زبانحال ام لیلا در وداع علی اکبر (ع)
.
✍️ #زبدةالاشعار ✍️
.
🆔: @nohe_torki
.
سیفی اردبیلی
.
اکبریم جذبه ویروب گورنه خدا گوزلرووه
سرمه حسرتدی عزیزیم او قرا گوزلرووه
.
.
دست صورتگر ایدوب حُسنیده ممتاز سنی
یارادوب حور و ملکدنده اوغول ناز سنی
آز قالور جان قوشی گورجک ایده پرواز سنی
بسکه مشّاطه ویروب حسن و جلا گوزلرووه
.
.
تیر مژگانلاروون هر بیری بیر صیدی یخار
حسرتی قاش گوزوون جان اریدر قلبی سخار
هر غمیم دیلده اولا بیر باخشا باشه چخار
باخارام دل دولی امّیدیله تا گوزلرووه
.
.
گینوبسن گوزلیم آغ کفن آغ گل مثلی
تللرون سایه سالوب آلنوا سنبل مثلی
اوخشارام قامت موزونوی بلبل مثلی
لیلینون هی دیرم جانی فدا گوزلرووه
.
.
هر گوزلدن سنی استاد ازل باش یارادوب
یوزوی برگ شقایق کیمی بشاش یارادوب
ایکی شمشیره مثل گوزلروه قاش یارادوب
ایلیوب هر نه گوزلّیک وار عطا گوزلرووه
.
.
حقلیسن بوردا گوزوندن آنوی آتماقوا
عجلون وار بیلورم عشق ایوینه چاتماقوا
آز قالور قانه باتوب لیلینی آغلاتماقوا
دایان اکبر اوخیوم ایندی دعا گوزلرووه
.
.
گیدوسن گرچه علی یوخدی امیدیم گله سن
گل الون سینمه قوی گوگلومی آل بیر اله سن
من سپوم تپراقوی باشیمه گیت مقتله سن
مست ایله بیرده بو لیلانی آلا گوزلرووه
.
.
نار ایدوب صحبت هجرون نفس گرمی منه
چکوب عشقون منی اوغلوم بو پریشان چمنه
اوخورام خیمه ده صبر آیه سینی سن گلنه
بلکه بیر یولدا گوزوم دوشدی قرا گوزلرووه
.
.
.
#اکبریه_سیفی_اردبیلی
#اکبریه_شهادت
#اکبریم_جذبه_ویروب_گور_نه_خدا_گوزلرووه
#ترکی
.
✍️ #زبدةالاشعار ✍️
.
🆔: @nohe_torki
نظر دهید