یا حسین وئرم قسم زهرای اطهر جانینه #طفلان_زینب_اخگر_مراغه_ای

طفلان حضرت زینب (س)
..
..
اخگر مراغه ای
..
..
یا حسین وئرم قسم زهرای اطهر جانینه
زینبون اوغلانلارین گوندر ئولوم میدانینه
..
..
منع ائتمیدی اگر خالق جهاده عورتی
گورسدردیم کربلاده زینبیه صولتی
ثبت اولاردی آدیمه پیمانین اوّل دعوتی
آند اولا زهرا باخیش نازلی رقیّه جانینه
..
..
منشی حکمت یازوبدور بو منا قربانلارین
تا بلاگردانون ائتسون زینبون اوغلانلارین
کربلا صحراسینه دشمنده توکسون قانلارین
عشقیلن هر تک تکی بوردا بویانسون قانینه
..
..
عاجزانه بیر تقاضایه گلوب زینب عیان
ال منیم دامن سنون ای شهریار انس و جان
کیم گلوب بو آستان رحمته سن قوماسان
حرّ تک منده دخیلم رهبرین احسانینه
..
..
من شریک نهضتم اجرا گرک پیمان اولا
نهضته سندن ایکی اوغلان اگر قربان اولا
منده بیر جوت فدیه گتدیم عازم میدان اولا
بیر جوت اوغلاندا حسندن فدیه دور قرآنینه
..
..
دوتما کمتر زینبی اکبر آناسندان حسین
خوشدلم اوغلانلارین ئوپسم یاراسندان حسین
فدیه خوش اولماز گله سالم مناسندان حسین
قیل ترحّم زینبون بو دیدۀ گریانینه
..
..
یاحسین روز ازلدن گورمیشم بیله مدام
نام زهرایه قویوبسان بی نهایت احترام
جان زهرا وئر اجازه ای امام اوغلی امام
زینبون اوغلانلاری اولسون فدا جانانینه
..
..
نام زهرانی ائشیتجک فخر کلّ کائنات
یوز دوتوبدور زینبه تا که وئره غمدن نجات
سویلدی وئردیم اجازه دلده کی مقصوده چات
قوی قالا حیران تفکّر زینبون ایمانینه
..
..
سن باجی امّ المصائب سن بلالر همدمی
آفرینشده سنون تک بیر کسین اولماز غمی
حشره تک حیران قویار صبرون صبور عالمی
چاتدون ای زهرا قیزی ام الشهید عنوانینه
..
..
قید تندن مرغ حق یاهو دیور آزاد اولا
افتخاریمسان باجی زینب ائوین آباد اولا
قوی بو اوغلانلارلا عبدالله جعفر یاد اولا
تا یانا زینب سایاق اوغلانلارین هجرانینه
..
..
یاحسین عشقون اوجاقندا منوّر «اخگرم»
قیرخ بش ایلدور که قاپوندا پیسده اولسام نوکرم
بیر حسینچی شاعرم وصفونده صاحب دفترم
باب لطفوندن نظر سال شاعرین دیوانینه
..
..
..
#طفلان_زینب #اخگر_مراغه_ای #اصحاب_الحسین #ترکی #زبدةالاشعار