یا حسین هر یرده سن تک شاه اعظمدن دیدیم #اربعین_دلپاک

اربعین
زبانحال حضرت زینب (س)
..
..
..
رضا غلامپور (دلپاک)
..
..
..
یا حسین هر یئرده سن تک شاه اعظمدن دئدیم
مصحف آلامی آچدیم آیهٔ غمدن دئدیم
..
..
..
..
ای مسیحا دم وجودی جلوه گاه محتشم
فیض انفاسون نفوس حقّه اسباب کرم
سیر تبلیغیمده دم آلدیم دموندن دم به دم
قالب بی روح دینه سن وئرن دمدن دئدیم
..
..
..
..
ساکن قصر خباثت معنی جور و جفا
فتحهٔ فتح الفتوحین دلده جاری ائتدی تا
کسرهٔ ذلّتده حالین ساکن ائتدیم بر ملا
اوج وحدتده پر آچدیم قدرت ضمدن دئدیم
..
..
..
..
چون سرای دهریده ایستیردی قوم بدسگال
رونق بازار دینی یکسر ائتسین پایمال
بو سبب بازار شام و کوفه ده اوج ملال
کربلا دشتینده کی سودای اعظمدن دئدیم
..
..
..
..
عالمین عالمده عالم لرجه عالمدور حسین
عالم قبرینده روحوم سنله باهمدور حسین
عالمون تا عالمه گوردوم کی مبهمدور حسین
عالمه سن خلق ائدن اوضاع عالمدن دئدیم
..
..
..
..
ایستدیم تا اصل ذاتون خلقه اولسون آشکار
مرکب نطق فصیح بی امان اولدوم سوار
محنت لعل لبونده حشره تک بی اختیار
ایلیین افغان دمادم آب زمزمدن دئدیم
..
..
..
..
تا حسین بیر بحر تک دعوی طغیان ائیلدون
زورق ظلمی چکوب گرداب طوفان ائیلدون
سن ووروب موج اوز مرامین خلقه اعلان ائیلدون
منده هر یئرده سنون تک بی کران یمدن دئدیم
..
..
..
..
گوندوزوم هر لحظه سنسیز گوزده تیره شامیدور
زینبی سیراب ائدن هجرونده غصّه جامیدور
بیر بیرینده چون ازلدن جانمیز ادغامیدور
بو سبب هر نطقیده سرّ بو مُدغمدن دئدیم
..
..
..
..
سیز یاتان گوندن بو صحراده لب عطشانیله
کشمکش ائیلور وجودیم ئولماق اوسته جانیله
هاردا گوردوم سو بو مدّت ناله و افغانیله
بیر عطشدن بیرده قارداش نهرِ علقمدن دئدیم
..
..
..
..
وادی محنت ملالی قویمادیم قالسین نهان
ائیلدیم هر یئرده بیر بیر ظلم اعدانی عیان
اولدی رسوا شمر بی دین خاصّه ظالم ساربان
بیرده بجدل ظلمین آچدیم سرّ خاتمدن دئدیم
..
..
..
..
قلبیمی گر چه شرار اشقیاء ائتدی کباب
عالم طاقتده اما ائتدیم آیری انقلاب
کیم سئوال ائتدی ندور برهان بو صبره وئر جواب
من سنیله ائتدیقیم پیمان محکمدن دئدیم
..
..
..
..
قامت دلدن حسین رخت نوانی سویمادیم
ناله ائتدیم ماتمونده آغلاماقدن دویمادیم
شرح معنای عزاده ذرّه نقصان قویمادیم
دشمنی خوار ائتماقا اسرار ماتمدن دئدیم
..
..
..
..
عمریمون سندن صورا مین ایل کچوب بیر ساعتی
زینبون دور گور نجه قارداش پوزولموش حالتی
محنت عبّاس نام آورده ای خم قامتی
نسگلونده اهل درده قامت خمدن دئدیم
..
..
..
..
گرچه باغلاندی بو چولده قولّاریم زنجیریله
شامه گئتدیم الده امّا بیرق تدبیریله
هانسی محفلده دانشدیم نطق عالم گیریله
تا دم محشر أَسن بیر قاره پرچمدن دئدیم
..
..
..
..
دهریده هر کیم حکایت ائیلدی بیر مطلبی
منده «دلپاک» ائیلدیم سرمشق خطّ زینبی
جلوه گر اولدوقجا ذهنیمده حسینون مکتبی
هم یازیب دفترده هم ماه محرّمدن دئدیم
..
..
..
..
#اربعین #دلپاک #ترکی #زبدةالاشعار