مصیبتین بیری مافوقین ایلسه تعداد #سجادیه_سعدی_زمان

بیان حالات حضرت فخرالساجدین امام زین العابدین (ع)
.
.
.
مرحوم سعدی زمان
.
.
مصیبتین بیری مافوقین ایلسه تعداد
اولار گوزینده مجسّم مصیبت سجّاد
.
امام ساجده چوخ ظلم اهل شام ایلدی
تمام ظلمینی اهل جفا تمام ایلدی
.
اولوب خلاص یزیدین الیندن اول شه دین
گلوب مدینۀ پیغمبری مقام ایلدی
.
اوچ ایل قضیّۀ کرب و بلا گچوب نعمان
گیدیردی حجّه گلوب یثربه خرام ایلدی
.
مشرّف اولدی حضور امام سجّاده
ادب یولیله امامه ازل سلام ایلدی
.
دئدی اولا سنه شاها آتام آنام قربان
بو قدر ظلم سیزه فرقۀ ظلام ایلدی
.
بیور گوروم سیزه هانسی بیری اشدّ اولدی؟
امام ذکرینی الشّام شام شام ایلدی
.
بیوردی کرب و بلاده اگر چه قوم یزید
رجال عترت اطهاری قتل عام ایلدی
.
عموم عم اوغلولاریم قارداشیم شهید اولدی
عدو بدنلرینی طعمۀ حسام ایلدی
.
تالاندی یاندی خیم اولدی دستگیر حرم
ستمله اهل جفا غارت خیام ایلدی
.
یانان یانوب ئولن ئولدی قالان سویولدی تمام
نه غارت؟ اوردا قیامت بیزه قیام ایلدی
.
اولوب اسیر قولی باغلی کوفیه گیتدوخ
زیادین اوغلی او ظلمیله اخذ کام ایلدی
.
مرتّب ایلدی بیر عیش مجلسی او دنی
عداوتاً او زنازاده اذن عام ایلدی
.
بو قدر ظلمه خوشام داد شام ظلمندن
ایشیق گونی گوزیمده ظلم شام شام ایلدی
.
قویوب حنا اله شام اهلی عیش و عشرتیله
گیرنده شهره تماشاچی ازدحام ایلدی
.
وروبلا هر باشی بیر محملین مقابلینه
او قسمت عترت اطهاری تلخکام ایلدی
.
آنا برابرینه ووردولار اوغول باشینی
تصوّر ایله آنا گور نجه دوام ایلدی
.
باجی گورنده جدا اوسته قارداشین باشینی
هجوم محنت و غم صبرین اختتام ایلدی
.
گلوب تکلّمه قرآن ناطقین باشی
تلاوت آیۀ ظلمی سر امام ایلدی
.
ویروب حرملرینه تسلیت او اعجازی
یارالی قلبلره صوتی التیام ایلدی
.
یارالی باشدا او اعجازی بیر عجوزه گوروب
امام باشینه بیر هتک احترام ایلدی
.
او ظلمیله بویانوب قانه هیکل توحید
عجبدی صبر خداوند لاینام ایلدی
.
همان جفائیله دلدن دوشوب لسان الله
سکوت رأس شریف شه فخام ایلدی
.
او شهرده اولونوب سنگسار آل الله
یهود طایفه سی بدره انتقام ایلدی
.
علاوه نیزه لیلر فخریله آت اویناتدی
نه شرم ایدوب بو جفادن نه ننگ و نام ایلدی
.
آت اویناداندا یره دوشدی نازنین باشلار
بیز آغلادوخ ولی عیش ارذل انام ایلدی
.
یول اوسته دوزدوله سازنده و نوازنده
علاوه طعن و شماتت ببزه لئام ایلدی
.
بیر آیری فکره بیزیم حقّیمزده دوشدی یزید
جفا یولیله او ناپخته فکر خام ایلدی
.
دئدی کنیز آدینا آل مصطفانی ساتون
منی حساب اوزینه گوئیا غلام ایلدی
.
ساتاردیلار او یری که کنیز دیلم و روم
همان یری بیزه اهل جفا مقام ایلدی
.
اگر چه ساتمادیلار لیک خلد اعلاده
بابام پیمبری بو غصّه تلخکام ایلدی
.
یتوردی تا سوزینی بو یره امام مبین
پوزولدی حالتی اوز مطلبین ختام ایلدی
.
دوروب ایاقه مرخّص اولوب گیدوب نعمان
امام ناله ولیکن علی الدّوام ایلدی
.
اودور همیشه گچن گونلرینی یاد ایلیوب
گجه گونوز توکوب اشگین نوا مدام ایلدی
.
گورنده سو سالوب عطشان ئولنلرین یاده
سرین سو ایچماقی اوز نفسینه حرام ایلدی
.
غریب آتاسینا اوتوز بش ایل عزا دوتدی (1)
ئولونجه آغلاماقا سعی و اهتمام ایلدی
.
گیچوردی گوردی کسور بیر قویون باشین قصّاب
دایاندی ناله و شیون او مستضام ایلدی
.
دئدی سو ویروموسن آیا بونون باشین کسوسن
جواب ویردی که کیم ذبح مستظام ایلدی
.
گلوب فغانه دئدی وای غریب ئولن بابا وای
بابامی ذبح سوسوز فرقۀ ظلام ایلدی
.
یتوردی صائیم و قائیم اوز عمرینی باشه
او شاهی ظلمیله مسموم تا هشام ایلدی
.
هشام یا که ولید ایتدی اول شهی مسموم
و یا هر ایکیسی هتک احترام ایلدی
.
ابوتراب چراغی گچوب ئولوب سجّاد
تراب تیره نی اول شاه دین منام ایلدی
.
بودور «حسینی» منیم مقصدیم ئولنده گورم
خدای حق یریمی وادی السّلام ایلدی
.
(1) جلد دوم منتهی الآمال ص 27

.
#سجادیه_شهادت #سعدی_زمان
#کوفه #خرابه_شام #سجادیه
#مصیبتین_بیری_مافوقین_ایلسه_تعداد
#امام_ساجده_چوخ_ظلم_اهل_شام_ایلدی
#ترکی #چهارده_معصوم_حسینی ص 228
#زبدةالاشعار