هر مطلبین که پایه و اصل و اساسی وار #الهادی_حضرتی_ناعمی

ولادت و معجزۀ حضرت امام علی النقی(ع)
#گریز به حضرت سیدالشهدا(ع) و #قتلگاه
..
..
..
..
علیرضا حضرتی(ناعمی)
..
..
..
..
هر مطلبین که پایه و اصل و اساسی وار
نظمه چکیلسه دار فناده بقاسی وار
..
شاعر گرک تلاش ائلیه دوز خبر یازا
چون ایندی بیر زماندی بئله اقتضاسی وار
..
اون دورت گجه کچوب مه ذی الحجّه دن بوگون
ماه شب چهاردهین حول و ولاسی وار
..
برج ولاده بیر مه تابان طلوع ائدوب
گول چهره سینده جلوه ی ایزد نماسی وار
..
ای دل ندور گئنه بو قدر عشرت و سرور؟
اهل ولایتین بئله حال صفاسی وار
..
بزم طرب گئنه قورولوب عرش و فرشیده
دیلده ملکلرین بو گجه حبّذاسی وار
..
هنگامه واردی بیت جوادالائمّه ده
علت اودور جهانیده عشرت اساسی وار
..
الله وئروب اؤ حضرته بیر مه جبین اوغول
خلقتده یوخ مثالی، رخ دلرباسی وار
..
زیبا ئوزی، قرا گوزی ، غنچه دوداقلاری
مین یوسفین برابری حُسن و ضیاسی وار
..
قاشلار کشیده، بیربیره پیوسته چون کمان
کیپریکلری اوخ اولسا منیم تک فداسی وار
..
والّیل بیر اشاره دی زلف سیاهینه
والشّمس گول جمالیدی کی والضّحاسی وار
..
وئردی آتا قوجاقینه مین شور و شوقیلن
به به نه مؤمنه نه مؤدّب آناسی وار
..
عرض ایلدی: سمانه فدا آدوه آقا
گؤر اوغلوین نه قامت و قدّ رساسی وار
..
رؤیت ائله جمال جمیلین سروریلن
نه بانمکدی،گؤر نجه شیرین اداسی وار
..
قیل صحنه نی مجسّم اؤزون حظّ آپار«حبیب»
بو حظّین اهل عشقه فقط اختصاصی وار
..
گون اولدوزی قوجاقه آلوب ئوپدی گول ئوزون
نوری قاریشدی نوره نه نور و ضیاسی وار
..
باخدی امام امامه الین قوزادی گویه
یارب دئدی دیلینده بو عبدین ثناسی وار
..
بو طلعت و جمالیده ، من گورّم حیدری
گول صورتینده نور رخ مرتضاسی وار
..
قویدوم آدین علی دیه عشّاقی یاعلی
چونکه بو آددان اهل جفانین هراسی وار
..
هادیّ اهل عشق اولار عالمده بو بالام
هرکیم قدم یولوندا گوتورسه وفاسی وار
..
فخر ایلورم بو اوغلوما ای ذات ذوالجلال
مهدی آدیندا چونکی گؤزل بیر بالاسی وار
..
جدّ جناب قائم آل عبادی بو
اؤ منتقم که الده عدالت لواسی وار
..
القصّه گون گچوب ، دولانوب آیلار ایللره
چون روزگار دوریده دی ، اقتضاسی وار
..
عصر امامتیدی اؤ سلطان عالمین
تاریخی گئت مرور ائله قول بناسی وار
..
شیخ قمی کتابت ائدوب بو روایتی
محشر گونونده واردی یقینیم جزاسی وار
..
مندن ائشیت بو مطلبی ای شیعه فخر ائله
گؤر بیر ائمّه نون نجه شأن عُلاسی وار
..
حجّتدیلر ائمّه خداوند عالمه
واقفدی هرکیمین اون ایکی پیشواسی وار
..
الله وئروب ائمّیه دنیاده اختیار
الده امامین حکم فنا و بقاسی وار
..
امر امامیلن دولانور چرخ روزگار
سیّاره لر کی سیریده دی رهنماسی وار
..
هر عصرین اؤز امامیدی فرمانروای عصر
تحت ولایتینده بوتون ماسواسی وار
..
آمردی هر امام، هامی خلقته ولی
الله نه امر قیلسا امامین رضاسی وار
..
چوخ محنته دوشوبدیله هر تک تکی بلی
حقّ اهلینون حقیقت قالوا بلاسی وار
..
مولا علی الهادی اون ایمجی امامیمیز
اول شه که کربلایه یاخین سامراسی وار
..
بیرگون اونی خلیفه چاغیردی حضورینه
گویا گئنه اؤ حضرته فکر جفاسی وار
..
همراه اولاق گلون اؤ امام همامه بیز
باشدا گؤرک نه محنتی نه ماجراسی وار
..
وارد اولوب خلیفه ی جورین حضورینه
گؤردی باشیندا جور و جسارت هواسی وار
..
امر ایلیوبدی لشکری آماده باش اولوب
باشدان ایاقه جسمیده جنگی لباسی وار
..
بیر عدّه سی پیاده دی شمشیرزن دیلر
بیر عدّه سی سواره دی الده جداسی وار
..
ظاهرلری عبوس و خشونت طلب دیلر
باطن لرینده قلب زمخت و سیاسی وار
..
یوخدی اولاردا رحم و مروّتدن هئچ اثر
اما جفا و کینه ی بی انتهاسی وار
..
گؤرسیدی کیم اؤ صحنه نی تیترردی پیکری
ازبسکه رعب و وحشت محنت فزاسی وار
..
ائتدی اشاره توبرالارین دولدوروب قوشون
یول باشلیوب نقدری سپاهین قواسی وار
..
بیر تلّ ائدوبله فوری بپا خشت خامیدن
اؤ تلّین هریانا شُرُف مُقتضاسی وار
..
تلّه چیخوب امامی ده سسلندی یانینه
گل یعنی گؤر بو لشکرین هاردا قیاسی وار
..
فکر ایلدی خلیفه آقا گورسه قورخاجاق
دیلده هامی گورر او شهین التماسی وار
..
بیلموردی مرتضی بالاسی وحشت ایلمز
جدّی علی دی، شهرت شیر خداسی وار
..
حضرت باخوب اؤ لشکره بیر، گلدی صحبته
زهرا بالاسی سن دئمه کیمدی هاراسی وار
..
باخدیم سنون بو لشکروه شأن و جاهوه
قالماز سنه اگرچه، جهانین فناسی وار
..
گویلون گر اولسا من سنه بیر صحنه گؤرسدیم
گؤر هادینون نه لشکر گردون اساسی وار
..
اوز آستان حضرت داداره دؤندروب
دیلده خلیفه گؤردی امامین دعاسی وار
..
پرده کنار اولوبدی گؤزوندن اؤ ظالمین
بیر صحنه گؤردی شرح ائلسم مرحباسی وار
..
جنّ و ملکدی سربه سر افلاکی دولدوروب
صفدی نه انتهاسی نه ده ابتداسی وار
..
باشدان باشا مسلّح و آماده ، جان به کف
قربان اؤ شاهه اولماقا مین التجاسی وار
..
شمشیر اللرینده، چکیلموش غلافیدن
مانند ذوالفقاریدی برق بلاسی وار
..
سبقت ائدولله بیربیره ابراز عشقیده
هر نه اؤ حضرت امر ائلسه جان فداسی وار
..
دور و برین آلوب آقانین پاکبازلر
صادقدیلر ،نه ریب و نه رنگ و ریاسی وار
..
غش ایلدی گؤرنده بو احوالی اول دنی
بیچاره دور اؤ کس که جهاندا خطاسی وار
..
اول تلّین اوستن اولدی حقارتله سرنگون
دیلده گوروبدی لشکری واویلناسی وار
..
اندی اشاقه حضرت هادی وقاریلن
سایه سالوبدی باشینه عزّت هماسی وار
..
گلدی دیله خلیفیه فرمایش ایلدی
آل پیمبرین شرف لایُراسی وار
..
دنیانی وئرمیشوق سیزه، بیزدن نه ایستیسوز؟
ظالملرین نه خفّت بی منتهاسی وار
..
محشر گونونده عترتین اجلالی گورسنر
سلطانلیقین اؤ گونده بیزه اختصاصی وار
..
زهرا آنام گلنده یاغار نور محشره
عالم گؤرر کی هاتف غیبین نداسی وار
..
«غُضّوا عُیونَکُم» گلوری بنت مصطفی
اول فاطمه کی رتبه ی خیرالنّساسی وار
..
بیربیر تمام شیعه نی زهرا باغیشلادار
چون اللهین اؤ حضرته بیر لطف خاصی وار
..
قانلی باش الده اؤزگه قیامت بپا ائدر
محشرده ده دیلینده فغان و نواسی وار
..
یارب دییر بو باش بیلوسن نور عینیدور
عطشان حسیندی، واقعه ی کربلاسی وار
..
قرآن یولوندا ذبح اولونوبدور مِنَ القفا
آلنیندا ایندیده بالامین داش یاراسی وار
..
دریا یانیندا یاندی سوسوزدان دوداقلاری
قلبیمده ایندیده اؤ غمین انعکاسی وار
..
مهمانیدی یارالی بالام کوفه اهلینه
مهمانه حرمت ائتمه ده الله رضاسی وار
..
شمشیرلر قوجاقلادیلار نور عینیمی
بو محنتین اورکده هله اختفاسی وار
..
گئتدیم اؤ غملی گونده حسینون هرایینه
گؤردوم بلا چولونده قیزیل قان مناسی وار
..
درّنده لر وجودینی تالان ائدوبدیلر
شرحه چتین گله نه چتین ماجراسی وار
..
قطعه به قطعه پیکرینی دوغریوب قوشون
اولدوزلارین ساییندان علاوه یاراسی وار
..
بسکی دگوبدی سینه سینه تیر جانگزا
مین چشمه قان بولاغینون اوردا نماسی وار
..
هر بیر یاراسی قلبیمه مین درد اولوب منیم
علت اودور دیلیمده هزاران مراثی وار
..
یاننام دوشنده یادیمه قلبینده کی یارا
بیر اوخ دگوبدی اوچ جهت جانگزاسی وار
..
اول اوخ دگنده ناله سی گلدی قولاقیمه
گوردوم دیلینده یاندیریجی وای آناسی وار
..
دلدن دگن اوخی کوره گیندن چکوب حسین
گور بو غم و مصیبتین هاردا قیاسی وار
..
«ئولدوردولر حسینیمی من باخدیم آغلادیم»
کوفی لرین نه شرم و نه حجب و حیاسی وار
..
ای کاش ئولدوروب بالامی ال چکئیدیلر
اعظم مصیبتین ولی گوردوم اساسی وار
..
آتلار ایاقلیوبلا منیم سینمون گولون
بو غمده زینبین هله ده آه و واسی وار
..
قارداشینی گؤرنده قیزیم یاندی آغلادی
محشر اولوب دیلینده گئنه وا اخاسی وار
..
الآندا وار بو روضه سینه آغلارام ئوزوم
گویلرده بزم ماتمی وار «مَن بَکاسی» وار
..
«گوزیاشیمی یارالاریوا مرهم ایلرم
عالم بیلور کی هر یارانین بیر دواسی وار
..
فکر ایلدیم کئچن گجه تک قالدی قارداشیم
قلبیم دئدی داریخما یانیندا آناسی وار
..
کرب و بلا هواسی بیزه سازش ائتمدی
شامه گئداق گوراق اورانین نه هواسی وار
..
شمر آنلامور کی قافله ده واردی حرمله
یابعضی عورتین قوجاقیندا بالاسی وار»(۱)
..
تحریره چک بو درد و غمی آغلا «ناعمی»
هرکیم حسینه آغلاسا یاخشی جزاسی وار
ـــــــــــــــــ
(۱)مرحوم #ذهنی_زاده
..
#الهادی_مدح #الهادی
#الهادی_میلادیه
#هر_مطلبین_که_پایه_و_اصل_و_اساسی_وار
#حضرتی_ناعمی
#ترکی
#زبدةالاشعار