تیشه یانورام
واردی بیر نسگلی قلبمده همیشه یانورام
..
فاطمه آدلی باجیم نامزد اولموشدی اونا
بلبلی قویمادیلار برگ گلون أوسته قونا
..
سخلوب «انور» الهی بو گوزل درگاهه
باغلیدور حبل متین أبی عبداللهه
..
آرتروب معرفتین عشقده پر شور ایله
بو سوزه بانی اولان شخصی ده مأجور ایله
..
سربلند ایله حسین شاعری وار هر یاندا
اردبیلده منه باخ «منزویه» تهراندا
..
..