گل سنی تاری گیتمه قال ای ننه #فاطمیه_فتی_تبریزی

زبان حال حضرت زینب (س) در شهادت مادر
.
.
#سبک_امید_و_سقای_حرم_اباالفضل
.
.
مرحوم محمد علی فتی تبریزی
.
.
گل سنی تاری گیتمه قال ای ننه
باشیمیز اوسته سایه سال ای ننه
.
.
آنا آنا زینبوم بلالی
ئولَنَه جاق قوتولمین ملالی
سنله گیدر آتام على جلالی
دوشمز اله بیرده وصال آی ننه
.
.
قزون کیمی بلالی بیر باشون وار
یانوندا نه باجون نه قارداشون وار
هله سنون اون سگّیز ایل یاشون وار
عمریوه تیز یتوب زوال آی ننه
.
.
بابان غمی سالوب سنی ایاقدان
یاندون اَلولاندون غم فراقدان
ضعف ایلدون ایوینده آغلاماقدان
اذان دیین زمان بلال آی ننه
.
.
آتان ئولندن گولمدی گل یوزون
آتان ئولدی شامه دوندی گوندوزون
قرالدی دشمن سیلی سیندن یوزون
آخدی گوزیندن اشک آل آی ننه
.
.
ظلم اودونا یاندون قاپون یاناندا
آلو چکوب او دَرب اودلاناندا
عم اوغلوون قوللاری باغلاناندا
دگنده قمچی دال با دال آی ننه
.
.
گزلَدَردون مندن آنا گوزیوی
بولمزیدیم اورکده کی سوزیوی
ایسته مزدون گورم نیلی یوزیوی
یتیشمیه منه ملال آی ننه
.
.
مغیره نین گوروم یوزی گولمه سین
یامان درده دوشسون ولی ئولمه سین
غسلون گجه ویردوخ دشمن بولمه سین
آغلاماقا یوخدی مجال آی ننه
.
.
اولار سنون کیمی بلالی باشیم
آخار یوزه همیشه بو گوز یاشیم
جنازه اوسته آغلوری قارداشیم
محبت ایله گویلون آل آی ننه
.
.
فلک سالور بیزدن سنی آرالی
نجه بالاسیندان اوچی مارالی
قبر ایوینه سن گیدیسن یارالی
آچ قولووی بوینوما سال آی ننه
.
.
اجل دیدیم امان ویرر قالارسان
سایه وین آتدا بالالارون آلارسان
بخت ایوینه بیزی یولا سالارسان
ایدرمیشم خام خیال آی ننه
.
.
خموش اولوب قمری سسی حًجازون
کَسیلندن سسون راز نیازون
شیرین یاتما گچور وقت نمازون
اوتدوخ یرى قیل لا محال آی ننه
.
.
عَجَلون وار ساخلامارام یولوندان
سالّوخ یولا باجیم صاق و صولوندان
خبرگوندَر شکست اولان قولوندان
تاپوب شفا تمام کمال آی ننه
.
.
ناقۀ صبری آز قالور پیلیوم
آناسیزام آغلامیوم نیلیوم
یوخوما گل بیر گجه تا ایلیوم
سینهَ ن یاراسینی سئوال آی ننه
.
.
فراق اودیله سینه می داغلارام
عزالیم باشه قرا باغلارام
ئولَنَه جاق نسگلیوه آغلارام
گچر حیاتیم بو زوال آی ننه
.
.
بالا دیلینجه غم یازان فتایم
آناسیندان یتیم اولان بالایم
دوز بسلَنَن اوغوللار یَلَه تایم
دیلیم وردوندن اولسا لال آی ننه
.
.
.
#فاطمیه #فتی_تبریزی #ترکی #زبدةالاشعار #فاطمیه_شهادت