حالات حضرت امام کاظم علیه السلام
.
✍️ #زبدةالاشعار ✍️
.
🆔: @nohe_torki
.
#مصیبی_تبریزی
.
آفاقیده یارب بئله حرمان اولار اولماز
گلشندن اوزاق گول داهی خندان اولار اولماز
گلزارِ خزان دید یه سامان اولار اولماز
محبسده کی قوش بیرده غزلخوان اولار اولماز
فخرِ بشرین مسکنی زندان اولار اولماز
زندانیده آیا ئورگی قان اولار اولماز
.
.
حُسنی آی اولان حبسیده بیر هالیه بنزر
قرخ سنّی اولا سالک صد سالیه بنزر
گوزیاشلاری گلبرگده کی ژالیه بنزر
محبسده بیتن گول سارالان لالیه بنزر
شمشاد اولالی بیر نی توخالیه بنزر
بلبل بئله بیر گولشنه خوشخوان اولاراولماز
.
.
چوللرده بیتن گول نئجه دور خارین اسیری
گوندوزلری خورشید شرر بارین اسیری
ظلمت گئجه سی ظلم شب تارین اسیری
اولموشدی ولایت گولی تاتارین اسیری
وحشیّت هارون جفاکارین اسیری
تاریخیده باخ گور بئله طغیان اولار اولماز
.
.
دستور گلوب حبس اولونا موسی کاظم
اجباریله بغداده ائدوبلر اونی عازم
بی د ینیلر اولموشدیدله مولایه مُلازم
بولموبله بودور چرخْ نظاماتینه ناظم
خورشیدین ایشیقلانماقینا جلوه سی لازم
گون بوندان ایشیق آلماسا تابان اولار اولماز
.
.
قویموبلا طراوت قالا گلزار و چمنده
دستور گلوبدور پسر شاهکه ؛ سِنده
زهرانین عزیزین چکه زندانیده بنده
باغلاندی ایاقلارینه زنجیریله کونده
گور کیمسه چکوب شیر بلاجونی کمنده
روباه ائوینون پایه سی لرزان اولار اولماز
.
.
محبس نئجه محبس گونوزی لیلۀ ظلمت
هر نقطه سی مولامیزا سجّادۀ طاعت
قرآن اوخیان صوتی وئروب حبسه حلاوت
گوندوز گئجه تک مشغله سی ذکر و عبادت
بیر کس یوخودی ائتسون او مظلومی عیادت
فکر ایله ؛ بو احواله ئورک قان اولار اولماز
.
.
رخساره ، زجاجِ گوزونین اشکی آخاردی
دلدارینه چشمِ دل و قلبیله باخاردی
قرآن اوخیان صوتی سماواته چیخاردی
هر چند حزین ناله لری قلبی سیخاردی
بیر آه چکیدی ولی هارونی ییخاردی
مبعوث خدا تابع فرمان اولار اولماز
.
.
بیر کس کی ائدوب نورِ رخی عالمی تنویر
آفاقیده جدّی آتاسی امّته تنذیر
کِلکِ فلک انصافیدی یازسون بئله تقدیر
هارون شقی دن وئره یوز بیر بئله تقصیر
باغلانسون امام زمَنین بوینونا زنجیر
احرارِ زمانین گوزی گریان اولار اولماز
.
.
زندانیده اون بیر ایلی محبوسیدی مولا
دوشموشدی محاقه مهِ گردون تولّا
هارون اولوب افکار پریشانینه اغوا
بیلموب آقانین قالماقینی مصلحت ، اصلا
دستور وئروب شاهکین اوغلی ائده اجرا
البته کی ظلمین ائوی ویران اولار،اولماز؟
.
.
تاریخیده وار ، سِند ستمکار و دنی دی
شمرین یولونی جور و جفاده گئده نی دی
بی رحم لیقی خلقه عموماً علنی دی
هر جور و جفا والله الیندن گلنی دی
ظلم ائتدی او بیر شخصه ، گلِ پنج تنی دی
چرخ فلکین گردیشی لرزان اولار اولماز
.
.
تا صادر اولوندی آقامین قتلینه فرمان
تدبیر قیلوب بیله ، همان سِند نگهبان
سیراب ائلیوب زهریله خرمانی او شیطان
جبراً آقاما امر اولونوب میل ائده اوندان
بولمَم ندن آفاقه اوگون دوشمدی طوفان
خورشید چو خاموش اولا طوفان اولار اولماز
.
.
زهرین اثریندن جگری قان آقام ایوای
دیل یاره ، آخان قانی دوداقدان آقام ایوای
فریاده گلوب محبس و زندان آقام ایوای
آغلار گوزیله سسلوری دربان آقام ایوای
معناده دییوب عالم امکان آقام ایوای
شیعه بو بویوک غمده پریشان اولار اولماز
.
.
هارونه خبر وئردیله چاتدون داهی کامه
وئر مژده امامین ایشی چون یتدی تمامه
تا چاتدی بو اخبار همان شاه لئامه
دستور وئروبدی خدم و هنگ و غلامه
تجهیز شکار ایلیون اغوای عوامه
گورسونله امام اوغلودا بی جان اولار اولماز
.
.
اوچ گون آقانین نعشی قالوب گون قاباقیندا
بیر حالیده کی کُنده واریدی ایاقیندا
قان لخته سی هم دیلده قالوب هم دوداقیندا
معلومیدی زهرین اثراتی یاناقیندا
اوچ گون صورا هارون قییدوب صبح چاغیندا
بیر سوز دئدی یازسام ئورگین قان اولاراولماز
.
.
امر ایله دی حاضر اولا تا دورد نفر حمّال
بیر تختۀ پاره گتوسینلر اورا فی الحال
بیر تخته تاپوب گتدیله اول قوم بدافعال
اوّل آییریبلار آقادان کونده و اغلال
بوینوندا کی زنجیری صورا آچدیلا جُهّال
بیر بیله بدن قانیله غلطان اولار اولماز
.
.
محبسدن او نعشی چیخادوب فرقۀ شیطان
تا غسل اولونوب دفن اولا ارباب محبان
یولدا گوروب اول حال غم افزانی سلیمان (1)
باشه ووروب آغلار گوزیله ایله دی افغان
سسلندی گلون باب الحوائجدی وئروب جان
بو واقعه دن قلب فلک قان اولار اولماز
.
.
بیر خلعت دیبا گتوروب سیّد نامی
چوخ حرمتیلن غسل ائدوب اول میر همامی
ظاهرده ائدوب دفنینی اول مرد گرامی
باطنده ولی گلدی رضا ، آل بو پیامی
لاغیر ، امام اولماسا دفن ائتمز امامی
بو سوزلری ردّ ائتماقا برهان اولار اولماز
.
.
#گریز به #قتلگاه #دفن_شهدا
.
امر ائتدی سلیمان او زمان اهل و عیاله
تشییع ائده لر اول شرف عترت و آله
قبره قویولان وقتیده باخ شور و جلاله
جانلار ولی قربان شه بی شهپر و باله
جسمی یارا ، خم قامتی بنزردی هلاله
صبرین ائوی بو محنته تالان اولار اولماز
.
.
گونلر قاباقیندا یارالی نعشی گورن یوخ
جسمینده کی اوخ نیزه یاراسین بیتورن یوخ
کافور و کفن شاه شهیده گتورن یوخ
زهرایه بو احوالی خدایا یتورن یوخ
گر گلمسه سجاد ،اونی یئردن گوتورن یوخ
گوز کاسه سی گور قانیله عمّان اولار اولماز
.
.
ای قائمۀ نه طبق عالم امکان
وی کان کرم ، باب سخا ، معدن احسان
تا سرخرگ عشق «مصیّب»ده جوشور قان
ئوزمز الینی باب الحوائج قاپوسیندان
دردین گتورر تا ائده لر ئوزلری درمان
مشکل بئله درگاهیده آسان اولار اولماز
.
(1) سلیمان بن ابی جعفر عموی هارون که ازشیفتگان اهل بیت بود
.
.
#کاظمیه_شهادت
#آفاقیده_یا_رب_بئله_حرمان_اولار_اولماز
#ترکی
.
✍️ #زبدةالاشعار ✍️
.
🆔: @nohe_torki
نظر دهید