بقیع رفتن حضرت عباس (ع) در ده سالگی
..
..
..
..
سید بشیر حسینی میانجی
..
..
..
..
بیر گونی ائوده خانیم ام البنین
همسر مولا امیر المومنین
ایلیوردی ناله و داد و انین
ظهر وقتیدی او ساعت از قضا
منزله گلدی علی المرتضی
..
..
..
..
گوردی یار با وفاسی آغلیور
همدم و درد آشناسی آغلیور
یعنی عباسین آناسی آغلیور
حبس ائدوبدور حضرتی گورجک سسین
شدت محنتدن اوودی سینه سین
..
..
..
..
علتین آلدی خبر مولا اوزی
دولدی اشکیله او خاتونین گوزی
عرض ائدوب شیر خدایه بو سوزی
عالمین مشکل گشاسی یا علی
دردیمین سنسن دواسی یا علی
..
..
..
..
ایلیورسن حالیمی احساس آقا
صبح چاغیندن گئدوب عباس, آقا
اولموشام تأخیرینه حساس آقا
ظهر اولوبدور گلمیوبدور منزله
طاقتیم یوخدور دوزم بو مشکله
..
..
..
..
ای جبینی آی جمالی آفتاب
علتی واردور واریمدی اضطراب
چون ابوالفضلیم گئدوبدی بی نقاب
گوز تیکوب رخسارینه شمس و قمر
قورخورام عباسیمه دگسین نظر
..
..
..
..
ائتدی فرمایش امیرالمومنین
ایلمه داد و انین ام البنین
صبر ائله اوغلون گلر وار چون یقین
اون یاشی واردی دگول عباس اوشاق
بد نظر اوندان گوروم اولسون اوزاق
..
..
..
..
امر مولایه گوره تاب ایله دی
درَ اشکین گوزده نایاب ایله دی
آسمان صبری مهتاب ایله دی
ظهر گئچدی گلمه دی عباس ائوه
تا گتورسین بیرده عطر یاس ائوه
..
..
..
..
گه چیخوردی کوچیه اول باغری قان
گه گلوردی منزله دلده فغان
گه دوروب گه اگلشوردی ناگران
گون باتان چاغی گوروب دای گلمه دی
آسمان محفله آی گلمه دی
..
..
..
..
گون غروب ائتدوقجه آرتدی محنتی
قالمادی قلبینده تاب و طاقتی
غصه اولدی دگرگون حالتی
اول قدر قاشدی خانیم صاقه صولا
آز قالوب روحی بدندن آیریلا
..
..
..
..
آز قالوب عباس آناسی جان وئره
چوخ سراسیمه دوتوب یوز حیدره
آندا وئردی حضرت پیغمبره
یا علی عباسی سندن ایستورم
یعنی عطر یاسی سندن ایستورم
..
..
..
..
ای شه ملک سلونی چاره قیل
من دوتوب دامانیوی اولدوم دخیل
سن بیلورسن هاردادی اول بی بدیل
یا علی هر چند زحمت دور سنه
تئز یئتور اوغلوم ابوالفضلی منه
..
..
..
..
دوردی اطمینان خاطرله علی
چون بیلوردی ماضی و مستقبلی
ملک عدلین پادشاه اعدلی
اول آللاهه توکل ایله دی
صونرا زهرایه توسل ایله دی
..
..
..
..
آغلادی ائودن چیخاندا برملا
آز قالوب محنت اونی دیلده سالا
ائتدی فرمایش حسینه آی بالا
گل گئداق بو درده مرهم آختاراق
قارداشون عباسی باهم آختاراق
..
..
..
..
ایله بیل حساس دور بو مسئله
ابن و اب باهم وئروبلر ال اله
چیخدیلار ائودن اله مطلب گله
دوشدولر امیدیله اونلار یولا
گه باخوردیلار صاغا گاهی صولا
..
..
..
..
کوچه لردن کئچدی اول شیر خدا
یوز بقیعه ساری قویدی مرتضی
چون یئتیشدی اول یئره شاه ولا
گوردی چوخ شدتله عباس آغلیور
یاس طاهایه گل عباس آغلیور
..
..
..
..
دینمه دی مولا قولاق وئردی اونا
گوردی یانه یانه سسلور آی آنا
سسلنور زهراده معناده جانا
ایله بیل بیر محفل دیداریدی
خلوت انس و حضور یاریدی
..
..
..
..
زاده ی ام البنین باتمیش غمه
غمزده بلبل تک ایلور زمزمه
عرض ائدور هردن آنا یا فاطمه
وار یئری گر غیرت ئولدورسه منی
چون دیوللر اینجیدوب دشمن سنی
..
..
..
..
اوت ویریب ثانی سنون درگاهیوه
یاندی بو عالم شرار آهیوه
گلموشم گیزلین زیارتگاهیوه
سن بویور باری بو نالانه آنا!
توختویوب پهلولرون یانه آنا
..
..
..
..
من دومان داغلار گورنده آغلارام
تئز سولان باغلار گورنده آغلارام
زینبی آغلار گورنده اغلارام
ای رسول اکرمه نور دو عین
آغلارام من آغلیان دمده حسین
..
..
..
..
باخدی باخدی شاه مردان آغلادی
عرش و فرش و کون و ماکان آغلادی
دیده ی افلاکیان قان آغلادی
گورمه لیدی صحن غمبار بقیع
ایلیوردی ناله دیوار بقیع
..
..
..
..
ناگهان عباس بیلدی اول زمان
واردی دیوارین دالیندا آغلیان
دوردی القصه یئریندن باغری قان
دوندی گوردی هم آتا هم قارداشین
معرفتدن سالدی اشاقه باشین
..
..
..
..
مرتضی قولارین آشدی برملا
یانه یانه ائتدی فرمایش: بالا
ای اولان زهرا غمینده مبتلا
داغلانان قلبیمی بسدور داغلاما
قوینووا قویما الیوی آغلاما
..
..
..
..
گون باتوب ای حیدره نور بصر
اولدی هجروندن آنون خونین جگر
گل گئداق ایندی باجون زینب گلر
سن نه اولدی بو یئره گلدون اوغول؟
سن نه بیلدون بوردادی قبر بتول؟
..
..
..
..
سویله دی قلبیم داریخمیشدی بیر آز
خارج اولدوم ائودن ای شاه حجاز
بو طرف لرده گزوردوم دیلده راز
ناگهان بیر سس ائشیتدیم برملا
قبریمه ساری ابالفضل گل بالا
..
..
..
..
چک گریزه ای قلم اولدوم ملول
ایکی یول عباسه زهرای بتول
برملا امر ایلیوبدور گل اوغول
بیر دیوبدور قبریم اوسته گل بالا
درد دیل ایله منه دینجل بالا
..
..
..
..
بیرده عاشورا گونی بنت رسول
گوردی السیز اوغلونی اولدی ملول
سینه مین اوسته بویوردی گل اوغول
اللرون یوخدور قاباقه وئرماقا
لا اقل سن دوشمه السیز توپراقا
..
..
..
..
وئرمه دی رخصت ابوالفضله ادب
سینه ی مجروحه دوشسون تشنه لب
دوشدی توپراقه دیلینده ذکر رب
امر ائدوب زهرا, چاغیر قارداشیوی
تا گلوب آلسین دیز اوسته باشیوی
..
..
..
..
خیمه گاهه یوز دوتوب با شور و شین
عرض ائدوب ای مرتضایه نور عین
گل آنام زهرا گلوب قارداش حسین
قوللاریم یوخ, قان اولوب اشکیم منیم
پیکریم تک اوخلانوب مشکیم منیم
..
..
..
..
ائتدیلر شرمنده بو لشکر منی
گوزلویوللر آل پیغمبر منی
دی حلال ائتسین علی اصغر منی
یاره دن چوخ اینجیدور بو غم حسین
یئرده قانه غرق اولوب پرچم حسین
..
..
..
..
لطف ائله ای تشنه سلطانیم منیم
باشیم اوسته گل چیخور جانیم منیم
آب مشکیم تک آخور قانیم منیم
ای ائدن توپراقی لطفیله گهر
نوکرون سید بشیره قیل نظر
..
..
..
..
ای اولان مولالره مولا حسین
وی سرور سینه ی طاها حسین
نور چشم حضرت زهرا حسین
آند وئررم من ابوالفضل آدینه
حشر اولاندا چات بشیرین دادینه
..
..
..
..
#عباسیه_شهادت
#بیر_گونی_ائوده_خانیم_ام_البنین
#سیدبشیرحسینی
#ترکی #عباسیه
#زبدةالاشعار
بیر گونی ائوده خانیم ام البنین #عباسیه_سیدبشیرحسینی
نظر دهید