زبانحال حضرت زهرا (س) به فضه خاتون
.
.
#سبک_سو_یوخومدی_قیزلاروندان …
.
.
حاج مجید بدایعی ( #اشکی_تبریزی )
.
.
اوج ایدوب سمایه آهیم
فضّه گل هرایه یاندیم
دورما ویر خبر اماندور
شاه لافتایه یاندیم
.
آتش جفا وورولدی درگهیم آلشدی یاندی
آذر شررله شعله چکدی گویلره دایاندی
لاله تک یانقلی قلبیم پرده پرده لخته قاندی
شرح حالیمی دایانما سویله مرتضایه یاندیم
.
آز قالور بهارعمریم ظلمیله یته خزانه
سینمی ایدوبدی ثانی تیر محنته نشانه
سقط اولوب بالام ستمله گیتدی روضۀ جنانه
اودلانوب یارالی دلدن من بو ماجرایه یاندیم
.
بیر طرف قاپی فشاری حایلیم بویاندا دیوار
من نقدری مانع اولدوم ایلدی هجوم اشرار
دوشموشم داخی نفسدن سینمه باتوبدی مسمار
طاقتیم گیدوب یخلدیم دوشموشم بلایه یاندیم
.
یوخدی دورماقا ایاقه منده طاقت و توانا
ویر بو حالیمی عم اوغلوم حیدره خبر دایانما
سویله داده یت یخلدی یا علی یارالی زهرا
فوج غم آلوب بتولی هارداسان آرایه یاندیم
.
باخمادی بو گونده ثانی یاسلیام عزالیام من
ایتدی بلدوقی جفانی فضه گل بلالیام من
قول سینوب نفس باتوبدی سینه دن یارالیام من
اولموشام هدف خدنگ محنت و بلایه یاندیم
.
طاقتی کسیلدی فضه تا ائشیتدی بو ندانی
سسلدی اوجا سسیله بو دلیله مرتضانی
یا علی یتیش هرایه ئولدورور بتولی ثانی
فاطمه سسین ایشیتدیم منده بو صدایه یاندیم
.
فضّه نون سسین ائشیتدی مرتضا اولوب پریشان
غیظه گلدی صحنه چیخدی سرعتیله شیر یزدان
صحن خانه ده نه گوردی فاطمه دوشوب ایاقدان
سویلدی بو حاله زهرا آند اولا خدایه یاندیم
.
ثانی ستم شعاری قصد ایدوب او شیر داور
یخدی تپراقا بیوردی اول لعینه شاه محشر
باغلیوب ایکی قولومی امر حضرت پیمبر
تابعم بو ماجراده امرمصطفایه یاندیم
.
جرئته گلوب بو سوزده جمله تابعان ثانی
چونکه بلدولر او گونده قصد شاه لافتانی
قوردولار اودورهمان گون ماجرای کربلانی
سوز گیدور گینه بو یرده دشت کربلایه یاندیم
.
ایخدا ندن هرایه گلمدی شه ولایت
زینبه قیام ایدنده غاضریه ده قیامت
اوندا که ویروب سپاهه ابن سعد حکم غارت
آتش جفا دایاندی عرش کبریایه یاندیم
.
خیمه لرآلشدی قاچدی چوللره بنات زهرا
خوردا قیزلاری قوواردی آتلارین دوشؤنده اعدا
بیر ایله قیامت اولدی حشردور او حشره ایما
سسلنوردی خوردا قیزلار گل بابا هرایه یاندیم
.
«اشکیا» دایان بو یرده یازموری دایاندی خامه
هر قدر یازیلسا یتمز غارتین غمی تمامه
بو قدر کفایت ایلر اود ووران زمان خیامه
قیزلارین صداسی یتدی ارضیدن سمایه یاندیم
.
.
#فاطمیه_شهادت
#اوج_ایدوب_سمایه_آهیم_فضه_گل_هرایه_یاندیم
#ترکی #فاطمیه
#زبدةالاشعار
نظر دهید