گوردوم جفازبس فلک کجمداریدن #کاظمیه_نادم

زبانحال حضرت امام کاظم علیه السلام
.
زبدة الاشعار
.
: @nohe_torki
.
.
#نادم
.
گوردوم جفازبس فلک کجمداریدن
آهیم چیخیبدی عرشه دل پرشراریدن
.
محنت انیس اولوب منه همدم سرشک غم
تاپمازمجال داغلی دلیم آه وزاریدن
.
سالمیش سپاه دردو الم بیرنگین تک
من بیکسی حصاره یمین ویساریدن
.
گویلوم شکسته نی کیمی دایم نوا ایدر
گویا آلیبدی مشق چمنده هزاریدن
.
هاله ویریبدی دوره مه آی مثلی دردوغم
سینم گلیبدی تنگه غم بیشماریدن
.
ایله سالیب فشاره منی دورروزگار
تاریک اولوب گوزومده گونوز لیل تاریدن
.
دردیله جام دل ائله سرشاراولوب محال
تاپسین نشاط سیر گل ولاله زاریدن
.
بیرقلب مین خدنگ جفایه نشان اولوب
دوشموش اودور بوخسته گویول اقتداریدن
.
زندان اولوب بووسعتیله یر یوزی منه
دویدوم داها بوزندگی ناگواریدن
.
مرغ روانه جان قفسی تنگ اولوب زبس
چیخسین چوخ ایستیری که بومحزون حصاریدن
.
ویرسه اجازه حجت حق خامه شرح ایدر
اول محبس ایچره حبس اولونان شهریاریدن
.
اولدی گوزومده محبس بغدادجلوه گر
نالم اوجالدی نه فلکه قلب زاریدن
.
حسرت قویوب زمانه منی بیرتبسمه
شکوه نه نوع ایلمییم روزگاریدن
.
محبس آدین گتیردی قلم دوشدی یادیمه
بیرماجراکه سالدی منی اختیاریدن
.
زهراعزیزی حضرت موسی بن جعفری
هارون آیردی ظلمله ایل وتباریدن
.
سالدی همان اومحبسه کین وعنادیله
نه شرم ایدیب نه عارحق کردگاریدن
.
اوز حالینه امامی قوییدی اویرده کاش
کامه چاتاعبادت پروردگاریدن
.
مأمورایدیب اوحضرته سندبن شاهکی
بغضون عیان ایدیب ستم آشکاریدن
.
خون جگرسزادی بومحنتده روزوشب
گوزکاسه سینده سبقت آلاآبشاریدن
.
باخ روزگاره کیم کیمه گوردستگیراولوب
قالسین گوروم بوگردش دوران مداریدن
.
کُندیله ایلییبدی مُقیّد ایاقینی
دریای صبری بلکه سالا اصطباریدن
.
ویردی امام بوینونازنجیراوبیحیا
ال چکمییب گینه اوشه تاجداریدن
.
حس ایلمزدی جسمده زنجیرزحمتین
چاتمیشدی کامه خلوت بزم نگاریدن
.
دایم قویاردی آننینی مرطوب توپراقا
دویمازدی بومصیبتیله ذکریاریدن
.
سرگرمدی همیشه مناجاته یاریله
حمدوسپاس ایدردی خداوندگاریدن
.
بیرمدت مدیدبونحویله روزوشب
آیریلمییبدی ذکرحق اول حق شعاریدن
.
صبرامام جانه گتیردی اومرتدی
مقصوده یتمییب دی سرانجام کاریدن
.
ایتمیشدی یاره کنده اگرچه ایاقینی
یوزده گوزونمزیدی اثر انکساریدن
.
.
بیرآیری جوروظلمه آچیب ال او کین شعار
تاب وتوان آلیب اوشه بردباریدن
.
فردوس ده رسول خدا گلدی نالیه
جوروجفای فرقه بی شرم وعاریدن
.
خامه آناسی فاطمه دن ایلوری حیا
تشریح ایده کتب ده اولان اختباریدن
.
واضح دیینمرم اوشقی نین جنایتین
بوقدروار که سالدی بتولی قراریدن
.
یابن الحسن نه نوع دییم من بومطلبی
عاجزقالیبدی الده قلم انتشاریدن
.
سندین جفاسینین اثریندن اوکان حلم
تنگه گلیبدی زندگی مستعاریدن
.
قویدی امام الین یوزونه دولدی گوزلری
سیل سرشکی دامنه آخدی عذاریدن
.
رازونیازلحنین عوض ایلییب اودم
اود کونه سالدی دلده اولان استناریدن
.
گول صورتین ترابه قویوب پوربوتراب
ایتدی فغان وناله دل داغداریدن
.
عرض ایلییب دی شاهداول ای حی کردگار
نه ظلملریتیب منه بوکین شعاریدن
.
سندایلیین جفالر ایاقدان سالیب منی
یارب یورولموشام داها زجروفشاریدن
.
بوبس ده ئیل دی آیری سالیب لار بو بیکسی
جبرا تمام خویش و ائل و اهل داریدن
.
بیر تنگ و تار محبس اولوب منزلیم منیم
نه وار سراغ همدم و نه غمگساریدن
.
یوخدور دیین بوظالمه ویرمازلا سیدی
خاصه که اولسا پور رسول کباریدن
.
جان اوسته انتظار گوزوم همدم آختاریر
رفع ملال ایلیه بو دل فگاریدن
.
هجران غمی قوجاتدی بوغربت دیاریده
صبر و قرار آلدی دل بی قراریدن
.
ایکاش بیر نفر آچا الله رضاسینه
زنجیر و کنده نی بو تن زخمداریدن
.
نالم بو حبسخانه ده بنزر او بلبله
گلزاری ترک ائدیب ستم و جور خاریدن
.
بیر کیمسه یوخ یانیمدا منیم جان وئرن زمان
سیل سین سرشکی دیده ی گوهر نثاریدن
.
حسرت قویوبدی اون بیر ایل اهل وعیالیمه
هارون نه ایستیری بو غریب دیاریدن
.
نوح نبی نی ساخلیین ایمن ده غرقه دن
گرداب سیل درد و بلای بحاریدن
.
عمروم یئتیب باشا او قدر قالمیر آگهم
روحیم کسه علاقه بو جسم نزاریدن
.
ای یوسفه نجات وئرن قعر چاهدن
یعقوبی وی خلاص ائلیین انتظاریدن
.
عیسانی ای عدمدن ائدن بذل مریمه
وی قورتاران خلیلینی لطفیله ناریدن
.
من جان وئرنده گوزلریمی باری باغلاسین
حسرت اودون آزالدا دل پر شراریدن
.
اوغلوم رضانی لطف ائله یارب یئتیر منه
غملی گویول صفا تاپا دیدار یاریدن
.
نادم، بو شرح محنتی یازدیقجا، خون دل
رخساره آخدی دیده ی پر اشکباریدن
.
یارب چوخ اینجیدیم منی ده حبس دن قوتار
درد و غمیم گئچیب دی بولورسن شماریدن
.
.
#کاظمیه_شهادت
#گوردوم_جفا_ز_بس_فلک_کجمداریدن
#ترکی
.
#زبدةالاشعار
.
: @nohe_torki