گینه دوشوبدی باشیمه هوای کربلا حسین

آرزوی کربلا
.
زبدة الاشعار
.
: @nohe_torki
.
مرحوم #تقایی_اردبیلی
.
گینه دوشوبدی باشیمه
هوای کربلا حسین
او آلتی گوشه قبرووه
آتام آنام فدا حسین
.
.
روادی شیعه لر مگر یانا سنون فراقووه
یانور اورک آلولانور دوشنده اشتیاقووه
نولور نصیب اولا گلک او خوش نما رواقووه
گیک قرا محرمی ، دوتاق سنه عزا حسین
.
.
سنون قاپوندا سیّدی نولور که امتیاز آلاق
نصیب اولا زیارتون ازلجه بیر جواز آلاق
گیدک اورکده محنتون فراته دستماز آلاق
دئیک عزیز فاطمه ذبیح من قَفا حسین
.
.
نولور که شاهلر باخا محبتیله نوکره
محبت ایله ایسته سن او مرقد منوره
ایاق طرفده یوز قویاق مزار پاک اکبره
او آلتی گوشه مرقدی اوپوب ایدک نوا حسین
.
.
او صحن و طاق و گنبد طلایه جانیمیز فدا
صفا ومروه دن گوزل صفایه جانیمیز فدا
منای کعبه دن گوزل منایه جانیمیز فدا
جوار رحمتونده کی فدالره فدا حسین
.
.
نقدری اشک و آهیله فراقوه دوام ایدک
نولار گلک مزارووه جهاندا اخذ کام ایدک
او پیر پاک درگه مقدسه سلام ایدک
دوتاق مزارینون توزین مثال کیمیا حسین
.
.
او قبر پاکی شوط ایدک جهانه بیز شرر سالاق
شمیم عطر جّنتی او قبر پاکدن آلاق
آنا دلیجه اصغره سینونده لایلای چالاق
سینونده یاره لی یاتوب او صودامر بالا حسین
.
.
اوپک سنون مزارووی باتاق ملال و ماتمه
گیدک زیارت ایتمگه کنار نهر علقمه
او خردا قبریدن اپوب ایدک بو نوعی زمزمه
یاتوب بو ئیرده معدن سخاوت و وفا حسین
.
.
.
#سبک_دل_شب_ایلیوب_سفر … 4 سبک
.
.
#آرزوی_کربلا
#ورود_محرم
#گینه_دوشوبدی_باشیمه
#تقایی_اردبیلی
#ترکی
.
#زبدةالاشعار
.
: @nohe_torki