خطبه حضرت امام سجاد (ع) در مسجد شام
.
✍️ زبده الاشعار ✍️
.
?: @nohe_torki
.
مرحوم انور اردبیلی
.
یازدی قانیله حسین مکتب قرآن یاشاسین
بوغازیندان توکولوب قان دیدی ایمان یاشاسین
عزتیله گرک آزاده مسلمان یاشاسین
ذلتیله یاشیان ملتی تقبیح ایلیون
طرد ایدون ظالمی اللهوزی تسبیح ایلیون
.
.
مرد اودور حق دانیشوب حق سوزی اوسته دایانا
ئوزی ئوز معنوی فرهنگینه دلدن اینانا
گیتمیه باد حوادثده بویاندان اویانا
تیکمیه مرتبه و منصب دنیایه گوزون
ساتمیا اهل زر و زوریله تزویره گوزون
.
.
لعنت اولسون او کسه مردمی دلگیر ایلیور
رنگدن رنگه دوشور باطله تدبیر ایلیور
بیر گونی روبه اولور بیر گون ئوزون شیر ایلیور
شیعۀ مخلص اودور رنگ و ریانی ئوتوره
قدمین محض رضای حق یکتا گوتوره
.
.
کیم ایدوب خط حسین ابن علیده حرکت
سفرۀ عزت و اجلالی اولوب پر برکت
آری ایثار و شهادتده دی مَجد و برکت
روح ایثارگری اولماسا هر کیمده عَلَن
زندگیده چخوب حتماً حسین خطّیندن
.
.
کیم حسینی ئوزونه نهضتی رهبر تانیور
سرخ منشورینی دیلده ایدوب ازبر تانیور
تانماز آیری یری مسجد و منبر تانیور
مرض روحه دوا مسجد و محرابیده وار
قسم اللهه نه واردور عمل نابده وار
.
.
دهم ماه عزا یوم بلا میر هدا
مسجد و منبر و قرآنه ئوزون ایتدی فدا
خیمه لر یاندی اسیر اولدی حریم نجبا
روح تضمین و بقا مکتب قرآن تاپدی
اسرای علوی شامده اسکان تاپدی
.
.
شام ویرانه سی یعنی بیر اوچوق کهنه حضار
عترت فاطمیه حائل اولوب دورد دیوار
گوندوز ایستی گجه سرما اولارا وردی فشار
سار گول لرده اثر قویدی هوای متضاد
چخادوبدور دریدن چهره لری خاکیله باد
.
.
صبح لر سرد نسیمیله دولان وقته هوا
جذب ایدوردی سویوقی سینۀ ویرانه سرا
تاب ایدنمزدی دوراردی یوخوسوندان اسرا
جسملر گل کیمی تیترردی سویوق اولدوقونا
سخلاردی بالالار بیر بیرینون قولتوقونا
.
.
اولماسا سقفی ایوون گون ایلیور فوری هدف
ایستیه دوزمزیدی عترت سلطان نجف
ظهر اولاندا چکیلردی هامی دیواره طرف
اسرانون ایوی جان بخش هوادن بوشیدی
بالا قزلارون او مأواده چوخی ناخوشیدی
.
.
محبس درد و بلا فاقد آسایشیدی
خاک مرطوب اولارا بستر و هم بالشیدی
تارِ گیسولره جوّین توزی آرایشیدی
نقش غم دوشموشیدی گوزلرینه قاشلارینا
بولوط آغلاردی توکردی یاغیشی باشلارینا
.
.
ایسلانان وقته لباسی عوض ایلولّه بلی
اسرایه یوخودی آیری لباس اوردا ولی
سویموشیدی حرم طاهره نی ظلمون اَلی
بیر قبائیله کیم اولسا یاغیش آرامین آلار
فکریوی قاضی ایله گور نه چکوبدی بالالار
.
.
راوی نقل ایلوری نزدیکی ویرانه سرا
روبرو گلدیم نه سبط نبی زین العبا
نجه صبح ایلیوسن شامده عرض ایتدوم آقا
بوتۀ غصه ده تحلیله گیدوبدور بدنون
رمز محنت گورونور غملی جمالونده سنون
.
.
سائله ردّ جواب ایتدی بو طرزیله امام
روزگاری بیزه چوخ تنگ ایلیوب میر ظلام
کاش ای شیخ منی دهرده دوغمیدی انام
نجه صبح ایلر اولان حاکم جباره اسیر
گجه نون مثلی گورر گوندوزونی قاره اسیر
.
.
بیز گرفتار یزید اولموشوق ای مرد اصیل
نجه فرعونه دچار اولدی بنی اسرائیل
نوجوانلاریمیزی ایلدی لب تشنه قتیل
رحم یوخ ذره بو بی عاطفه و ناکسده
فکری واردور بو قالانلاردا ئوله محبسده
.
.
چالشور دام مصیبتده نوامیس خدا
قوجالوب عمّه لریم بسکه یوروب دام بلا
بعضی موقع گورورم چاتمور اوشاقلاره غذا
زندگی عترت اطاره اولوب زجر و فشار
باجیلاریملا باخان وقت ده قلبیم آلشار
.
.
بیر باجیم واردی چوخ ایستکلیدی اهل حرمه
یوروب آهن قفسی سالمش اونی پیچ و خمه
طاقتی طوطی شکّر شکنون یوخدی غمه
آغلاماقیله کچور هر شب و هر روزی اونون
یاندرور قلبیمیزی نغمۀ جانسوزی اونون
.
.
دانشوردی منیله راوی دیور زین العبا
بیر خانم حضرت سجادی گلوب ایتدی ندا
دشمنون چوخدی اماندی اوزاقا گیتمه بالا
طاقتون وار نه بدنده نه الونده کَسَرون
سنی امّید بولور باجیلارون عمه لرون
.
.
ایستدی آیریلا حضرت دیدیم ای بی کس امام
سیز ایله قالاملی سوز محبس ویراندا مُدام
ایش بو منوالیده قالسا اگر ای میر اَنام
ئولدورر زجر چکن قزلاری مُهلک زندان
کول منیم باشیمه ویرانه اولور قبرستان
.
.
دیدی سجاد اونا شاملدی بیزه لطف ازل
متجاوز هر عمل ایلسه وار عکس العمل
هندون اوغلون ایده جک قهر خدا مستأصل
من وکیل شهدایم سوزومه باخبر اول
شامی تسخیر ایدرم منبره گیتسم بیر یول
.
.
الغرض جمعه گونی مسجده قیلدی حرکت
یتشوب مقصدینه مقدم یُمن و برکت
مسجده ویردی او سیمای الهی عظمت
عرفا قبله سی بی مونس و یار اگلشدی
اوز یرینده ایله بیل کوه وقار اگلشدی
.
.
منبرون اوسته صعود ایتدی خطیب اموی
مدح ایدوب قان توکنی ایلدی سبِّ علوی
یردن اخطار ایلدی ساجدِ آل نبوی
گوروم آغزون سنا بیراهه یولا گتمه خطیب
خلقه خاطر غضب خالقی اخذ ایتمه خطیب
.
.
صورا اذن آلدی ایدوب عرشۀ منبرده قرار
ساحت حقه ایدوب گوهر تقدیس نثار
بعد تجلیل ایلدی جدّن او پاکیزه تبار
خطبه ختم اولدی مخاطب ایلدی حُضّاری
گوستروب ملته آیینه کیمی اسراری
.
.
شامون اهلی تانومورسوز منی الان تانیون
مرز ایمانه منم یاخشی نگهبان تانیون
دگولم خارجی واللهی مسلمان تانیون
واقف مسئله مجلس رازم تانیون
شهر یثرب وطنیم اهل حجازم تانیون
.
.
نقطه دایره صوم و صلاتم تانیون
لنگر و قائمۀ فلک نجاتم تانیون
تشنه معرفته آب حیاتم تانیون
دولت اعظم قرآنه سفیرم تانیون
شیر خصلت ولی روباهه اسیرم تانیون
.
.
خلقتون جوهره سی گوهر نایابی منم
شجر طیبه نون میوۀ شادابی منم
گجه لر زینت ایدن قبلۀ محرابی منم
حامی سالک دین هادی منهاج منم
نوۀ پاکدل صاحب معراج منم
.
.
عزت احمد مختاریمیزه فخر ایدورم
قدرت حیدر کراریمیزه فخر ایدورم
همت جعفر طیاریمیزه فخر ایدورم
صاحبان صدقات و صلمه فخر ایدورم
مرد شمشیر و عمل سلسلمه فخر ایدورم
.
.
تانیمورسوز منی سیز بیت خدا یاخشی تانور
حجر الاسود و زمزمله صفا یاخشی تانور
جَبَل الرحمه و مشعرله منا یاخشی تانور
ایها الشام بشیر البشرون اوغلی منم
صاحب معجز شق القمرون اوغلی منم
.
.
سیدم هاشمیم خسته تنم دربدرم
قفس غصه ده چون طایر آشفته پرم
اموی دولتینه شامیده اما خطرم
منطق بت شکنیم رمز فتوحاتیمدور
کنج ویرانه ستاد عملیاتیمدور
.
.
ویرمیوب فرصت صحبت منه دشمن دانشوم
ذی حقم جمعه نمازینده گرک من دانشوم
گتمیشم منبره قوی مطلبی روشن دانشوم
جده سی ضربت مسمار و دریله ئولَنَم
گجه غسلی ویریلن فاطمه نون اوغلی منم
.
.
سجده ده باشینی قاتل کسنون اوغلی منم
گون قباقینده قالان بیکفنون اوغلی منم
آت قباقینده که عریان بدنون اوغلی منم
خیمه سی آتش ظلمه یانانون اوغلی منم
الی اوسته بالاسی اوخلانانون اوغلی منم
.
.
سینه سین اوخلارا آماج ایدنون اوغلی منم
خیمه سین ظلم الی تاراج ایدنون اوغلی منم
رفرفِ نیزده ده معراج ایدنون اوغلی منم
ضربت داشلارا تمکین ایدنون اوغلی منم
حاکموز باشنه توحید اینون اوغلی منم
.
.
سیر ایدن چوللری زنجیر جفا قولدا منم
دولانان قانلی لاری صاقدا و یا صولدا منم
وورولان عمه لری باجی لاری یولدا منم
او که بو شهریده آواره دولاندی او منم
توکدوز اوت باشینه عمامه سی یاندی او منم
.
.
خفقان سندی یزید اولدی بو سوزدن نگران
قیلدی اظهار موذن اوتوما باشلا اذان
کلمه اعظم تکبیر اولان وقته بیان
دیدی تأویلینی فوراً اسدالله اوغلی
حقه آگاه حسینون دلی آگاه اوغلی
.
.
کلمۀ طیبه نی ایتدی موذن ایفا
اشهدُ انَّ محمد ایلین وقته ادا
یوزونی دوتدی یزیده بویوروب زین العبا
بو موذن دییَن آد مفخر بی حدیمدور
وار سنه نسبتی یا اینکه منیم جدیمدور
.
.
ناگهان دوردی شبستانیده زینب ایاقا
یوز دوتوب مسجده سسلندی او فرخنده لقا
دانش عمون اولا قربان دانشان دیل دوداقا
دینمسون قارداشمون قاتلی مقصوده چاتار
جدیمه اوخشار علی اکبریمون قانی باتار
.
.
من شبستانیده دلدن چاغوروم اللهی
شامون عورتلرینه بذل ایلیوم آگاهی
سنده اول منبرون اوسته شهدا خونخواهی
ملته ظالم و مظلوم گرک بَلَّنسون
تختدن حاکم جبار گرکدور اَنسون
.
.
عصر طاغوتینه ویر قهریله اخطار شدید
بویور اول ظالم و خمّاره که که مرد پلید
آل اطهاره الوندن گَلَنی ایله یزید
مرتضی قزلارینی ساخلا هله بی معجر
او قرا ساچلارون آهی سنی نابود ایلر
.
.
نطق پر شورینی ختمه یتوروب زین العبا
گلدی ویرانیه دلبند رئیس شهدا
ایتدی تجلیل اونی نائبۀ خیر نسا
علی شام اهلینی مبهوت ایدوبسن سوزووه
یورولوبسان هَلَه اگلش بی بی قربان گوزووه
.
.
قلبدن شادم علی باخما منیم گوز یاشیما
یاخشی خدمت ایلدون الده ئولن قارداشیما
اذن ویر فوج اسیرانی یغوم من باشیما
نذر عشقی ایلیوب عمّۀ شوریده سرون
بیر دولانسون باشووا باجیلارون عمه لرون
.
.
« انورا » مدح برازندۀ سجاد ایتدون
عدلی تعریف ایلیوب نفی ستبداد ایتدون
سوزه پیرایه ویروب منظره ایجاد ایتدون
اُدبا زمره سینون خوشدی یری مجلسده
حیف اولا « یحیوی » نون بوشدی یری مجلسده
.
.
#خطبه_سجادیه_در_شام
#مجلس_یزید
#سجادیه_خطبه_در_شام
#انور_اردبیلی
#یازدی_قانیله_حسین_مکتب_قرآن_یاشاسین
#آخرین_یادگار_انور
#ترکی
.
✍️ #زبدةالاشعار ✍️
.
?: @nohe_torki
نظر دهید