زبانحال حضررت اباعبدالله الحسین (ع) در بالین حضرت ابوالفضل العباس (ع)
.
✍️ زبدة الاشعار ✍️
?: @nohe_torki
.
عباس داداش زاده ( فانی تبریزی )
.
ابوالفضلیم علمداریم
گوزون آچ یاوریم قارداش
سن ئولدون پرچمیم یاتدی
داغیلدی لشگریم قارداش
.
.
علم بیرسمتیده، بیرسمتیده مشکون دوشوب پاره
قلج بیریاندا صاحب‌سیز فَرَس بیر یاندا آواره
وجودونده دگوب از بس که یاره اوستونه یاره
قزیل گل تک بدن خنداندی ای گل پیکریم قارداش
.
.
ازل گون تا لبالب اولدی ساغر نور وحدتدن
ایچوب مست و خراب اولدون می ناب محبّتدن
ایله سیراب اولوبسان بادۀ جام شهادتدن
که یکسر عالمی ترک ائتموسن ای یاوریم قارداش
.
.
سن ای وادیِ حیرتده اولان مستِ رخ جانان
یتن طیِ مراحلده مقام فقره لب عطشان
وصاله یول تاپوب دین اوسته اولدون قانیوه غلطان
علایقدن داخی اولدون بری ای یاوریم قارداش
.
.
عَلَم نصب ایلدون ای شیر دل میدانه شاهانه
داغیتدون صفلری تاپدون ظفر اول قوم عدوانه
آتام حیدر کیمی جنگ ایلدون بی‌باک و مردانه
ولی آخرده آخدون ای ایشقلی اختریم قارداش
.
.
علی رزمین مجسّم ایلدون اشراره صولتده
حنین و بدری سالدون یاده ابراز شهامتده
الوندن ال گوتوردون آرزوی قاف وحدتده
مرامه یتدون ای عنقای خونین شهپریم قارداش
.
.
بلا دریاسی طغیان ایلیوب قان دوتدی صحرانی
ستم ابری بو دشته یاغدیروبدور درد بارانی
سموم کینه تا ساحلده یخدی تشنه سقّانی
منیمده دولدی موج دردیله دور و بریم قارداش
.
.
بنات مصطفانون غصّه‌دن سلب اولموش آرامی
تیکوبلر گوز یولا لب تشنه قیزلار الده سو جامی
مصیبت سنگباراننده سندی سینه‌لر جامی
قیریلدی تار امید ای درخشان گوهریم قارداش
.
.
سنیدون بو سپاه ایچره منه فرمانده لشکر
سنیدون روز هیجاده پناه آل پیغمبر
سنیدون خرمن بیداد ده چون شعلۀ آذر
سنیدون ظلمت محنتده ماه انوریم قارداش
.
.
عجب کامه چاتوب ترک ایلدون دنیا و عقبانی
رضای حقّی آختاردون نه حور و شاخ طوبانی
بو حالاتی دونن اثبات ایدوبسن ای وفا کانی
بو سودائیله اولدون اهل عشقه رهبریم قارداش
.
.
بوگون باشدان گیچوب جان وئرموسن شوقیله جانانه
ولایت امرینی تفسیر ائدوبسن اهل دورانه
وفا درسین گوزل تعلیم ائدوبسن اهل ایمانه
سنه جانیم فدا ای باوفا فرمانبریم قارداش
.
.
گوزمدن نهر علقمده وجودون تا نهان اولدی
دئدیم دلدن که شهبازیم یقین تیره نشان اولدی
همای عشقه جولانگه فضای لامکان اولدی
دئدون گرچه اولوب تیره، نشان بال و پریم قارداش
.
.
دور ای سقّای غم‌پرور تدارک قیل سو اطفاله
یته تا تشنه آل مصطفی مخیمده آماله
یانار کون و مکان قلبی مصیبتدن بو احواله
سوسوزدور آل پیغمبر منیم ای کوثریم قارداش
.
.
دور ای آرام جانیم تشنه سرداریم اویان یاتما
دور ای ماه بنی هاشم محاق قانیله باتما
حرمده اهل بیتین گوزلرین، هجرونده آغلاتما
نجه گور آغلیری حالون گورنده گوزلریم قارداش
.
.
یازیبدور مطلعی بیر بندیله استاد بی همتا
آدی «عابد» تخلّصده ولیکن عارف بینا
او سر مشق اولدی «فانی» قلبنه بو شعر اولوب القا
نظر قیل اونلارا لطفیله ای غم پروریم قارداش
.
#سبک_علی_اصغر_مه_انور (بیش از 7 سبک)
.
#عباسیه_شهادت
#ابوالفضلیم_علمداریم_گوزون_آچ_یاوریم_قارداش
#فانی_تبریزی
#ترکی
.
✍️ #زبدةالاشعار ✍️
?: @nohe_torki
سلام خیلی سروده دلنشینی است
سلام و احترام
ممنون از حضور سبزتان …
التماس دعا