آچدوقون مکتب همیشه پایدار اولسون حسین #حسینیه_عدلی_تبریزی

در مقام و نهضت حضرت اباعبدالله الحسین علیه السلام
.
.
حاج اصغر فرشچی ( عدلی تبریزی)
.
آچدوقون مکتب همیشه پایدار اولسون حسین
هر بنای ظلم و جوری تار و مار اولسون حسین
.
.
سن مقام عشقیده ویردون بیر عالی امتحان
ممتحن اولدی خدا یاور لرون پیرو جوان
سبقت آلدی بیر بیریندن ویردیلر جانانه جان
تا جهان وار بو حماسه بر قرار اولسون حسین
.
.
دامن اسلامیده گوردون که واردور رنگ ننگ
بیر قیامیلن قیامت ایلدون بی یار و هنگ
کربلاده باشلادون تا قوم عدوانیله جنگ
دست ظلمی قویمادون دینه سوار اولسون حسین
.
.
سن دیینده هَل مُعین درک ایلدی آواز عشق
سسلنوب گهواره دن طفل رضیع سرباز عشق
عشقه باخ آلدی مدال عشقینی جانباز عشق
هنگ عشقونده دئدون تا شیرخوار اولسون حسین
.
.
مست اولموشدی حبیبون بارگاه عشقیده
هم قدم اولدی سنیلن شاهراه عشقیده
زر مدال آلدی دایاندی جایگاه عشقیده
ایستدی جانان یولوندا سربدار اولسون حسین
.
.
سن حسینون نهضتی حفظ حجاب اوسته اولوب
باغ دینون گللروندن نهضتونده چوخ سولوب
حیف اولا اسلامی یرلر بی حجابیلن دولوب
بی نمازو بی حجاب دیندن کنار اولسون حسین
.
.
سن اوگون حیدرکیمی ویردون نمازه اعتبار
ال آچوب راز و نیازه آختاروردون وصل یار
ظهر عاشورا ده اولدون دین حقه جانثار
تاپمادون بیرجه مسلمان دینه یاراولسون حسین
.
.
حاکم اولسون قویمادون اسلامیانه اجنبی
ریشۀ اسلامه قان ویردون دیریدّون مذهبی
اورگدوب گیتدون ایده تکمیل نهضت زینبی
ایستدون زینب جهاندا نامدار اولسون حسین
.
.
ذبح اعظم وقته گون باتدی دوتوب آفاقی غم
عرش و فرشی چولقادی سنگینی درد و الم
التفاتون زیر لبده ذیحیاته وردی دم
هانسی شه دور سنکیمی تا شهریار اولسون حسین
.
.
سن شهیداولدون اسیراولدی باجون بی اختیار
بو اسارتده حفیظ اولدی حجابه چون حصار
لیک آغریندا دلی اولموشدی الده ذالفقار
اونداکی ایستوردی شامه رهسپار اولسون حسین
.
.
منجنیق غمده گر چه قلبینی سیخدی باجون
مکتبونده امتحاندا اولین چیخدی باجون
نطق آتشباریلن دشمن ایوین یخدی باجون
قویمادی طلم یزیدی استتار اولسون حسین
.
.
کربلاده گر چه قانون آخدی اولدی جویبار
لیک ایچدی نخل دین قان اولدی قرآن پایدار
مسلمین اورگشدی سندن بو اولوب دلده شعار
دشمن قرآن و دین دنیاده خوار اولسون حسین
.
.
زور گویانه قیامون موجب وحشت اولوب
چون قیامه چوخلی ملتده بوگون همّت اولوب
باعث پیروزی خون کلمۀ وحدت اولوب
مسلمینه سن دئدون خوش روزگاراولسون حسین
.
.
سن حقیقت شمعی سن عاشق لرون پروانه دی
حُبُ عشقوندن ایچن می مست اولوب دیوانه دی
درس آلانلار مکتبوندن عاقل و فرزانه دی
بیر بیله مکتب معلم بی شمار اولسون حسین
.
.
ای شهید راه حق قیل بیر نظر بو مطلبه
فرقتونده قلب لردوشدی گینه تاب وتبه
دعوت ایله کربلایه آند ویروخ زینبه
قویما چوخ بواهل هیئت انتظاراولسون حسین
.
.
یازدوروب « عدلی » آدین درگاهیوه خدمتگزار
عاصیدورامّا سیزه عشق اوسته چوخ نوحه یازار
سن شفاعت ایتمسن محشر گونی اود دا یانار
خادمین ارباب قویمازاهل نار اولسون حسین
.
.
#پیام-نهضت_حسینی
#حسینیه_مدح
#آچدوقون_مکتب_همیشه_پایدار_اولسون_حسین
#عدلی_تبریزی
#ترکی
.
.