گلون گلون بالام ئولدی گوگل گلوب درده #حضرت_رقیه_غمناک_تبریزی

شهادت حضرت رقیه (س)
..
..
..
..
مرحوم غمناک تبریزی
..
..
..
..
گلون گلون بالام ئولدی گوگل گلوب درده
آتاسی تک قالاجاقدور جنازه سی یرده
.
هانی قطیفه هانی شال و پوشش و ابره
سالاق جنازه سی اوسته قویونجا تا قبره
.
منی بو محنت و غم یاندورار یقین مه و سال
حسین عزیزی ئولوبدور تاپولموری غسّال
.
دوتوم جنازه سینه اولدی غسل ایدن هانی سو
بو قیز اونون قیزیدور اولدی قانی آب وضو
.
سوسوزلوق آتشی دایم بیزیله یار اولاجاق
بونوندا نعشی حسین تک بو یرده خوار اولاجاق
.
بیزیله گلمیه جاق راست چرخ کج آیین
گرک غریب مزار اولسون عترت یاسین
.
دیسون او شمره که آز کینه یولّارین آچسون
رقیّم ئولدی گلوب باری قولّارین آچسون
.
نولورکه رحمه گلوب ظلمیدن بیر آز دویسون
امان ویره که دویونجا بیز آغلیاق قویسون
.
بیزی بو نوعیله هر کیمسه گورسه رحم ایلر
عزیز عالمیدوق ایمدی قالموشوق مضطر
.
ئولوب امیریمیز اوضاعمیز اولوب برهم
قبیله میز ئولوب آخر قالوب بو بیرجه نفر
.
اودا اسیر مقیّددی ناتوان و علیل
قالوبدی دشمن الینده بو سبط شاه نبیل
.
علی جوانلاری قانه باتوب صغیر و کبیر
قالان بو قیزلاری ،عورتلری، ایدوبله اسیر
.
جلال و شوکتمیز ظلمیله اولوب تالان
اولوبدی منزلیمیز بو خرابۀ ویران
.
سالوبدی بیزلری گور بیر نه حاله چرخ کهن
ئولنلره ایدوروخ کهنه معجریله کفن
.
خرابه محنتی «غمناک» گلمز اتمامه
که آز قالور یانا بو الده دفتر و خامه
.
.
.
#حضرت_رقیه #غمناک_تبریزی
#حضرت_رقیه_شهادت
#گلون_گلون_بالام_ئولدی_گوگل_گلوب_درده
#ترکی
#زبدةالاشعار