نولوردی عمرده بیر نچّه لحظه فرصت اولیدی #مهدیه_فانی_تبریزی

نولوردی ….
.
.
عباس داداش زاده ( فانی تبریزی )
.
.
نولوردی عمرده بیر نچّه لحظه فرصت اولیدی
او لحظه لرده منه وصل یار قسمت اولیدی
.
نولوردی خوی بهیمی وجودی ترک ‌ایلییدی
نصیب هر کسه عمرونده آدمیت اولیدی
.
نولوردی گوز گوره جاق گر گونوز تمام رذائل
دوشیدی شمس کسوفه زمانه ظلمت اولیدی
.
نولوردی نفسنون ادبارینی گوریدی خلایق
جهاندا ترک غروریله هر منیت اولیدی
.
نولوردی شُوم تمدّن کسیدی علقه بشردن
چهار رکن جهان جمله بربریت اولیدی
.
نولوردی تک بو گونون گورمییدی دیدۀ غافل
صباح روز قیامتده متن صحبت‌ اولیدی
.
نولوردی فقر و فقیره حقارتیله باخانلار
بو گردش فلکیله دچار ذلّت اولیدی
.
نولوردی مصحف منزل اولیدی هادی امت
کلام حقّیله انسان آرا حکومت اولیدی
.
نولوردی هر دلی تقوا ائدیدی وادی ایمن
تمام نوع بشر غرق نور و رحمت اولیدی
.
نولوردی حجّت حق عالمی ایدیدی منوّر
او هاشمی مَهَه دستور، ختم غیبت اولیدی
.
نولوردی پیشرو کاروان جوامع ایچینده
عنایت حق سبحانیله او حضرت اولیدی
.
نولوردی « فانیه » یارب ئوزون عنایت ائدیدون
ختام عمری اونون ختم بر شهادت اولیدی
.
.
#پندیات
#مهدیه #پندیات_فانی_تبریزی
#نولوردی_عمرده_بیر_نچه_لحظه_فرصت_اولیدی
#فانی_تبریزی
#ترکی