بو یرده یادیمه دوشدی بو شاهون اوغلی حسین #حسینیه_صحاف_تبریزی

شهادت امام حسین(ع) و قتلگاه
قسمتی از شعر شهادت حضرت علی علیه السلام با مصرع اول « على شهادتینی ایلینده فکر و خیال »
..
..
..
..
مرحوم صحاف تبریزی
..
..
..
بو یرده یادیمه دوشدی بو شاهون اوغلی حسین
سالوبلار آتلار ایاقینه نازنین بدنین
..
کسوب باشین یارالی پیکرین قویوب یرده
شعاع شعشعۀ شمس اولوب اونا پرده
..
او سینه ای که ئوپردی یوزین قویاردی بتول
مشبّک ایلدی توپراقلار اوسته سُمّ خیول
..
او حاله سالدیلا آتلار ایاقی پیکرینی
حسینون ایتدیله مسحوق جسم اطهرینی
..
او قدر وردیلا داش کوفیان بی ایمان
که اولدی سنگ جفا آتدا پیکری پنهان
..
سبب اودور او چولی قارداشی ئولن زینب
گوروب دیردی منیم قارداشم نولوب یارب
..
نه گوردی سس گلور ای تیر محنت آماجی
دولانما چوللری گل بوردایام بلالی باجی
..
همینکه زینب کبری حسین سسین آلدى
او حالتیله گوروب گور نه حالته قالدى
..
یتیشدی تضرعنه تا او زار و دلخسته
باخوب نه گوردی دوشوب بیر بدن یوزی اوسته
..
نجه بدن که نه باش وار نه ال سلامتدور
پوزوبلا نقشه سنی سر به سر جراحتدور
..
پره اوتوردی خانم داشلاری کنار ایلدی
او گول کیمی بدنی زینت کنار ایلدی
..
دیدی سن ای یارالی نور هر دو عینیم سن
سسیمه سس ویر اگر سن منیم حسینیم سن
..
او ساعتیکه باشون کسدی شمر ذی الجوشن
حیالی عترتیوی سویدی بی حیا دشمن
..
مخدّرات حرمده نه زیب و زیور وار
باشی بلالی باجون نه باشندا معجر وار
..
کسوبدی چاره می دشمن ایدوم نه چاره حسین
مجال یوخدی قویوم جسموی مزاره حسین
..
سحاب زلف قمر او سته سایبانیم وار
که یعنی بو آغاران ساچلارا گمانیم وار
..
خیالی وار یتوره شمر ظلمین اتمامه
باشون دالنجا بیزى باش آچوخ چکه شامه
..
شرار آتش ظلمیله کونی یاندورالار
سالوب قاباقلارینا باش آچوخ دولاندورالار
..
روادی قانه دونه گوز یاشیم خداحافظ
بوسن بو دشت بلا قارداشیم خداحافظ
..
مُطوّل ایتمه سوزی ایله مختصر «صحاف»
نشان ویرر اوز اوزین گر جواهراولسون صاف
..
گتور بو عرصه ده جولانه معرفتله کُمیت
یقین ایله آلوسان روز حشر بیتیوه بیت
..
بو جزئی خدمتوی فاطمه قبول ایلر
قیامتین گونی نقداً اوزی وصول ایلر
..
..
..