یاده دوشنده مهر و وفاسی رقیه نین #حضرت_رقیه_تائب_تبریزی

حالات حضرت رقیّه (س) در خرابه شام
..
..
..
..
مرحوم تائب تبریزی
..
..
..
..
یاده دوشنده مهر و وفاسی رقیّه نین
شور آرتیرور باشیمدا هواسی رقیّه نون
..
گورموب ایله وفالی اوشاق چشم روزگار
گلمز بیانه مهر و وفاسی رقیّه نین
..
آلموشدی درس سلم و رضانی حسیندن
هر بیر قضایه اولدی رضاسی رقیّه نین
..
گاهی دوگولدی گه سویولوب دست ظلمیله
گیتدی الیندن عزّ و اثاثی رقیّه نین
..
شامه چکوب ولی آتا عشق و محبتی
اولدی او عشق راهنماسی رقیّه نین
..
گه ناقه دن دوشردی گیدردی پیاده یول
دلده نوا ایاقدا یاراسی رقیّه نین
..
شامه کیمی گیدوب قولى باغلو او نازنین
ویرانه منزل اولدی سراسی رقیّه نین
..
ویرانه ده یاتوب قوری یرلرده هر گیجه
نی تک شکسته دلده نواسی رقیّه نین
..
قولدا طنابی چوخ گیجه لر یاتدی اینجیدی
تحلیله گیتدی تاب و قواسی رقیّه نین
..
زر تک اَریتدی بوتۀ غم ایتدی زرد رنگ
گیتدی وجودی قالدی نماسی رقیّه نین
..
باد مخالف اسدی گلستان عمرینه
گل تک سارالدی گیتدی صفاسی رقیّه نین
..
توپراقلار اوستی بستری گون تابشی لحاف
قانلو سرشگ اولدی غذاسی رقیّه نین
..
چوخ وقت آغلیوب گیجه نی صبحه تک تمام
حلقی دوتولدی باتدی صداسی رقیّه نین
..
اودلیدی بسکه قلبی پیمبر عیالینی
یاندوردی یاخدی سوز خَفاسی رقیّه نین
..
یرده یاتانمازیدی آلاردی قوجاقینه
گه مهربان بی بی گه آناسی رقیّه نین
..
اولدی اورکده چوخ سوزی اما دینمدی
مانع اولوب بیانه حیاسی رقیّه نین
..
هر دردی بیر یانا ولی بیر دردی بیر یانا
اولموب همین بو درده دواسی رقیّه نین
..
سالمازدی دلدن آنی علی اصغرین آدین
یاده دوشردی غنچۀ یاسی رقیّه نین
..
سویلردی شیرخواره علی اصغریم هانی
یوخدور ندن او ماه لقاسی رقیّه نین
..
ساقدور اگر ویرون اونی بیرده قوجاقیمه
جسمینده روحدور او اخاسی رقیّه نین
..
از بسکه اول یتیمه بالا چکدی درد و غم
گوزده بیر اولدی صبح و مساسی رقیّه نین
..
بسکه آتاسینا واریدی چوخ علاقه سی
دوشموب ئولونجه دیلدن آتاسی رقیّه نین
..
هر دم دییردی عمّه بابام گلموری ندن
بولمور باشیندا وار نه بلاسی رقیّه نین
..
من اوز باباما سؤگلیم چوخ سُور منی
نولمور باشیندا یوخدی هواسی رقیّه نین
..
سویلردیلر ایدوبدی بابان کعبیه سفر
بیر گون گلر او شاه ولاسی رقیّه نین
..
رؤیا ایدوب باباسینی رؤیاده بیر گیجه
تاراجه گیتدی تاب و قواسی رقیّه نین
..
دوردی اوتوردی آغلادی لحن حجازیله
دیلدن اوجالدی داد و بکاسی رقیّه نین
..
آلدی سسین آنا باجی عمّه اویاندیلار
جمع اولدی باشه آل عباسی رقیّه نین
..
سسلندی گوردوم عمّه بابامی خرابه ده
بوردایدی شاه کرب و بلاسی رقیّه نین
..
دور دوت الیمى بیر دولاناق عمّه جان تاپاق
گیتدی هارا او میر هداسی رقیّه نین
..
بازار عشقی گرم گوروب بو خرابه ده
عشقیله واردى بیع وشراسی رقیّه نین
..
نازلی رقیّه آغلادی آل الله آغلادی
اولدیلا همصدای صداسی رقیّه نین
..
شیون سسین یزید ایشیدوب اولدی باخبر
یاده دوشوب غریب باباسی رقیّه نین
..
ارسال ایدوب خرابیه سلطان دین باشین
آز اولسون آه و ناله بناسی رقیّه نین
..
امر یزیدیله دل شبده خرابیه
گلدی ایشیقلی ماه لقاسی رقیّه نین
..
گورجاق او ظلمت ایوده او بدر تمامینی
آغلار گوزونده آرتدی ضیاسی رقیّه نین
..
آغلار گوزیله سسلدی گلدون گل ای بابا
گور وار نه حال ضد رجاسی رقیّه نین
..
درک ایتماقا حضوریوی چوخ ایتموشم دعا
یتموش اجابته او دعاسی رقیّه نین
..
ایتدیم نه یاخشی وقتده درک حضور یار
ای چرخ مهره شمس ضُحاسی رقیّه نین
..
چوخداندی سوزلریم اورگیمده قالور بابا
ایمدی اولوبدی وقت اداسی رقیّه نین
..
ایله مُجاز عرض ائلیوم شرح حالیمی
واردور باشیندا گور نه بلاسی رقیّه نین
..
سندن صورا نقدر بابا یوز ویروب بلا
اولموب دلینده کلمۀ لاسی رقیّه نین
..
گاهی ووروب دوگردیله سانمازدیلار بابا
هرگز دگول بو ظلم سزاسی رقیّه نین
..
قان ایلیوبدی باغریمی دشمن شماتتی
شاهددی ربّ ارض و سماسی رقیّه نین
..
دؤزدی دایاندی عشقوه ویرموشدی چونکه دل
اولموب بیرینده چون و چراسی رقیّه نین
..
گورموشدی قانلو توپراقین اوستونده یاتماقون
ای شهریار ملک ولاسی رقیّه نین
..
ویرانه یرده یاتماقینی واجب ایلدی
رسم وفایه اولدی وفاسی رقیّه نین
..
گلدی خرابه شامده ویرانه ده یاتا
ویرانه منزل اولدی سراسی رقیّه نین
..
ویرانه شامده او قدر اینجیدوبدیلر
یاددان چیخودی کرب و بلاسی رقیّه نین
..
یوخ طاقتیم دیلیمده دییم بیر به بیر بابا
واردی نه حال غصّه فزاسی رقیّه نین
..
شاهانه عزّتی گیدوب الدن اولوب اسیر
اگنینده واردی کهنه لباسی رقیّه نین
..
غارت اولوبدی ظلمیله گُلدوز معجریم
واردور باشیندا ایمدی قراسی رقیّه نین
..
بابا مریض عشقویدیم چوخ زمانیدی
ویرانه اولدی دار شفاسی رقیّه نین
..
نچّه دقیقه اول منیله بوردا هم نفس
گلدی بقاسی گیتدی فناسی رقیّه نین
..
فکریم بودور یوزونده گوزوم جان ویرم بابا
دلده بودور بیر عمده مُناسی رقیّه نین
..
قال عزّتیله نعشیمی یردن اوزون گوتور
یوخدور بو یرده اوزگه رجاسی رقیّه نین
..
بیرده بو کهنه کوینگیمی قیل کفن منه
آرتوب بو کوینگیله بهاسی رقیّه نین
..
ای بی کفن بابا گر اولا کوینگیم کفن
الدن اولار خدایه ثناسی رقیّه نین
..
هرکس ایشیتسه بی کفن ئولماقیمی دیر
چوخ عشقی وار حسینه بالاسی رقیّه نین
..
گل تک باباسی باشینی بیر اؤپدی ایگلدی
اولدی او امر عُقده گشاسی رقیّه نین
..
آلدى متاع وصلى ثمن نقد جان ویروب
بسکه چوخودی جود و سخاسی رقیّه نین
..
بلبل کیمی او قدر گل اوسته ایدوب نوا
باتدی نفس کسیلدی صداسی رقیّه نین
..
خاموش اولوب او بلبل شوریده گل کیمی
یکسر سارالدیلار قُرَباسی رقیّه نین
..
غسلین نجه ویروب نجه یردن گوتوردولر
عالِمدی لایزال خداسی رقیّه نین
..
واردی بوقدر حالینه غسّاله آغلادی
گوردی بدنده واردی یاراسی رقیّه نین
..
سسلندی ئولمیوبدی بونی ئولدوروبدولر
بیحد اولوبدی رنج و عناسی رقیّه نین
..
دللرده ناله حلقۀ ماتم قوروبدولار
باشلاندی اول خرابه ده یاسی رقیّه نین
..
عمّه آنا باجی هاموسی ویردی سس سسه
آغلاشدی اولدی نوحه سراسی رقیّه نین
..
ایله عزا دوتوب بی بی سی قویدی یادگار
وار ایمدی ده هر ایوده عزاسی رقیّه نین
..
بو شرح حالی تائبه یازدیردی احمدی
لطف ایلر اجر و مزد خداسی رقیّه نین
..
..